سعاد. للشاعر الدوش

[جاروط]

عمر الطيب الدوش.

سعاد
ــــــــــــــ

دقت الدلوكه
قلنا الدنيا مازالت بخير
اهو ناس تعرس وتنبسط
تككت بالحنقوقه سروالى الطويل
سويتلو رقعات فى الوسط
فى خشمى عضيت القميص
اجرى وازبد شوق وانط
لامن وصلت الحفله زاحمت الخلوق
وركزت
شان البنت سعاد
اصلى عارف جنها فى زول بيركز و ينستر
لكنى عارف انها
لو كل زول فى الحله بالستره انجلد
يانى الازاها وجنها
برضى عارف اظنها
تحت تحت بتحبنى
ديمه فى صرة وشها
يلفحنى شوق نافر لبد
وركزت للحرقه المشت فوق الضلوع
تحت الجلد
ضميت قزازتى مرقت عن طرف البلد
وسكرت جد
وانا جائى راجع منتهى لاقتنى هى
قالت تعال
كبرت كراعى من الفرح
نص فى الارض نص فى النعال
اتلخبط الشوق بالزعل
اتحاوروا الخوف والكلام
هيى ياسعاد
على ود سكينه وكلتى فى خشموا الرماد
على ود سكينه ومات اسى
وانا بت بلاك ملعون ابوى لو كنت ارضى اعرسها
وانا ياسعاد وكتين تصبى سحابه تنزلى زى دعاش
بفرش على روحى واجيك
زولا هلك تعبان وطاش
وانا ياسعاد وكتين اشوفك ببقى زول
فرشولوا فرش الموت وعاش
قالت سعاد بطل كلام الجرسه انجض ياولد
مزقت روحى نتف نتف
مرقت من جيب القميص
تمباك وحب
عرقى و اسف
طبيت قزازتى وصلت لى طرف البلد
وسكرت جد
اذنت فى الشوق والسلم
وسرحت بالناس والغنم
وركعت للعرقى البكر
ورقدت فى الالم الحكر
وحلمت زى شالنى ومشى
فوق زحمة نبى الله الخضر
صحانى صوت العمده قال مسؤل كبير زائر البلد
قال لينا
وكت الزول يجى لازم تقيفوا صفوف صفوف
وتهيجو الخلا بالكفوف
وتقولوا عاش يحيا البطل
صلحت طاقيتى الحرير
واتنحنح الحشا بالكلام
ورميتو من حلقي الوصل
قت ليه ياعمده اختشى
مسؤل كبير فى الدنيا غير الله انعدم
ماشفنا زول رضع صغار
ماشفنا زول نجح بهم
ما شفنا زول لملم رمم
لا صحينا عاجبنا الصباح
لا نمنا غطانا العشم
والحله من كل الجهات محروسه
بالخوف والوهم
ومضينا من زمن قديم يا عمده مرسوم انتحار
الموت مباح
والحب نطاح
والصدق من جنس الزنا
العافيه مولودة سفاح
والرغبه مكسورة جناح
الحلم والوعد النبيل
الطفله والام النخيل
الرنه فى الوتر الاصيل
تلقاها فى قاموس نكاح
يايمه واح ياحله واح
ياسعاد تعالى ولمى من كل البيوت
عدة السفر الطويل
زخرفى الكفن الجميل
شخبطى الفجر النهار
اربطى الضحى والاصيل
المغرب
الفجر
النجوم
فى صرة وارميها البحر
خلينا فوق الشك نعوم
والعمدة فاض
العمده صار مليون عمد
العمده فيل
جبلا تقيل
لبوه و اسد
حسنه و غضب
جمعه و احد
بقيت قزازتى
مرقت عن طرف البلد
وسكرت جد
وانا جايى راجع اجهجهو
لاقانى هو
سايق العساكر والكلاب
رامى بين عينى وعينو
كلب و تكشيره و حراب
ضاقت نعالى من الزعل
من تحتها اتململ تراب
الغيم سكب ضلو ومشى
والدنيا غيما سراب سراب

والحله زى بلدا بعيد
زود بعادوا قرب سعاد
اتجمعت كل البيوت فى راحتا
زى بت لعاب
مجنونه تصرخ فى الزوال
ممزوجه فى الدم واللعاب
عينى ضاقت نظرتها
والجوف يطقطق بالكلام
قبال يقولوا لى سلام
اتلموا حولى بلا نظام
شال وعمه
توب وغمه
فاس وطوريه وحزام
شالونى بكل احترام
ورمونى فى قعر السجن
حصلنى قبل اليوم يتم
جارنا المدرس ود خدوم
قال لى لا زول قام هتف
لاكف مشت بتلاقى كف
والعمده زى همبول وقف
ياصمت اف
يادنيا تف
وانا ياسعاد للشوق نغم
للهم علف

 

[همس الروح]

كل الشكر لك اخي الكريم جاروط على النقل الجميل
احترامي وتقديري

 

[جاروط]

كل الشكر لك اخي الكريم جاروط على النقل الجميل
احترامي وتقديري

تسلمي غاليتي
إن شاء الله تكوني استمتعتي بكلمات السودانية

لك كل الود و المحبة
حفظك الله ♥

 

[بحــ عاشقه ـــة]

.
.
وأنا ياسعاد للشووووق نغم ....
يعني بعد هالشوق والغزل كله
دخل السجن
لا هو اللي اخذ سعاد ولا هو اللي وصل لها
.
.
الدنيا ماترحم
.
.

نقل مختلف وظريف ومميز جارووو

 

[جنون عآبثهة]

-




@جاروط

سلمت يمناك على الانتقاء الرائع

وسلم لنا ذوقك

دمت بود

 

[جاروط]

.
.
وأنا ياسعاد للشووووق نغم ....
يعني بعد هالشوق والغزل كله
دخل السجن
لا هو اللي اخذ سعاد ولا هو اللي وصل لها
.
.
الدنيا ماترحم
.
.

نقل مختلف وظريف ومميز جارووو

البت سعاد هي رمز للبلد
و الطغاة لا يرضون إلا بقهر الشعوب
و كل من ينادي بالحرية يرموووه في قعر السجن

تسلمي غاليتي
@بحــ عاشقه ـــة
أسعدك الله و حفظك

 

[جاروط]

-




@جاروط

سلمت يمناك على الانتقاء الرائع

وسلم لنا ذوقك

دمت بود

يعطيك العافية يارب
غاليتنا العزيزة
@جنون عآبثهة
حفظك الله و أسعدك