هو انا غني علشان اشتري الرخيص

[LioN KinG]

هو انا غني علشان اشتري الرخيص ؟

قابلت زمان راجل كبير فى القطار وكان لابس جاكيت جلد قيم جدا بالرغم ان الراجل باين عليه انه عامل حرفي بسيط

فسألته: هو الجاكيت ده بكام يا بابا ؟
رد عليا: الفين جنيه
"انا مش فاكر الرقم بدقه علشان ده موقف قديم قوي"

المهم هو تقريبا قال 2000 جنيه وطبعا المبلغ ده فى جاكيت جلد فى الوقت ده مش رقم قليل خصوصا على راجل حرفي بسيط

فسألته تاني وانا مستغرب: الفين جنيه مش كتير ؟
رد وقالي: هو انا غني يابني علشان اشتري الرخيص ؟

وهنا طبعا حصل فى دماغي قفله !!
لاني كنت فاهم ان الغني بيشتري الغالي
والفقير بيشتري الرخيص

قالي الجاكيت ده بقاله معايا كام سنه ويعيش معايا لحد 10 سنين كمان وبكده السنه تقف عليا بحوالي 200 جنيه

وانا مش غني علشان اشتري جاكيت بـ 600 او 700 جنيه والسنه الجايه معرفش البسه ... اما الغني مش فارقه معاه وممكن مش هيلبس الطقم تاني حتى لو سليم

الراجل البسيط ده قال كلمه عظيمه قوي
وعلمني حكمه كبيره ومن يومها وانا ماشي عليها

خد بالك ...

انت مش غني علشان ...
تصرف فلوسك بشكل عشوائي ومن غير تركيز

انت مش غني ...
علشان تضيع وقتك بدون ما تحقق منه اعلى فائده

انت مش غني ...
علشان تضيع طاقتك بدون ما تحقق اعلى عائد منها

انت مش غني ...
علشان تضيع عمرك فى علاقات مش مفيده ولا مجزيه

انت مش غني ...
علشان تضيع فلوسك ومجهودك فى حاجه رخيصه

حتى لو انت لسه مش غني
بس على الاقل انت مش غبي
علشان تضيع ما تملك فى الرخيص

هو انا غني علشان اشتري الرخيص ؟

 

[روفي]

حكمة رائعة

اشكرك على الطرح الجميل

 

[سمارة]

شكرا على الموضوع الجميل
حكمة قيمة
جزاك الله خيرا