تواصل معنا

مصر هيا صاحبة اولى ثورة ف التاريخ وتانيها ان الحكام والحكم والحكومة متوثقين ف تاريخنا من ييجى 3 الاف سنة قبل الميلاد واكتر وان على مدار السنين دى كلها كان...

الاستاذ

عضو
نجوم المنتدي
إنضم
11 أغسطس 2021
المشاركات
3,245
مستوى التفاعل
2,652
الإقامة
مصر
مجموع اﻻوسمة
2
من بيبى لمبارك وخليهم يتسلوا

مصر هيا
صاحبة اولى ثورة ف التاريخ
وتانيها
ان الحكام والحكم والحكومة متوثقين ف تاريخنا
من ييجى 3 الاف سنة قبل الميلاد واكتر
وان على مدار السنين دى كلها كان فيها
عصور عتيقة
وانتقالية اولى
ووسطى
وانتقالية تانية
وحديثة
وانتقالية تالتة
وعصر متأخر وأفلام كدا
وكل هذا يتخلله حكم 31 أسرة
كل أسرة فيها عدد من الحكام والأسماء
وعلى مدار مئات السنين هنفضل كدا
لحد ما تقع مصر تحت حكم الرومان ف أخر الأمر
وبعدين ييجى الفتح العربى لمصر
وندخل ف زمن تانى خاااالص ..
قصة الليلة دى عمرها فوق الـ 4 الاف سنة
تحديدا ف زمن الأسرة السادسة
لما كان الفرعون هو(مري أن رع )
ومات الراجل وساب ابنه .. الوريث
وكان اسمه نفر كا رع الشهير بـ "بيبى التانى"
واساميهم مجعلصة ومهببة


المهمممم الواد بيبى التانى دا حكاية ليها العجب
متحصلش الا ف مصر
الواد بيبى لما وصل للعرش بيقولوا كان عنده 6 سنين
وطبعا ميحكمشىىىىى ..
لكن هيبقى شكلا الفرعون وفيه أوصياء عليه
هما اللى بيمشوا الدنيا
ناس بتقول انه كان تحت رعاية امه
المودام عنخ اس مرى رع اللى مقعداه على حجرها
وبتدلعه
وفيه ناس تانية بقى
بتقول ان الملكة دى ماتت بعد شوية
وان خالته وجوز خالته اللى كان وزيره
بالصدفة البحتتتتتة هما بقم الأوصياء
ورعوه لحد ما كبر وكدا


وبيقولوا ان ست الحاجة خالته «عنخس»
كانت بتدلعه وتهننه وان وصلات الدلع المرىء دى
اتسجلت على جدران احدى المعابد ف شكل اشعار
وان ف وسط الكلام الواد كان خايف من المستقبل
والموت فكانت خالته بتقوله :
"ما الذي يخيفك يا بيبي الجميل
كلنا حولك أنا وخالك زاو والقائد حرخوف"
والجملة دى تحديدا بقى هتبقى مربط الفرس
لأن الجدع كان محاط بالقرايب والاهل والحاشية
وحاشية الحاشية
وهما دول اللى هيطربقوها فوق دماغه بعدين
وبس الملك العيل اللى كان لسه بكافولة
من سنتين تلاتة هوه الفرعون
وخالته الوصية وجوز خالته الوزير
والقائد بتاعه من الحرس القديم بتاع زمان
وكبر بيبى وقعد يحكم
وقعد يكبر يكبر
ويحكم لحد ما بقى ف العشرينات يا شهر ؟
لأ
لحد التلاتينات ؟
لأ
لحد الأربعينات ؟
لأ
لحد الخمسينات ؟
لأ
لحد الستنيات ؟
لأ
لحد السبعينات ؟
لأ
لحد التمانينات ؟
لأ
اهيه .. ما تخلصى يا ست وتقولى
الله ... انتا حاجز مدشة ولا مدشتين ؟؟!!
خلاص هقول أهو


بيبى التانى يا بيبى
يقال انه قعد ف الحكم بتاع 94 سنة تقريبا
يعنى عاش لحد ما تم القرن
والله اكبر قل أعوذ برب الفلق من عينيكو
شعب قرّار طول عمره
94
دا اساطير الاولين
أو أفلام خيال علمى يا شهرو اللى بتحكيه
صح ... ؟
لا والله العظيم ورحمة أبويا زمبقولكم كدا
وآل المؤرخين بيختلفوا ف المدة
وناس بتنقص 10 ولا عشين سنة كدا
انما الثابت ان الحاج بيبى
قعد أطول فترة حكم حكمها أى شخص ف أى مملكة
ف التاريخ القديم والحديث
وما بينهما
ومصر أه حكمها ناس بعد كدا لـ 60 سنة
منهم المستنصر بالله الفاطمى مثلا وغيره
لكن محدش كسر الرقم القياسى بتاع بيبى دا
لحد دلوقتشى
ولا اظنه هيحصل وهذا والله أعلم !!

والصراحة الراجل اصله ابتدى المشوار بدرى
بيحكم وهوه ف كى جى تو
والصراحة برضو هوه ابن محظوظة
لا انقتل ولا انقلبوا عليه
فقعد وخللّ ف الكرسى
ويمشى ليه بقى حتى تبقى عيبة !

وتخيلوا معايا كدا .. عدى عليه أكم من أجيااااال
عاشت وماتت
وهوه متبت ف الدنيا ولازق ف كرسى الفرعنة
وطبعا منطقى وطبيعى ان تحصل مهازل
طول المدة دى
طول القرن بقى

بس اللى حصل ف أواخر عهده ..
خلى فيه طمس لتاريخه كاملا وانجازاته
انما الشاهد ان اول بدايات حكمه الدنيا
كانت كويسة وشغالة وماشية وتمام​
وغالبااا لو بصينا ف مانشتات المعابد وقتها
هنلاقى تصريحات من نوعية الكفن ملوش جيوب
وانا هحضن الجميع ونتعاون ونبص لبكرة
والقصص دى
واللى وصلنا عنه ان ف زمنه كانت الحملات
بتخرج للجنوب كالعادة
وان جنب العطور والبخور والدهب وغيره من غنايم
كان القائد حرخوف .. ف احدى المرات
ف مهمة مخصوص فجاب (قزم) لتسلية مولاه الفرعون
ونص الرسالة موجود ف احدى البرديات
بيحكى ازاى ان بيبى كان مهتم بالحكاية دى
ووصى القائد بتاعه انه يخلى باله ع القزم
ويحرسه كويس
ويبص عليه عشر مرات ف الليلة الواحدة ... !!
حد يقولى ايه الحكاية يا شهر ؟!!
هوه هيعمل ايه مع القزم بالضبط ؟!!!
أقولكم بلاش الظن الويحش دا يا ولااااااد
ف العصر دا كان الأقزام ليهم مهمات
ووظايف ف اقامة الطقوس الدينية زائد تسلية الفرعون
والتسرية عنه
ومنهم اللى كانوا رجال مهمين ف الدولة

sally soliman @sasosall
هو مكانش طالع مخصوص عشان القزم
هو جاب القزم من دماغه و بعت جواب للملك
والقصة مكتوبة على واجهة
مقبرة حرخوف في غرب اسوان

القصد ان الفتى كان مدلل ورايق
وعصره كان فيه غنى فاحش
على مستوى الوجهاء والطبقات العليا
والهرم بتاعه ف منطقة سقارة يشهد بذلك


ويحكى ان حضرته مكنش بيحب الدبان
وملك بقى لسه هيقعد يهش ؟؟
فكان بيجيب العبيد بتوعه
ويتدهنوا بالكامل بالعسل
فيجذبوا الدبان بعيد عنه !
#ياحلااااوة_ياولااااااد

وقعد بقى الحاج بيبى من 2278 إلى العام 2184 ق. م
ف الاول كانت الدنيا حلوة زى ما قولنا
لكن بعد شويتين
اتلم عليه بتوع البلاط والأقطاعيين والكهنة وحاوطوه
وابتدى حكام الاقاليم يتوحشوا ونفوذهم يكبر
وبقت عزب وكل حاكم يعين اولاده وقرايبه والمحاسيب
بقت وسيات (جمع وسية) حرفيااااا


الناس قعدت تبرطم ف البداية عاوزين حقنا
وكفاية ظلم وابتدى يحصل انفلات امنى
وفساد للركب وما فوقها والظلم بقى ظلمات
وسى بيبى قاعد ف قصره ولا على باله
وهنا هنسمع اسم إيبور

والحكيم إيبور دا بقى جبرتى حكاية الليلة
اللى هيأرخلنا الحدث من قبل ما يقع ولحد حدوثه
كان بيشتغل ايه يا شهرو الراجل دا ؟
بيقولوا انه كان كاتب ف احدى الدواوين
وناس بتقول انه كان أمين الخزانة الملكية
يعنى مقرب نوعا ما م الملك
لكن الأكيد انه كان راجل فصيح وواعى
وكتب ما ترجمه سليم حسن ف موسوعته الشهيرة
.. بـ "تحذيرات نبى" أو "تحذيرات الحكيم أيبور"
وكلها ف النهاية بنفس المعنى ..
وكلها ف النهاية بتوصف اللى حصل
ايه بقى اللى حصل ؟
اسمعوا وعوا
وكأننا بنصور المشهد كلاكيت
لعشرتلاف مرة ... أكشن

أيبور بيحكى ازاى انه بقى فيه فوضى
وغزو من الاغراب
"إن أهالي الصحراء قد حلوا مكان المصريين

في كل مكان واصبحت البلاد ملائ بالعصابات
حتي إن الرجل كان يذهب ليحرث أرضه ومعه درعه "
شحبت الوجوه وكثرعدد المجرمين ولم يعد هناك رجال محترمون، وفقد الناس الثقة في الأمن"

وغضب الألهة نزل عليهم لدرجة ان الناس نفسها اتسدت
وبطلت تخلف .. من الهزال والنكد والكآبة
"صارت النساء عاقرات
ولم يعد هناك حمل بسبب إعراض الإله "خنوم"
عن هذا العمل غير المجدي "

الشاهد ان حكام الأقاليم ف هذا الوقت
فرضوا ضرايب ع الناس
ونزلوا يحصلوها
قوم الشعب ضج واشتكى
والشكوى موصلتش لقصر فرعون اللى حاشيته
عملت تعتيم حواليه
وبس متنكدوش على مولانا احنا مبنحبش نضايقه
بنقوله الاخبار الكويسة بس .. !
إيبور استشعر الكارثة اللى هتحل بالبلد
لو فضلت الأمور خارج السيطرة
فكتب للفرعون يحذره
لكن الحاشية قالت أبضنننن
كل شىء تمام يا فندم دى قلة مندسة
واحنا حاضنين الشعب !
بيبى الشيخ العجوز اللى كان قاعد ف حديقة القصر
بيتشمس ولا كان ف باله
ومحدش يعكنن عليه قهوته الصباحية
اللى كان بيدهن العبيد عسل عشان ميهشش الدبان
قالك طنش تعش تنتعش
ويا راجل كبر دماغك
انا شعبى يحبنى
وانا حر فيه اغسله واكويه افرده واتنيه
ومحدش يخش بينى وبين المصريين
وانا عارفهم بيهزروا ومش بجد
بس بعد شوية المزحة صارت جد
والشعب هيقرر يثور عليك يا بيبى .. يا حبيبى
وتطلع أصوات تطالب بالإضراب والعصيان المدنى
أيبور كان حذر منها الثورة دى
لما قال للفرعون نصا :
" ان القيادة و الفطنة و الصدق معك
و لكنك لا تنتفع بها ...
و معك الحكم و السلطان و الجيش و الشعب
ولكنك لا توظفهم حق التوظيف لأن حولك حاشية
تمنع عنك الحقائق و زينوا لك العيش فى القصر
فى جو من الصخب و العربدة و سرور كاذب
وخارج القصر يعيش البؤساء عيشة ضنك
لقد اصابت البلاد فوضى عاتيه ضربت كل الانحاء
وانت لا تدرى ..
فالبلاد قش ملتهب سرعان ما يشتعل
و الانسانية منحلة
ليتك تتذوق بعض هذا البؤس بنفسك .. !! "

حد دلوقتى هيقولى .. لازم بيبى اتخض

بعد ما حصل قلق واستجاب وسمع الكلام وكدا ..؟
اقولكم عيييييب
دحنا حكامنا هما اللى بدعوا العند
وأخدوا فيه الدكتوراه كمان .... !
بيبى نده لحاشيته ايه يا ولاد نقلق
قالوله يا باشا مفيش حاجة
ومصر ليست تونس
دول شوية عيال من المعارضة وكفاية واليسار
والناس الفاضية الخسرانة ف البرلمان
وهنهشهم يتهشوا ويمشوا
قالهم خلاص .. خليهم يتسلوا
وأيوه هيا الكلمة دى يا ضينايا ... كنا مستنينها


حاضر .. هنتسلى
دا الشعب اللى بيقول
ودعوة الإضراب سرت كالنار ف الهشيم
وبيقولوا انها بدأت ف المعابد
لما الناس وقفت طقوس الدفن والجنائز احتجاجا
وقررت تتجمع عند الأبواب وتصرخ
وعيش ... حرية .. عدالة اجتماعية .. يا ولاد الحرامية !!! #لقد_هرمنا

بس بقى والإضراب بقى عام
ورفض الناس يدفعوا الضرايب والحكاية وسعت
وعاندوا مع الفرعون اللى ف الاول
ويبدو انها عادة متأصلة وف الجينات
مستوعبشى وتربس وساق ف العناد
وطبعا كبر سنه مع ضعف قبضته على موظفينه
خلته ميعرفش يتحرك صح ولا بسرعة
ولا يقيسم الوضع صح
فالعملية خرجت من ايده ومن ايد حكام الاقاليم كمان .. !


و.... انكسر حاجز الخوف تماماااااا
والثورة انطلقت
لكن كانت ثورة جياع عن حق
أكلت الاخضر واليابس
وبقي حالنا فيها أنيل من سوريا والعراق​
سليم حسن وصف الثورة دى
بإنها كانت زى الثورة البلشفية ف عنفها
والشعب وقتها خصوصا الطبقات البسيطة والمعدمة
طاحت بكل حاجة قصادها
ومحدش قدر يفرملها

وإيبور اللى بيوصف بدقة ما حدث

وازاى ان الناس .. مرحتش تحرق الأقسام حضرتك
ولا الحزِن الوثنى
دى دخلت على دواوين الحكومة
وبيوت الموظفين الكبار نهبتها وحرقتها
وقتلت اللى وقف قصادها وخلتها ع البلاااااط
وسكنتها كمان بعد ما اخلتها من سكانها الاصليين !

والناس من كتر السلب والنهب والانفلات الامنى
والقتل ف الشوارع عمال على بطال
بقوا مش عارفين يدفنوا موتاهم
والحانوتية استغلوا الموقف وغلوا التسعيرة !!!
والأهالى معهاش فلوس تدفن
والدولة طبعا موظفينها هربانين من الموت
فكانت جثث الموتى بتترمى ف النيل بأعداد رهيبة
لدرجة انه
التماسيح بقت تاكل اللى بيترمى دا
لحد ما جالها تخمة وبقت بأحجام ضخمة ومرعبة .. !

ومبقاش طبعا فيه تجارة ولا حد بيروح ولا بييجى
وبطلوا يستوردوا خشب من بيبلوس(لبنان) يعملوا توابيت
وبقى الناس تفتح مقابر الكبراء وتحتلها

" وصار الوجه القبلي صحراء جرداء
واصبحت التماسيح في تخمة بما سلبت
وانتشر حفارو القبورفي مكان بسبب كثرة الموتي
خربت المنازل ، واصبح المصريون لايرون الآن "
يعنى لا بقى فيه لا زرع ولا حاجة
وأيبور بيحكى عن الفلول بقى
وبيوصف حالهم بعد ثورة الجياع دى
عقبال ما اشوف كل فلول مبارك السابقين واللاحقين
يارب كدا ... ف نفس الحال ان شااااء الله
عشان جربنا ثورة بالذوق والادب ومنفعشى
ومحدش إتعظ ...
" صار الذهب واللازورد والفضة والياقوت
تحلي جيد الجواري بينما تمشي السيدات النبيلات
في طول البلاد وعرضها يقلن:
" ليت لدينا بعض الشيئ لناكل "
وصارت اعضاؤهن في حالة يرثي لها
لما عليها من الخرق البالية؛ وقلوبهن تنفطر حزنا
عندما يشاهدون أنفسهن في حالتهن هذه"

" وأولاد الأمراء يضرب بهم عرض الحائط
وأنتزعت مواميات علية القوم من مقابر
ها وألقيت في الطريق العام وأصبح سر التحنيط جهراً"
"حدثت أشياء لم تحدث من فيما مضي
إذ اغتصب الفقراء القبر الملكي
وأصبح الملك الذي دفن يرقد علي نعش
وطرد حكام البلاد وأصبحوا ينامون في المخازن
واضطرت السيدات الكريمات
الي الرقاد علي الفراش الخشن
و أصبح الرجل الميسور ينام ظمآن "
وذلك الذي كان لاينسج لنفسه يملك الكتان الجميل
ومن لم يبن لنفسه قارباُ أصبح الآن صاحب سفن
ومن لم يكن له ما يظله أصبح يملك أفياء
واصبح من كان يجهل الضرب علي العود يملك قيثاراُ "​


"وأصبح من كان ينام أعزب بسبب الحاجة
يجد نساء نبيلات
ومن كان لا يملك شيئاُ صاحب ثروة
ويمتدحه الأمير تملقا
ومن كانت لا تملك صندوق صاحبة صوان"
من كانت تشاهد وجهها في الماء صاحبة مرآة
وأصبح القصابون يغشون الآلهة
فيقدمون لهم ذبيحة من الأوز بدلا من الثيران "

" أما الماشية فهي تجول ولا تجد أحد يعني بها
وكل إنسان يأخذ لنفسه منها ما يريد
وأصبح الرجل يذبح أخيه فيتركه في الضيق وينجو بنفسه
ولم يعد هناك موظف في موضعه اللائق به
ولم يعد هناك صانع يعمل إذ أن العدو قد حرم البلاد حرفها"
يعنى خربت
وطبعا كرة التلج اتدحرجت كمان وكمان
بقى فيه غزو من الأعداء على الحدود الشرقية
بينتهزوا الفرصة طبعا

والثورة خرجت عن السيطرة وصابت الكل بالخراب
الكل بلا استثناء
لدرجة انه أيبور بيقول
" وقضي علي الضحك ولم يعد يسمع
بينما أخذ الحزن يتمشي في طول البلاد وعرضها
ممزوجاً بالأسي
وكره الناس الحياة حتي اصبح كل واحد منهم يقول
حتي اصبح كل واحد منهم يقول
" ليتني مت قبل هذا"
أصبح الرجل الأحمق يشك في وجود الإله
فيقول إذا عرفت أني يوجد الإله قدمت له قربانا
وأطفال صغار يقولون
"كان يجب عليه الأ يجعلنا علي قيد الحياة"
وبس الموضوع وسع قوى قوى قوى
ووصلنا لمرحلة متقدمة من الغضب الشعبى والأنفلات
الألحاد الخ ..
لدرجة انه :
" انمحي ما كان يشاهد بالأمس واتلفت المحاصيل
وأصبح القوم يأكلون الحشائش
ولم تعد هناك فاكهة ولا أعشاب تقدم للطيور
وقد أصبحت القاذورات تختطف من افواه الخنازير
بسبب الجوع "
" وانعدمت الغلال وجرد القوم من الملابس والعطر
والزيت وصارت المخازن خاوية
وسلبت كتابات قاعة المحاكم الفاخرة
وأذيعت التعاويذ السحرية ،"
وبكل دقة قال ...
"وأصبح الناس كالقطيع المذعور من غير راع "


وحد دلوقتى هيخبط على صدره ويقولى يا لهوى يا شهر
.. طب فضل ايه بعد كل هذا ؟!!
يا ختشى قطعت دى ثورة اللى وصلتنا لكدا ..؟
أقولكم لأ معلشى قبل ما تحاسب الناس دى
على ما حدث
حاسب الاول اللى وصلهم لأنه حدث
ولاّ هتتشطر ع الغلبان الضعيف البائس المظلوم
وتلومه وف نفس الوقت
هتسيب اللى سرقه ونهبه
وحطم اخلاقياته ومبادئه على صخرة العوز والحاجة
ووصله لحافة الانهيار
ومتحاسبوش
لأ ويمكن هتطلعه براءة زى مبارك كدا ؟؟؟؟؟
وكلمة السر كانت ف جملة قالها أيبور
لما وصف الثورة ف بدايتها
ان الناس خرجت من القرى والبلاد وهيا بتصرخ
وتقول : " لنقص أصحاب الجاه من بيننا "
يعنى الثورة كانت على ظلم اجتماعى بينّ وقاطع
بين طبقة حاكمة اخدت كل حاجة
وبين طبقة تانية عمالة تغرق ف الفقر
لحد ما خرجت عن الأنسانية ف أعلى درجة غضب ... !
متهيألى عيب قوى قوى يعنى ....
وطالما صعبان عليك وقلبك رحيم كدا
يبقى رقق قلبك ع المظلوم
اللى اتحول لظالم بسبب ما فًعل به
قبل ما يرق للظالم اللى بقى مظلوم بسبب أفعاله
البادى أظلم ... ولا ايه ؟؟؟

المهم الثورة دى بقى كانت أخرتها ايه ؟
يعنى بعد ما الشعب ثار وغير وضع رافضه
وبمنتهى العنف
هل بت ما حقق هدفه
ولا عمل زى محمض حسنين هيكل ما قالنا زمان كدا
طلعنا القمر وطلبنا كيلو كباب ؟!!

اللى وصلنا بيقول ان الثورة حققت هدفها الأساسى
يعنى راحت تشيل الطبقة الحاكمة المفترية المتوحشة
وبأقسى الطرق بالقتل او الذل والمهانة
ونجحت فعلا ... كويس حلو؟
أه حلو
لكن اللى مش حلو
ان الاخ بيبى التانى فضل ف كرسيه
اكمنه إله بقى ومحدش طبعا
مهما اتظلم منه هيستجرى يقول نشيله !!
وفيه حاجات كتير اتهدت ف الوقت دا
واتسرقت وانمحت اثارها
لكن الظاهر بيبى التانى
عرف يقرطسهم ويكمل الست شهور
ومش بس كدا
دا الحكم فضل ف العيلة بتاعته
لكنننن على صعيد آخر
ومن المؤكد ان الفترة دى عرفت تاريخيا
بفترة الأضمحلال
وكانت سيئة وفضلت فيها تقلبات ومشاكل
قعدت لفترة طويلة
وكانت دى نهاية الأسرة السادسة
يعنى برضو الثورة جابت ضرفها والحمدلله

ويقال ان ف عز الأضمحلال
أنفصل الشمال عن الجنوب لأول مرة من عهد مينا
موحد القطرين لما ضمهم على بعض
والدولة انهارت انهيار تام
مؤسسات الدولة والنظام الحاكم كله
وفضلت كدا شوية لحد ما اتلمت تانى
بعدين ف فترة تاريخيه لاحقة
وخلصت الثورة على كدا بيتك بيتك
والحدوتة انتهت لكن تفضل الملاحظات
بتاعت كل مرة ...

1)
احنا بلد مذهل برغم كل البلاوى .. بجد
احنا اول ناس تقريبا ف كل حاجة حتى الثورات
مخليناش ف نيفسنا حاجة الصراحة

2)
احنا شعب أصيل
ف جيناته العبط من زمان قوى
بنعمل ثورات ومبنكملهاش للأخر
اتارى الحكام اللى بيمسكونا هارشين بقى
وكل ثورة يستكردونا .. !!


3)
احنا دولة حريّفة ف الظلم أه
لكن حريّفة كمان ف التعافى
ومهما شفنا بلاوى ممكن تقدر تمحينا من ع الخريطة
برضو بنلحق روحنا ونرجع من تانى
وهوه دا اللى دايما يطمننى ان أى كارثة
بتحصل وهتحصل ف المستقبل القريب او البعيد
... فعلا احنا قدها مش جدعنة وشطارة
أبضنننن
لكن لأننا الرواد والاوائل وخبرة وكفاءة ف الفوضى
وارجاع كل شىء لأصله ولو بعد زمن
ومتعودييين دايماااااا

4)
بيبى حكم 94 سنة يا ولاااااد ...
احنا كدا ظلمنا ابن الوارمة عشان قعد
ياااااادوب 30 سنة
ومش بيبى لوحده رمسيس التانى قعد كتير
وغيره وغيره ..
لأ كدا العيب راكبنا من فوقنا لتحتنا
أسفين يا ريس
احنا طلعنا بلد الموامياوت ميتة وعايشة
ومكنش بس عارفين اللى فيها
بس العيب على وزارة التعليم
مش كانت تحطها ف منهج التاريخ
عشان نبلعها ونفوتهلك فارغة ... !

5)
اللى شغالين ف نغمة هنبقى زى سوريا والعراق
يا حبيبى انتا وهوه الظلم المتفشى بدون علاج
هوه اللى هيخلينا كدا
واقعدوا انكروا وادفنوا راسكم ف الرملة
لحد ما تبقوا زى حاشية بيبى التانى ان شااااء الله
وتعرفوا الحقيقة بالطريقة الصعبة

6)
زاهى نخاس قال ف تصريح له ف مرة
ان ثورة المصريين على مبارك
شبه ثورة ال(الحريم) على بيبى التانى
واللى افقدته عرشه بنفس الطريقة​

مش بس شبه بيبى التانى بمبارك
دا كمل تعريض وشبه السيسى ب«منتوحوتب الثاني»
اللى هييجى بعدين
ويلم أوصال الدولة وينكذ ماسر
بس الفرق ان السيسى منتخب والناس اختارته
ولا تعليق غير
#عبوكوعاللى_جابوك​






7)
واخيرا شوفولنا حل ف موضوع الكباب دا الله يكرمكو
مش كل ثورة ناس تموت
وناس تتسجن وناس تتبهدل وناس تكتئب
وكلنا نتنيل كدا
وبعدين تبقى اخرتها تغيير شكلى
ونرجع لقديمو لأ ونرجع لما هو ألعن كمان .. !

وف النهاية تحبى تقولى ايه يا شهر ف القصة دى
ولا حاجة
بس أحب أقول
اللى قاله أيبور من 4 الاف سنة واكتر
لفرعون زمانه
نقولها لفرعون الأيام دى
زى ما قولناها لمرسى قبله
وللمجلس العسكرى قبل قبله
"ليتك تذوق بعض هذا البؤس بنفسك"
بعض ايه
قليل بعض دى
"كل" البؤس يا فندم
كل البؤس ..... ان شاء الله
وبس كدا ..
خلصنا تصبحوا على ألف خير
يا أجمل شعب واجمل بلد ف الدنيا
اذا خلت من الاوغاد
اللى مترشقين ف كل شبر منها #للأسف
سلام
 

جيفارا

عضو
نجوم المنتدي
إنضم
10 أكتوبر 2021
المشاركات
12,088
مستوى التفاعل
4,713
مجموع اﻻوسمة
3
من بيبى لمبارك وخليهم يتسلوا
اشكرك على النقل المميز
 
Comment

امل مفقود

نجوم المنتدي
إنضم
5 مايو 2021
المشاركات
12,576
مستوى التفاعل
4,279
مجموع اﻻوسمة
2
من بيبى لمبارك وخليهم يتسلوا
يعطيك العافية و تسلم الايادي
على هذا الطرح الجميل
في انتظار لكل جديدك دوما
 
Comment
أعلى