الجاهل هو اللي ميعرفش إنه مهما عاش وشاف لسه بيتعلم ..
من فترة كنت في دورة مياه مول كبير بغسل إيدي ..
الحنفية هناك بسينسور ملهاش مفتاح
مجرد تحط ايدك تحتها تشتغل..
راجل كبير داخل ووقف قدام الحنفية وبيحاول يفتحها
مش عارف ومش عارف بتشتغل إزاي ..
انا مش واخد بالي منه ..اللي خلاني آخد
بالي شاب واقف وراه مطلع الموبايل وبيصوره فيديو وعمال يتريق
قلتله يا حاج بتتعمل كده ورحت عليه وقلتله عيب كده
ده قد والدك وميعرفش وده مش عيب كلنا بنتعلم ..
قعد يضحك ويقول فلاحين ..آدي الفلاحين ..
قلتله إنت بتصور الفيديو ده بقى وهتنزله على النت
عشان الأشكال اللي زيك تقعد تشير فيه وتتريق على الراجل الغلبان
وتعمل تريند .. مسك في خناقي وأنا مسكت في خناقه والناس حاشتنا وخلص الموضوع
طلعنا على صوت صوات ..لقيناواحدة قاعدة على الأرض
مغمى عليها والشاب اللي كان بيصور ده بيجري عليها ..
طلعت والدته واغمى عليها والناس ملمومة مش عارفة تعمل إيه
يشاء ربنا إن الراجل الكبير اللي الولد كان بيتريق عليه يطلع دكتور ..
ويدخل من وسط الناس يفوق مامته ويطمن عليها
في موقف ذهول من كل اللي حضروا الخناقة
واحد راحله وقاله شفت اللي كنت بتتريق عليه جوا
هو اللي ربنا بعتهولك ينقذ والدتك .. الحياة يا إبني مش زي ما أنت فاهم..
الجاهل هو اللي ميعرفش إنه مهما عاش وشاف لسه بيتعلم ..
وإن الجاهل هو اللي لسه مفهمش إننا بنكمل بعض
الرسالة من ربنا كانت واضحة أوي ومباشرة وسريعة ..
ي نفس اللحظة ربنا عرفه قيمة اللي كان فاكره بدون قيمة ..
واللي كان عاوز يضحك عليه عديمي الأخلاق من بتوع التريند ..
خلاه يعرف قيمته بشكل سريع ويفهم إن الفلاح ده أنقذ أمه ..
وإن الفلاحين مش شتيمة وهما عماد البلد وأساسها ..
ومجرد انه مش عارف يفتح الحنفية ده مش معناه
إنك أحسن منه بالعكس ده أنت هتحتاجله كمان لحظات لأنه اكبر واكتر علم منك
التريقة والسف على الناس وشهوة اللايكات دي مرض
واللي بيحس انه فاهم واحسن حد في الدنيا ده بيبقى في الأصل جاهل وناقص
اتمنى الناس تدرك ده
منقول ...لصاحبه
اسم الموضوع : الجاهل هو اللي ميعرفش إنه مهما عاش وشاف لسه بيتعلم ..
|
المصدر : المنتدي العام
صدقت في البداية كأن انت يا رفيق القلم كنت موجود مع الناس 
نورتي رفيقه الحرف وأهلاً بكِ
هي مجرد عظه وعبره
ممكن نستفاد منها
كل الود والوورد