غلا قلبـيـن
عن إحساسي بْغيابك أو شعوري وإنتَ قدامي
وش أخباري وانا آحبك على رغْم اللِّقا والبين
.
مكانـك هو مكـانـك ما مِشَـت بي إلاّٰ أيـامي
تجي وْ تـروح والحالة على حَطَّة يِدِك للحين
.
أناذاك اللي لاشفتك في وجهك تضحك أحلامي
وانا ذاك اللي من تزعل وِقَفت وْعالمي مابين
.
تـِدور الدنيا من حولي وْ تموج الأرض بقدامي
إلين إتـرِد لي قلب ٍخَذوه عْيٰـونك الثـنـتـيـن
.
أنا من زود ما احبك رضيـت بـْجرحك الدامي
وْعِشَقت الغيرة وعْتابِك حنانك والقِسا واللّيْن
.
وْتِـعَوَّدتِك لِـحَد إني بديت أسـتـعـذِب آلآمي
وْحِضَنتِك حب وْمن كُبره تِعامت عن خَطاك العين
.
مَعَك هالمرحلة بالذات بميّزها عن أعوامي
بسمّيها العُمُر كِلّه وْ أعدّ البـاقيـات سنـيـن
.
وْلَنِّك جوهرة روحي وْ ريمة قلبي و إلهـامي
أبشكر عشرة من شهر صِدفتك فيه انا يالزين
.
علاقتنا قصيدة حب وَرقـها تَـعَّـب أقـلامي
وْلَوحتنا اللي ترسمها وْمزاجك ريشة التلوين
.
قصيدة كانت أو لَوحة أبي إتـخَلِّدها أيامي
عـلاقـة بْكلّ ما فيها تِعَبـِّر عن غلا قلبـيـن
.
ومضة شاعرية
يا هالرسالة واحنا في راس هالعام
من قلبي سيري وانتي ادري علي وين
.
ومن الغلا خطي قبل حبر الأقلام
كل عام وانت الحب يا ضي هالعين
.
ودعت بك عام واستقبل أعوام
وأنا عليك استودع الله في كل حين
الشاعر:أنور المشيري
قراءة ممتعة تحياتي للجميع
ميريام
اسم الموضوع : غلا قلبـيـن
|
المصدر : منتدى الشعر الشعبي
