قصة جميلة ومؤثرة عن الصداقة( خالد وبندر )

[روفي]

السلام عليكم ورحمة الله وبركاته

أسعد الله صباحكم اهل الغابة وزوارها

قريت قصة لصديقين خالد وبندر
قصة رائعة وفيها عبرة مؤلمة
حبيت اشاركها معك اليوم وأتمنى تنال إعجابكم



قصة خالد وبندر

=====================================

(( الجزء الاول ))

(( خالد وبندر ))

الصداقه من اقوى العلاقات الانسانيه ، علاقه يميزها انها تجمع عدة مشاعر ..
قصتي تتكلم عن هالموضوع ، تقدرون تقولون انها تحمل مشاعر اكثر منها احداث
لكني قررت بعد تفكير طويل اني اعرضها للناس عشان يستفيدون منها .
احنا كمجتمع للرجال حدود الصداقه غالبا معروفه عندنا واغلبها تكون للوناسه والمصلحه ،
انا ما اقول الكل بس اكثرها لكن اللي صار معي شي ثاني
وهذي قصتي .. (( انا اسمي بندر ))
في عام 1408 هجريا ، كنا تونا منتقلين لمدينة الرياض والدراسه بدت من اسبوعين تقريبا
كنت في سنه رابعه ابتدائي دخلت فصلي الجديد وسوا الاستاذ تعارف بسيط بيني وبين الطلاب
ولما جا وقت الراحه طلع الجميع الا انا دخل ولد اسمراني شعره حوسه واسنانه الاربع الاماميه
اللي متكسر واللي طايح مشمر اكمامه ووجهه كله مخوش وحالته لله الا انه رغم كل هالبلاوي
فيه شيء يخليها مو باينه ..!!
قعد يحوس في شنطته ساعه وكل دقيقه يطلع خرابيط وكل شوي يرفع عينه عندي
واخيرا طلع منها نبيطه وقبل لا يطلع التفت علي وكان من النوع اللي كنه بينطحك
وهو يطالع منزل راسه شوي ومعبس طول الوقت بس كانت بريئه اكثر من ان تكون مرعبه !!
وقال بلدغه طفوليه سببها واضح وهو اسنانه اللي حالتها صعبه : انت الحين ليش جالس لحالك ؟
كانت هذي اول جمله سمعتها من الانسان اللي صار بعد كذا اغلى البشر على قلبي
كان معروف عني اني انطوائي ومنعزل هذي طبيعتي حتى اني اتوتر لما يكلمني احد ما اعرفه
رديت عليه : بس كذا انا ما ابي اطلع وبعدين انا ما اعرف احد هنا .. وبنفس النظرات اللي والله اعلم انها كانت
عاده عنده .. تعال معي وانا اعرفك على نص اللي بالمدرسه .. كان يجرني من يدي وانا اسحبها بخوف ..
لا لا .. انا كذا مرتاح قلت لك ما ابي اطلع .. لكن الولد اصر لين طلعني معه بالغصب . وزي ماقال
عرفني على نص المدرسه تقريبا لكن تبون الصدق حسيت اني تعلقت فيه هو ..!!
يمكن عشان شخصيته عكسي تماما اجتماعي وخفيف دم والكل يحبه ويحاول يتقرب منه
صحيح انه كان شيطاني ومشاغب لكنه ماكن يتعدى على احد حسيت اني مبهور بشخصيته
ورغم انه ذكي جدا الا انه فالدراسه ماكان بالحيل بس كان يعرف يمشي عمره من يومه صغير .
وعلى كثر الاولاد اللي يعرفهم الا انه بعد تعلق فيني فوق ما تتصورون صرنا مانتفارق ابد ولا يشوفون
واحد فينا بدون الثاني .. مرت السنوات وصداقتي تزداد قوتها مع خالد .. مرت علينا سنين الطفوله والمراهقه
وحنا سوى ودخلنا الجامعه وتخرجنا وحنا ماعمرنا تفارقنا .. حتى في السفر ما اذكر ان واحد سافر بدون الثاني
الا اذا كانت السفره مع الاهل .. اغلب الناس اللي يعرفونا يحاولون ياخذونا قدوه وكثير منهم يضربون المثل
في صداقتنا .. يمكن تتسائلون وش سر هالصداقه العميقه ؟؟!!
شي واحد كنا نطبقه بدون مانحس من يوم حنا صغار .. شي عجزت اغلب الناس انها تفهمه في تعاملها مع بعض
وهو ان كل واحد فينا كان متقبل الثاني بكل ما فيه من العيوب ولا عمر واحد فينا حاول يغير الثاني
ويمشيه على طريقته برغم الاختلاف الكبير اللي بينا .. خالد كان فيلسوف بالفطره وبسبب علاقاته الكثيره ..
وكنت اتعلم منه كثير لما اسأله كيف يقدر يجمع كل هالناس حوله كان يقول كلمات بسيطه
لكن تركت فيني اثر كبير كان يقول : اسمع يابندر الناس لها مشاكلها وكل واحد فهالدنيا صدقني منشغل في نفسه
ولا احد تهمه مشاكلك فأذا تبي الناس يحبونك انسى نفسك وفكر فيهم وكيف تساعدهم في حياتهم بقد ماتقدر
قصتي الاساسيه اللي ابيها توصلكم مو في كيفية صداقتنا لأني مهما شرحت ماراح اقدر اوصلكم مدى عمقها
لكن الحدث اللي قلب حياتي ولا اظن ترجع زي ماكنت في يوم الاربعاء جاني خالد للأستراحه اللي نجتمع فيها
مع الشباب والفرحه مبينه في عيونه وسحبني من بينهم .. تعال بندر ابيك في كلمة راس ..
لما صرنا برى .. عندي لك مفاجأة .. وابتسم .. انا ذاك الوقت اللي يشوف وجهي يقول خبل اناظر فيه وفاتح فمي
كمل كلامه ,, ابشرك الوالده خطبت لي .. في هالحظه حسيت كأن احد عطاني كف على وجهي ..
اييييييييييييييييييييييييييييييش ؟؟؟؟؟؟؟ !!!!!! طالعني بنفس طريقته يومه صغير واللي ماتغيرت ابدا
وراك تقولها كذا كنك مو مبسوط .. وبإرتباك رديت لا مبسوط بس انت فاجأتني وصدمتني صراحه !!
ماعمرك جبت طاري الزواج !!!!!!!!!!!! ضحك وهو يغمز .. عارف بس الوالده اقترحت علي الموضوع
وقلت لها مافي مانع توقعت ان السالفه كلام او عاى الاقل بتاخذ وقت بس ماشاء الله عليها يومين الا هي جيتني
تقول ترى لقينالك الظاهر انها حاطتها في بالها من زمان وبعدين ماعاد الا خير والا شرايك ؟!!
يعني للحين ماشفت البنت ياخالد ؟ افا عليك بس يابندر !! الحين اقولك توي داري وجيتك بسرعه
الوالده تقول انهم حددوا يوم الاثنين عشان اجيهم اشوفها .. تفاجأت . الله بهالسرعه ؟؟!!
خالد : مو اقولك شكل السالفه مطبوخه من قبل .. على كلا الله يوفقك ان شاء الله .. عقبالك يالرمت
( خالد لما كان صغير كان يحاول يناديني بكلمة الروميت الانجليزيه لكنه كان يقولها بهالطريقه وشت معنا كذا
صارت زي اللقب بيني وبينه ) اغتصبت ابتسامه .. لاوين تو الناس علي المهم الحين خلنا نرجع للشباب
لا يبدى التعليق .. وبتعجب ممزوج بغضب مصطنع رد خالد .. لحظه لحظه بندروه الحين اقولك خطبت
وزحمه ولاتعزمني على شي بهالمناسبه ؟؟!! على الاقل ودني لكوفي شوب ياخي !!
ضحكت .. لاياعمي الحين قهوه وبعد شوي الا احنا في واحد من هالمطاعم حقتك اللي فواتيرها تكسر الظهر
تراي اعرفك زين خلاص عشرة عمر .. رد .. والله انك قعيطي مستخسر فيني ؟؟
وقعدنا نضحك حطيت يدي على كتفه .. ولا يهمك باخالد اذا صار شي اكيد .. ابشر بذيك العشوه اللي يحبها قلبك
فالمطعم اللي تختاره وش تبي بعد ؟؟! كان ودي اعزمه بس النفسيه عدم .. رد بغمزه ماتقصر اصيل يابندر بس اهم شي لاتفشلنا مثل ذاك اليوم !! افشلك !! متى ياويلك من الله ؟؟!! عطاني نظره اللي مو مصدق ..
معقوله نسيت ذاك اليوم يوم يمدح لنا خوينا سامي ذاك المطعم قلنا لازم نجربه ونشوف ..
ولما تذكرت الموقف بديت اضحك اوووووووووووه الله يقلع شرك وش ذكرك بهالموقف الحين .. ابتسم خالد
ويده على وجهه تذكر ؟؟ يومها طلبنا عصير وطقيت الصدر يعني انت اللي بتدفع ويوم جا الحساب
جت معه المصيبه والله لو انك شليف وجهك يابندر يوم شفت الفاتوره تقول صابين عليك مويه بارده
.. انحرجت .. لا والله على الاقل احسن من اللي قعد يتفلسف ويسوي روحه ابو العريف ..
لا وتأشر بيدك بعد كننا في ملعب .. وبديت اقلد صوته ونظرته المعروفه .. لوسمحت الفاتوره مو لنا حنا
طلببنا عصير بس !! والله لونك شايف وجهك انت يوم يرد عليك .. نعم ياسيد
هذي فاتورة العصير بس الحين من اللي طلع فشل الثاني ؟؟!! ابتسمت .. اذكر مابقى في جيوبنا شي ماطلعناه
ويالله كفى ولقطنا وجيهنا وطلعنا وحنا نتصدد لا احد يشوفنا وطوال ماكنت اعيد القصه وخالد ميت من الضحك
كان يسعدنا ان حنا نعيد الذكريات اللي مثل هذي المهم رجعنا عند الشباب من بدأ موضوع الخطبه حسيت انه خلاص ماراح يرجع زي اول تضايقت مره بس ما ادري وش اللي فكرت فيه يعني مستحيل نقعد كذا بدون زواج للأبد كان واقع لازم ارضى فيه لما رجعنا داخل كان مستانس يلعب يضحك وينكت صحيح هذي عادته لكن اليوم كان بزياده اما انا كنت عكسه تماما حسيت اني بأفقد هالانسان الشخص الوحيد اللي اعتبره صديقي

 

[روفي]

قصة خالد وبندر


(( الجزء الثاني ))

يوم الاثنين العصر جاني للبيت !! خفت يكون صاير شي .. خير خالد عسى ماشر ..
وبتوتر واضح في صوته .. ابد والله احس اني متوتر شوي .. ابتسمت له .. يابن الحلال شده وتزول
زي غيرها .. ابتسم وقال : وشرايك تجي معي !! قعدت اطالعه ابي اتأكد انه جاد .. انت صاحي !!
وين اجي معك ؟؟!! خالد : طيب تعال وخلك بالسياره بس .. شديت على يده وحطيت عيني في عينه
وقلت : يابن الحلال رح لحالك وانا بستناك في بيتنا طيب !! كان يطقطق اصابعه .. ادع لي يالرمت ..
مايحتاج قول الله يوفقك ويسنع دربك ان شاء الله .. يالله عاد الحين رح وحلق وتكشخ تلقاك شهر مادخلت الحلاق
على هالوجه .. كنت احاول اضحكه لأنه واضح انه متوتر .. طيب اجي عندك عشان تشوف شكلي قبل اروح لهم
كتمت ضحكتي .. انا لله وانا واليه راجعون ؟؟!! انت وبعدين معك ياعمي اصلا البنت اول ماتشوف عيونك بتوافق
لاتشيل هم وتوكل على ربك .. الله يتسر ما ادري وش فيني خايف ياعمي ؟؟!! (( كلمة ياعمي معروف اني دايم
اقولها فاذا قالها خلود لي يعني خلك معي او افزع لي زي ماتقولون كانت كلمات بينا )) عادي كل العالم يتوترون
في هالموقف بس انت شد حيلك ولاتأخر على الجماعه طلع من عندي .. وبعد العشاء كنت انا اللي
ما ادري وش اسوي بعمري من التوتر وكل شوي ادق عليه لدرجة ان ريم اختي حاولت تهديني .. ماصارت يابندر
يمكن انت متوتر اكثر منه .. ياريم هذا خالد تعرفين يعني وشو خالد هذا اقرب لي من نفسي ..
والله عارفه بتعلمني فيكم بس اذكر الله وهدي الوضع شوي .. ما بقى عندي صبر وطلعت للشارع استناه ..
بعد حوالي الساعه شفت سيارته مقبله بسرعه جنونيه كالعاده لدرجة انه بغى يدخلني تحتها لولا اني بعدت
بسرعه .. نزل وشوي ويناقز من الفرحه .. وبرعب صرخت فيه .. خلووووووود !! انت خبل بغيت اروح تحت سيارتك
ناظرني نظرات جديده علي وابتسم .. سألته ها بشر ؟؟ لمني الرجال وعرفت انها دخلت مزاجه لدرجة انه ماعاد يدري
وينه فيه .. المشكله انه يتكلم ولا فهمت من اللي قال ولا حرف كنت اعرفه عاطفي بس ماتوقعت انه يتعلق لهالدرجه
وبهالسرعه فرحت له لما شفت كل هالسعاده فيه لكني بديت اتخيل وشلون بيصير حالنا بعد هالتغيير اللي
ماطرى على البال يمكن تستغربون ليش كنت متخوف كثير بس صدقوني لما يكون عندك انسان
موجه لك كل ذره في كيانه وكل فكره معك ولفتره طويله من عمرك وفجأه يجي من يشاركك في صدقوني
تتلخبط حياتك ولو كانت المشاركه بسيطه وشلون لو جا الانسان اللي بيصير منافس لك ؟؟!!
مو حب تملك لكنها عاده وغلا كبير .. قطع حبل افكاري خالد وهو يقول : على فكره بندر في شي ابي اقول لك اياه ..
وجهه وهو يقول هالكلام ذكرني بوجهه لما جايعلمني انه سرق شاهي وحليب من غرفة المدير واحنا صغار
قلت بأبتسامه وش مسوي بعد هالمره ؟؟ مسكني بيدي وجلسنا على رصيف بيتنا حسيت الموضوع
جد قال : صراحه يابندر انا ماقلت لهم اني ادخن ؟؟! لحظه قبل لاتقول شي اصلا هم ماسألوا الا اليوم وانحرجت
وقلت لهم لا ما ادخن خبرك خفت يرفضون .. افا ليش ياخالد تبدى حياتك بكذبه تافهه ؟؟!!
ومن قال لك انها كذبه ؟؟! اصلا انا نويت اني اوقف زقاير .. انا لما قال لي كذا ضحكت !! تذكرت السنين اللي
كنت احاول فيه انه يوقف وكيف انه حاول كم يوم ولاقدر وفالاخير لما اشوفه يعاني نستسلم ..
لكن من عيونه واضح انه كان مصر ومصمم هالمره على هالشي والله العالم .. بندر اكيد بيجون يوم ويسألونك
انت بالذات من بد الشباب عشان كذا حبيت اعطيك خبر .. مو شرط ياخالد بالعكس كثير ناس مايفضلون
يسألون الاصدقاء المقربين وطبعا واضح السبب لكن لو جاني احد وسألني عنك ماراح اكذب عليه بقوله
هالكلمتين يالرمت : خالد صديقي من سنين والف والنعم فيه بس انا متفق معه لما نتزوج محد يعطي
معلومات عن الثاني عشان الاحراج لان زي ما الواحد يقول الحسنات لازم يقول السيئات مافي كامل فهالدنيا
هذا زواج مو لعبه وحنا مانبي نضطر لهالشي بس اذا تبي العلم بأختصار لو طلبني اختي عطيته اياها
وهذا كل اللي عندي لما انتهيت من كلامي ربت على كتفي وقال : ريحت بالي ماخاب ظني فيك يالرمت
انا اشهد اني عرفت من اخاوي توادعنا وركب سيارته دخلت البيت وانا احس بضيقه شديده
صحيح دخلنا 26 ذاك الوقت يعني طبيعي اللي قاعد يصير لكن ما ادري وش اللي كان صاير معي كان يكلمني
كل يوم عن المستجدات اللي صارت ويسألني اذا كان احد جاني من اهل البنت وانا اقوله للحين ماشفت احد
وحتى لما نتقابل طول الوقت يتكلم فهالموضوع بيني وبينكم بديت اطفش صار كل كلامه عن زواجه لكن
اللي معجبني في هالسالفه كلها اصراره على ترك التدخين صحيح حالته كاسره خاطري يعني الصداع ماتركه
ابد وعيونه دايم حمر ونفسه في خشمه طول الوقت والربع كلهم يحطمونه يقولون اول ماتتزوج بترجع لاتتعب نفسك
بس في تقدم قعد اسبوع وشوي بدون ولا زقاره كان مصر على هالبنت ومايبي شي يوقف في طريقه
وخالد صديقي واعرفه زين اذا حط شي في باله يجيبه

 

[روفي]

(( الجزء الثالث ))

يوم الخميس زي عادتنا كنا مجتمعين انا والربع فالاستراحه وخالد للحين ماجا صار دايم يتأخر لكن عمره ماتركنا كنا جالسين بعضنا يلعب ورقه والباقين يسولفون انا كنت العب وسمعنا صفقة الباب اللي برى وبما ان خالد اللي ناقصنا عرفنا انه هو وبدى التعليق اللي يقول جانا العريس والثاني يقول الله يعينا عليه من اول ماوقف زقاير وهو نار شابه قلت لهم : كلش الا خويي عاد لحد يغلط عليه وانا موجود .. وقعدنا نضحك فتح باب الغرفه والتفت اسلم عليه ماحسيت الا واحد يرفعني من القلابي ويلزقني عالجدار بقوه لما حاولت اعرف من هو الا هو خالد كان معصب ويصرخ في وجهي ويدفع جسمي عالجدار بطريقه عنيفه كنت مصدوم واطالع فيه مو فاهم شاللي صاير حتى ربعنا يطالعون بتعجب ولما استوعبوا ان السالفه هوشه قاموا يفكون عني في هاللحظه انا للحين مابعد استوعبت الموقف بس يوم شفتهم يسحبونه عني حسيت انهم اوجعوه بديت ابعدهم معه واحاول احميه بيديني كنت خايف عليه وجسمه صار احمر من تسحيبهم الشديد وانا لهاللحظه ما ادري وش صاير لكنهم كانوا اكثر منا وقدروا يمسكون كل واحد في جهه .. سامي كان يسأل خالد بعصبيه : انت صاحي ؟!! وش جاك انهبلت ؟؟!! وش صاير ؟؟! ورد خالد بصوت انسان ثاني ماعرفه وياليته ماتكلم : اسأل هالجبان اللي قدامكم وش سوى لا تسألوني انا .. في هالوقت بديت استوعب الموقف .. خالد قدامي في حاله عمري ماشفته فيها معصب والكلام يطلع مقطع منه بسبب تنفسه السريع نظرته ماغيرها تطل من عيونه بس الحقد حل محل البراءه ؟؟ كان كل شوي يحاول يتخلص من يدينهم عشان يضربني !! تصورو !! بعد كل هالعمر وهالعشره يضربني انا بندر صديق عمرهورفيق دربه قلت له وانا احاول اقرب عنده اهديه : وش بلاك ياخالد انا وش سويت ياخوي ؟؟!! رجع يحاول يتهجم علي وابعدوني عنه بسرعه .. لاتقول ياخوي انا لاني اخوك ولا اتشرف اكون اخوك وبصوت تخالطه البحه من شدة الصراخ وهو يمسك راسه بين يدينه بعصبيه .. وبعدين لاتقول وش سويت ياحقير لاتنرفزني زياده .. خفت عليه كان يصارخ مايتكلم ويطلع كلامات زي السم .. لما ماتكون قد الكلام اللي تقوله لاتقعد تتفلسف علي يا اكبر كذاب .. قال سامي .. خالد وش هالكلام ؟؟!! كبر عقلك وخلنا نفهم القصه .. صرخ فيه .. انتم لاتتدخلون ورجع يطالعني وهو يضرب على صدره بقهر واضح .. انت ماشفتني اموت فاليوم عشرين مره وانا احاول بكل مافيني اني اوقف زقاير ليش تقولهم اني كنت ادخن ليش ؟؟!! كنت هاللحظه زي الغبي وعيوني بتطلع من مكانها رديت .. خالد انا قلت لك محد جاني ولا احد سألني .. كلامي زاد ثورته وقام يتحرك زي المجنون هذا اللي يبي يذبحني بندر لاتكذب لا تكذب مابي اسمع منك ولاكلمه صحيح انهم رفضوني بس مايهم البنت بدالها الف وبدت نبرة صوته تخف حدتها .. لكن انت ليش سويت كذا يابندر ليش ؟؟!! الكلام اللي قلت لي ذاك اليوم كان كله كذب وتمثيل ؟؟!! على الاقل ليش توعدني وتخلف لو قلت انك بتعلمهم كان تفهمت الموضوع انت حطيتني في اصعب موقف معقوله استخسرت السعاده اللي انا كنت عايشها ولا قدرت تستحمل فكرة اني ابعد عنك شوي !! معقوله يابندر انت من بد هالعالم كلهم تسوي فيني كذا هذا جزاي اني عزيتك ؟؟!! رجعت النبره العاليه .. ماتوقعتك كذا ابدا انت انسان اناني تعرف يعني ايش اناني ؟! حاولت اتمالك نفسي ورديت بصوت هادي قد ما اقدر ..بس لاتكمل لاتقول كلام تندم عليه بعدين ياخالد لاتظلمني وانا اخوك .. ضحك بسخريه .. اندم !! اندم على ايش والا ايش ؟! على العشره الحلوه اللي كانت بينا والا على 16 سنه اللي ضيعتها من حياتي على واحد مثلك والا عالانسان اللي توقعته صديقي وما طلع ... وقبل مايكمل كلمته هالمره انا اللي تخلصت من يدينهم وهجمت عليه ورميته عالارض ولما ثبته تحتي رفعت يدي لكنها وقفت وكل عضله فيني ترجف رجفه فظيعه لأن اللي تحتي كان خالد .. خالد الرفيق !! خالد الغالي !! يارب انا وش قاعد اسوي معقوله امد يدي عليه ؟! صرخت في وجهه اسمع ياخالد كل الكلام اللي قلته ممكن اتغاضى عنه عشان المعزه اللي لك بقلبي ولأني متأكد انه فيه سوء فهم فالموضوع امانها توصل فيك انك تقول اللي بيننا ماكان شي فهذا اللي ماراح اسمحلك تقوله فاهم ؟! خلص يدينه من يديني ودفعني من فوقه .. اقول ابعد عني بس .. وقف وانا للحين على الارض .. اسمع يابندر هي كلمه ورد غطاها ماعاد ابي اشوفك ولا عاد ابي اسمع صوتك او حتى طاريك وكل اللي كان بيننا اليوم انتهى .. الانسان المخادع اللي مايقدر الصداقه ماله مكان في حياتي ابد واذا كنت سويت هالحركه خايف انك تفقد جزء مني ياطفل ابيك تدري اللحين انك فقدتني للأبد طلع من الاستراحه بنفس الحال اللي دخل فيه واشرت لسامي وانا احس بأرهاق شديد : اطلع معه الله يعافيك لايسوق السياره وهو على هالحال بعد هو مب ناقص جنون فالسواقه .. لكنه رجع بعد دقايق يقول انه ماقدر يلحقه انتشر الهدوء بعد طلعة خالد وكانوا كلهم يطالعوني موعارفين وش يقولون كانوا مصدومين مثلي واكثر وقفت ويدي على قلبي حسيت اني مخنوق وانا احاول استجمع القوه اللي باقيه فيني قلت : عذرا ياشباب متأسف على الفصل البايخ اللي صار قبل شوي يالله انا ماشي .. سألني سامي بتردد واضح : لحظه قبل ماتمشي يابندر صحيح الكلام اللي قاله خالد ؟! هزيت راسي بأسي وانا امسك دموعي اللي غصتها شيمة الرجال وبابتسامه رد : ليش استغرب منكم انكم تصدقون هالكلام فيني اذا كان خالد خوي الروح قدر يصدقه ؟!! مع السلامه وطلعت لحقني سامي .. خلني اوصلك للبيت يابندر تراك على طريقي .. شكله حاس بتأنيب ضمير وراحمني وهذا اللي ما احبه رديت لامشكور انا بخير لاتشغل بالك .. وركبت السياره ومشيت .. فالبيت الوالده وريم كانوا فالصاله لما دخلت واستغربوا رجوعي بدري بعد السلام سألت الوالده بأهتمام : بندر يمه وش فيك ؟! ريم قالت شي زاد الالم اللي في قلبي : عسى ماشر يابندر خالد فيه شي ؟؟؟ حاولت امثل اني معصب .. انت ماتفهمين ؟؟!! كم مره اقولك ياريم لاتتفاولين على العالم .. ياجماعه كل اللي صار ان احنا تفرقنا بدري الليله عادي وشفيكم ؟! قالت الوالده .. ياولدي وجهك متغير انا امك واحس فيك قلي يا امي من اللي مضيق صدرك ؟؟!! قالت ريم : لايكون متطاقق مع واحد من العيال ؟؟ قالت امي وش دعوى ما تعودنا منك ياوليدي هالحركات ؟؟!! كنت عارف ان شكل ثيابي يدل على اني توي طالع من هوشه .. قلت لهم ريحوا بالكم تهاوشت مع واحد من الشباب بس جت سليمه خلاص عاد فكوني قالت ريم : اكيد بتجي سليمه اذا كان خلود المرعب ابو المشاكل هو اللي دايم يفزع معك المفروض محد يقرب يمك هزت راسها كنها تذكرت شيء مو حلو .. يمه منه ذاك الولد شراني ياكثر ما صيحني وحسرني وحنا صغار تذكرين يمه ذيك الايام ؟! ابتسمت امي .. اول سنتين من نقلتنا للرياض ماكنت اربط شعرك دايم تجيني تصيحين من تمعيطه لشعرك .. قالت ريم .. وتضحكين بعد يمه المشلكه ان ولدك ذا كان يطقني معه ما كني اخته الحمدلله والشكر .. قالت امي : صحيح ان خالد كان شيطان وهو صغير بس والله ان الولد والنعم فيه شوفي وش صار الحين .. المني كلامها زياده بس سويت الوضع عادي ووجهت كلامي لريم .. وانت وش وتبين ماعندك الا خالد وخالد ؟! بعدين تستاهلين رازه وجهك عند العيال فالشارع دايم وهو معتبرك اخته .. حسيت اني احرجتها وردت .. انا والا انت اللي ماعندك الا خالد ؟؟!! قطعت الحوار ورحت لغرفتي ..

 

[روفي]

(( الجزء الرابع ))


قعدت في فراشي استرجع اللي صار معقوله خالد يسوي معي كذا ويقول عني هالكلام .. وبدون حتى مايفكر وقدام هالعالم كلهم ؟؟!! لاكيد انا احلم اصلا اللي شفته اليوم انسان ما اعرفه !! ورغم الاهانه اللي كنت احس فيها والجرح اللي في قلبي الا اني دست على مشاعري ورحت ادق عليه لازم افهم وش اللي مضايقه لهالدرجه ليش ؟؟ لانه مو اي واحد لكنه للأسف عطاني مشغول بعدين قفل جواله !! جلست في بيتنا ثلاث ايام لارحت الاستراحه كالعاده ولا استقبلت مكالمات من احد حتى اهلي مستغربين لكن لان طبعي كتوم ماقدروا يعرفون اي شي كانت هذي اول ثلاث ايام ما اشوف خالد فيها واحنا في نفس المكان مرت علي كنها ثلاث سنوات ورغم اللي سواه معي الا انه وحشني حيل واشتقتله ذاك الشوق اللي تحسه يوجعك مو بس نفسي الا تحس شيء يألمك من جد اذا فاهميني !! لكنه الله يسامحه ماحاول يعطيني اي فرصه عشان اتصل عليه .. اتصلوا الشباب من الاستراحه وكانوا حاطينه على السبيكر وسلموا علي وسألوا عن احوالي عاد واحد منهم اسمه ماجد قال : وينك من زمان عنك يارجال كبر راسك علينا والا عشان خويلد ماعاد يجي صرت انت بعد ماتجي ؟! سمعت كان احد ضربه وسكته المهم قلت : معليش ياشباب انا هاليومين ما اعتقد اني بجي للأستراحه مالي نفس سامحوني .. قال سامي : وشرايك نجيك للبيت اذا ماعندك مانع ؟! .. استغربت بس رديت .. بالعكس حياكم الله اي وقت البيت بيتكم ... خلاص اذا شفنا يوم مناسب بندق عليك .. خير ان شاء الله الله يحييكم اي وقت .. مع السلامه .. بعد شوي دق خالد !!!!!!!!!!! معقوله ماني مصدق عيوني وش القصه ؟! قعدت ساعه اطالع الاسم ابي اتأكد انه فعلا هو لكن للأسف سويت شي بظل ندمان عليه طول عمري عطيته مشغول وقفلت الجوال .. ليش سويت كذا ما ادري اظن انها كانت ردة فعل طبيعيه بعد اللي صار لي معه وما اعتقد احد يلومني يمكن ابي ارد له اللي سواه او كنت عارف لو رديت انه بيكون لي فضل عليه وهذا اللي ما ابيه المهم هذا اللي صار لكن الوضع استمر صار يدق علي وانا ما ارد كنت اعاند قلبي قبل لا اعانده هو صار يرسل مسجات يترجاني فيها اني ارد لكن اللي فهمته من بعض المسجات انه يبيني اسامحه لأنه اكتشف انه غلط بحقي ومن هالكلام اللي خلى عنادي يزيد بعد يومين دق علي طلال اخو خالد الكبير هو بعد صديق عزيز يجلس معنا من فتره لفتره فالاستراحه وكنت اغليه من غلى اخوه واحترمه كثير ولا قدرت اصفطه رغم اني عارف سبب المكالمه ورديت : مرحبا طلال .. هلا وغلا وش اخبارك وعلومك يابندر ؟ ابد والله تمام .. انت اخبارك واخبار الاهل ؟ تسلم كلهم تمام .. بندر ياخوي !! سم ؟ سم الله عدوك انا داق عليك عشان موضوع خالد انا عارف انك ماتبي احد يتدخل فالموضوع حتى خالد مو راضي يتكلم انا عرفت من الشباب وفكرت كثير قبل لاكلمك لكني ماقدرت اشوف حالة اخوي كذا واصفط يديني الصراحه من ذاك اليوم وهو مو خالد اللي نعرفه لايروح ولايجي ماعاد يسولف ولايضحك حتى الاكل دايم مايشتهي !! والوالده ضايق صدرها عليه تحسب انه زعلان على البنت وتقول : لأخواني وين بندر عنه محد بيوسع صدره الا هو !! صار طول الوقت في غرفته خاصه لما عرف انه مالك يد فاللي صار وليتها جت على كذا خالد رجع يدخن بعد هالمره بشكل يخوف يابندر .. قلبي انقبض بس رديت : والله ياطلال انا مقدر موقفك وخوفك على اخوك واعرف ان قلوبكم على بعض دايم وصدقني اخر شي اتمناه ان خالتي ما يضيق صدرها وانت عارف زين اني اعتبرها امي الثانيه لكن انا ماغلطت معه ابد هو اللي جاني ونسف كل شي حلو كان بيننا في لحظة غضب .. طيب ماتبي تعرف وش القصه وليش خالد سوى معك كذا ؟ مهما كانت القصه ماتعطيه الحق انه يسوي اللي سواه ترانا ماعدنا صغار وانا اخوك بالله هذي طريقه يعاملني فيها ؟؟!! والله اني ماشفته يسوي كذا مع الناس اللي كان يتهاوش معهم وهو مراهق خالد قدر يقول عني كلام يجرح بدون مايراعي اي شي ويصدق فيني كذبه بدون حتى ما يعطيني فرصه ادافع عن نفسي .. تنهد طلال .. ياخوك اللي صار ان اهل البنت قبل لا نحدد الملكه رفضوا فجأه يقولون انهم عرفوا انه يدخن او على الاقل كان يدخن ولاعندهم استعداد انهم يجازفون ومن ضمن الكلام فهمنا ان اللي قالهم بندر وانجن خالد لما سمع اسمك كان مصدوم وقعد يصارخ يقول كيف يسوي فيني كذا وهو وعدني ؟! وطلع وصار اللي صار لكن اللي فهمناه بعدين انه طلع بندر ولد جيرانا بس تبي الصراحه ما احد من اخواني جا على باله كلنا رحنا لك على طول لما سمعنا الاسم ضحكت بتعجب وانا اقول في قلبي هذا الشي التافه هو اللي خلاك تظلم خويك ياخالد ؟؟!! رديت على طلال : والله هذا مو ذنبي ولاهو عذر للي سواه معي خالد طلمني وكسر في داخلي شي عمره مايتصلح والله انه غالي وانا مسامحه ياطلال ولا ابي شي منه بس صدقني ما اقدر .. وحسيت اني ماعاد اقدر اكمل .. بنبره هادئه رد طلال : على كلا انا حبيت افهمك اللي صار وانتم رجال وفاهمين وش تسوون وانا ما اقدر الومك على شي بس هذا اخوي يابندر ولازم احاول اسوي اي شي .. اعذرني ياطلال ياليتك جيتني في شي ثاني والله رقبتي سداده .. اصيل ماتقصر يابندر اشوفك على خير .. مع السلامه .. لما عرفت التفاصيل ضاق خلقي زياده كنت اتمنى ان الموضوع يكون اكبر يعني معقوله يسوي كل ذاك الفصل عشان تشابه اسماء ؟! شي يحز فالخاطر صراحه صحيح ان خالد معروف عنه انه عصبي ولايقدر يضبط نفسه بس هالكلام المفروض ماينطبق علي .. على الاقل مو بهالطريقه اللي صارت !! بأختصار حسيت اني مثلي مثل غيري بالنسبه لخالد .. فاليوم الثاني جت الوالده تصحيني الساعه 10 الصبح .. يمه بندر اصحى خالد عند الباب .. كنت متوقع ان هالشي بيصير وحاسب حسابه .. قوليله نايم .. قلتلها وانا اغطي راسي بالبطانيه .. حاولت تسحبها من فوقي .. يوه اقولك خالد عند الباب وش بلاك ياولدي .. على صوتي شوي .. عارف انه خالد سمعتك من المره الاولى وانا اقولك نايم ... تعجبت الوالده من تصرفي لأني اول مره اسويها لكني ماعطيتها فرصه عشان تستفسر طلعت من غرفتي وانا نطيت من فراشي للشباك على طول وكنت اشوف سيارته لكن ماقدرت اشوفه حاولت منا ومنا مافي مجال صار يمر على بيتنا يوميا الظهر والليل وانا اتهرب منه واصرفه ولا عمري طلغت له ودروا اهلي ان بيني وبينه شي اصلا واضح مايبي لها ذكاء اما جوالي صار مايسكت سواء مكالمات من خالد او من الناس اللي يحاولون يصلحون بيننا ومسجات طول الوقت حتى اذا قفلته وفتحت الثاني او سوا كان يدق عليهم على طول ما ادري العب على مين هذا خالد اللي يعرفني زين ويعرف كل ارقامي وحتى لو كان عندي رقم محد يعرفه فهالكلام ماينطبق عليه

 

[روفي]

(( الجزء الخامس ))

ذاك اليوم اشتقت له ورجعت بي الذكريات لأيام الابتدائي وياكثر المواقف اللي حصلت لنا لأن اللي يصادق واحد مثل خالد تتحول حياته لمغامره .. مره في الصف السادس اذا ماخاب ظني كان الاستاذ مسوي مسابقه اللي يفوز بيصير " العريف " اللي ينظم الفصل اذا ماكان الاستاذ موجود ..!! والله ايام وحشتني .. المهم انا كنت ميت عشان اصير العريف اجي بدري واشارك وصاير مؤدب " ثقيل دم على قولة خالد " كان مايحب الاشخاص اللي مثلي يهتمون بالدراسه ويحبون المدرسين او يتمصلحون عندهم على قولته بس سبحان اللي جمعنا مع بعض كان يقول .. ليش تبي تصير عريف ؟؟!! ترى العيال بيكرهونك .. ما اهتميت لكلامه ورديت .. ابي اصير كيفي !! بعدين ياغبي بخليك تطلع وتدخل على كيفك .. لامو لازم انا اسوى اللي ابي حتى لو ماكنت انت العريف .. المهم قبل لايختار الاستاذ بيومين شريت بلونات وجبتها للمدرسه .. خالد كان مريض وغايب بس انا والشله رحنا ومليناها مويه واول ما انتهى الدوام رميناها من فوق وانحشنا .. يمكن بتقولون وين الولد المؤدب لكن انا بعد خالد صارت تجيني طلعات توقعت الموضوع محد بيدري عنه لكن من بكره اول ماجيت الصبح قالوا لي العيال ان الاستاذ يسأل عن اللي جاب البالونات وسوى الحركه اللي امس هنا انا قلت على العريف السلام هالاستاذ مايصدق رحت لخالد اللي متجمعين عليه كل العيال بما انه كان غايب امس علمته باللي صاير وهو يدري انا وش سويت امس لأني قلتله السالفه واحنا جايين للمدرسه قال خلاص ولايهمك انا اتفاهم مع الاستاذ كنت اعتمد عليه كثير لما بدت الحصه دخل الاستاذ وبنبره كانت تخلينا ننتفض .. اللي رمى البالونات امس يوقف .. محد رد فالبدايه كان ماسك مسطره وش كبرها الله يسامحه .. شوفوا لو ماتكلمتوا بعاقب الفصل كله .. ناظرت بخالد وانا بموت من الروعه ابتسم وغمزلي بعدين وقف .. انا يا استاذ .. قالها كنه محرر القدس !! قرب الاستاذ من عنده وسحب اذنه .. والله اني عارف انه مافي غيرك ياخالد يسوي هالحركات .. انت متى بتعقل ليش ماتصير مثل اخوانك او مثل صديقك بندر جننتني معك ياولد !! الصراحه ماتوقعت ان خالد بيتحمل الليصار بدالي ؟؟!! فعلا كنت مستغرب والدليل اني قاعد اتفرج وهو يتعاقب وانا ساكت !!طبعا الاستاذ كسر المسطره على يدينه ياحرام وانا احس ان عقلي بيطير من المنظر بعدين وداه للمدير .. في نفس الحصه اختارني الاستاذ عريف وطبعا ما تهنيت فالخبر لأني ما ادري وش صاير مع خالد ذاك الوقت .. لما انتهت الحصه كان واقف قدام غرفة المشرف وحوله بعض الاولاد يوم شافني ركض ولمني .. احلى اخيرا وصلت اللي تبي مع وجهك .. انا ما كنت اقدر اتكلم اشوف يدينه حمر من الطق ويفركها على جسمه ووجهه الاسمر تخالطه حمره بسبب المرض وهو يضحك .. قلت انا متنرفز يمكن من الاحراج خالد ليش سويت كذا انا ماقلت لك قاطعني ..يابن الناس يعني اول مره انطق خلاص مشها يالله لازم نحتفل اليوم من بعد اللي صار عمرنا ماتكلمنا عن هالسالفه شكله نساها او ما اعتبرها شيء بس عمري مانسيت صحيح اننا كنا صغار فزعته هذي لايمكن انساها هالذكريات شوقتني له ورحت اتفرج على صورنا وعلى اشرطة الفيديو .. عجبني كيف كنا مره قريبين من بعض ولا في مكان يطلع في واحد الا الثاني جنبه اغلب الاشرطه ماقد شفتها من قبل كانو حوالي العشرين شريط شي لسفراتنا وشي لطلعات البر وكلها شفتها في يوم واحد ورى بعض اكتشفت اني طول الوقت اطالع في هو حتىفالصور عيني عليه بس وطوال وقت عرض الاشرطه وانا اضحك عليه كان بطبعه خفيف دم محد فهالدنيا يخليني ابتسم او اضحك او حتى يجنني مثل ما يسوي .. واحد من الاشرطه كان فيه مقطع اثر فيني كثير كنا مخيمين فالصمان واحد من الشباب يصور ومعه خالد مروا على اغلب الشباب اللي ينصبون الخيام واللي ينزلون الاغراض وخالد كان ماخذ دور المقدم عشان يتهرب من الشغل كالعاده هو واللي معه وقعد يسوي مقابلات معاهم ويستهبل عليهم وانا اضحك طول الوقت على طريقة كلامه وتعليقاته لما جا دوري كنت قاعد اشب الفحم ومعطيه ظهري قرب مني .. عاد جينا الحين لأغلى انسان .. كنت مشغول باللي معي .. هلا هلا خلود مسوي فيها مذيع يعني ؟؟!! ماودك تساعدني بدال هالخرابيط ازعجت العالم ياعمي .. كان يوجه كلامه للكاميرا وحاط يده على ظهري وانا مو معطيه وجه .. هالولد اللي تشوفونه عرفته من يوم احنا صغار عزيز وغالي علي ولا ابدله بكنوز الارض .. قاله اللي يصور : ما اقدر انا على هالكلام !! يابعدي هاللي انت كاشخ فيه وتمدحه من الصبح حتى ماعطاك وجه وانت تتكلم .. طالعني بنظرات ما انتبهت لها ذاك الوقت كانت تحمل معاني حلوه .. كمل كلامه .. والله لو ايش يصير مايتغير شي من غلاه ..تجمعت الدموع وانا اسمع كلامه مع اني ذاك الوقت واضح اني ما انتبهت لأي كلمه جتني مشاعر متضاربه كنت اقول في نفسي " كلام رائع لكن ماطبقته ياخالد باللي سويته فيني " سكرت الفيديو ورحت انام او بالاصح احاول انام يوم الثلاثاء رجعت للبيت متأخر ولما وصلت عند الباب شفت سيارته .. كان يستنى داخلها والله وحده اللي يدري من متى وعلى مايبدو لي من طريقة قعدته وتكتيفه يدينه انه نايم لأن راسه مايل على جنب بس شكله متغير مره !! اول شي لحيته بدت تطلع شعره تركه يطول بدون مايرتبه وهذي مو عادته ابد .. واضح ان جسمه ضعف يعني كأنه واحد توه طالع من السجن .. وقفت سيارتي لكنه ماحس ما ادري وش اللي خلاني اصفق باب سيارتي بقوه عشان ينتبه .. يمكن ماكنت ابغى انتظاره يطول فز من نومته ونزل بسرعه ناداني وصوته تخالطه بحه واضحه وخالد من النوع اللي صوته يروح بسرعه اذا صارخ او اذا صار مريض حسيت بتعبه لكني ما التفت له وسويت روحي ما اسمع ودخلت للبيت الرجال قعد يطق الباب زي المجنون لدرجة اني خفت يصحي الجيران ويفضحنا قدام العالم وانا واقف عنده من داخل منزل راسي واسمعه .. افتح يابندر خلني اكلمك الله يعافيك لاتسوي فيني كذا يابندر كان كل مره ينادي فيها بأسمي بصوته اللي مره تسمع الكلمه ومره ماتسمعها اتألم بس من جد ما ادري وش قوة القلب اللي جت فجأة وخلتني اتماسك ولا اطلع له كل ما مر الوقت زاد عنادي بعد فتره سمعت صوت جسمه ينسحب على بابنا كنه يقعد فالارض رحت اركض بافتح الباب خفت انه صار له شيء لكن سمعت صوته يكلم نفسه لأنه توقع اني دخلت داخل خلاص .. سامحني يا بندر انا اسف والله اسف .. وانا اسمعه كنت كني اسمع اعتذار من طفل متأكد ان اللي قدامه ماراح يسامحه جلست على الارض وحطيت راسي بين يديني وسندت ظهري للباب من داخل وانا افكر في نفسي " معقوله اللي قاعد يصير معنا يارب ؟؟!! " والله دنيا غريبه وجلسنا ساكتين بعد فتره سمعته يتحرك ويركب سيارته بعد يومين جاني واحد من ربع الثانويه اسمه نواف كانت علاقته قويه مع خالد والى اللحين وهو ربع بس هو مو من شلة الاستراحه ابتسمت اول ماشفته تذكرت على طول هباله هو وخالد ايام كانوا يرقصون سامري فالصف كانوا اجرأ اثنين وكيف جتهم تهزيئه من المدير خلتهم ينسون الرقص كله وسبحان الله وشلون تغير هالنواف وصار شيء ثاني رغم ان خالد لازال على جنونه .. ماقال شيء عن الموضوع لكن جيته صدقوني كان لها اثر في نفسي ذكرتني بأشياء كثيره واظن ان هذا مقصده من الزياره ...

 

[روفي]

===================

(( الجزء السادس ))

جاني مسج من خالد فاليوم اللي بعده وكان مقطع من اغنيه تعجبنا زدايم نرددها
يقول المسج :ماجيت ابسأل جروح اوسبة غيابي .. المشكله اعرفك اكثر من اسرارك
واكثر من جروح قلبي ورقة اعتابي .. قلي بعد هالفراق وش اخر اخبارك ؟؟
المسج اثر فيني لأن خالد مو راعي مسجات ولايعترف فيها رجعت بي الذكرى لأيامنا الحلوه وقررت ارسل له مسج كرد من نفس هالاغنيه بعد بتعديل بسيط مني
المسج : ماهي غريبه اذوق وانطفي بنارك .. ولاهي بعيده اشوف الجرح باحبابي
حاولت انسى ولكن ضاعت اعذارك .. مادام جرحك (( يالرمت )) مكتوب بكتابي !!
يوم الخميس اتصل سامي : هلا بندر .. فرحت بمكالمته ذكرتني بالجمعات فالاستراحه .. هلا سامي وش اخبارك .. تسلم وش دعوى يارجال وين الناس اشتقنالك .. تشتاقلك العافيه ياخوي .. فاضي اليوم نمرك انا والشباب بين عشوين ؟ .. الساعه المباركه حياكم الله والله ودي بشوفتكم .. اجل نشوفك اليوم ان شاء الله .. لاتطولون صلوا في مسجدنا مع السلامه .. جوالشباب على موعدهم على انهم ماصلوا عندنا ورحت افتح لهم ماشاء الله كان الكل جاي ما ادري وش الغلا اللي جالي فجأه ولما اكتملت المجموعه وانا ارحب فيهم قبل لا اسكر الباب دفعه واحد فتحته بسرعه وقبل ما اشوف مين قلت .. السموحه ماشفتك يا .. كان خالد !! ماعرفت وش المفروض تكون ردة فعلي لما تلاقت عيوننا بعد كل هالغيبه حسيت كني بطير من الفرحه في داخلي وانا احاول بكل ما اقدر اني اخفيها واني ما انط عليه واحضنه ابتسم ذيك الابتسامه الحلوه واللي وحشتني حيل وهو زي ماتقولون كنه واحد غرقان ورد النفس .. فتح يدينه عشان يلمني لكني بكل جمود مديت يدي وصافحته بدون اي كلمه !! قبل لايصير في خاطركم شي علي تذكروا اللي سواه فيني وش ممكن تكون ردة فعل اي احد فيكم فالاخير احنا بشر ولنا مشاعرنا وانفعالاتنا اللي مو دايم لها تفسير ولا نقدر نتحكم فيها مهما كانت مكانة الشخص بالنسبه لنا.. الشباب سبقونا للمجلس اصلا كان واضح القصد من هالزياره اكيد خالد هو اللي جابهم كلهم توجهت للمجلس لكنه سحبني من ذراعي ناحيته بقوه وبصوت هامس يحمل كل معاني الندم والرجاء .. معقوله ماوحشتك ..؟؟!! مارديت عليه وكمل كلامه .. لمتى يابندر بتظل تتجاهلني كلمني رد علي هزئني او حتى اضربني انا راضي واستاهل لكن لاتسوي فيني كذا حرام عليك والله اني تعبان وفهمت غلطتي وعارف اني ما اقدر اعوضك لكن هالعقاب والله فوق طاقتي يكفيني يابندر انت بالذات تدري اني مالي غنى عنك .. كان قلبي يقول لي ياخي خذه بحضنك وانسوا كل هالالم لكن الله يلعن ابليس العناد والكبرياء سيطروا علي والموقف اللي صار فالاستراحه بين عيوني قلت بكل برود وانا ابعد يدينه عني بهدوء جعل يدي تنقص قبل يجي اليوم اللي تنمد فيها عليك ماضربتك وحنا صغار تبيني امدها الحين ؟! كانت نغزه على حركة الاستراحه .. يالله الشباب ينتظرون داخل .. نزل راسه بأنكسار ودخلنا واضح انهم كانوا يحاولون يلقطون شي من الحوار اللي دار بيننا لكن اول مادخلت كل واحد التفت على الثاني وسوى روحه متعمق في سالفته بديت اصب القهوه ومسك خالد الدله الثانيه كانت هذي عادتنا لما يزورني احد دايم نفزع لبعض بس هالمره ماكنت ابي اي مساعده منه واللي زاد قهري ان خالد باللي صار خلانا فرجه لخلق الله ومحل شفقة الجميع وهذا اللي ماكنت استحمله .. قلت لماجد اول واحد بصب له بصوت واطي وانا اضغط على اسناني .. رح قله يترك الدله ومشكور مابي منه شي .. كملت صب وسمعت ماجد يقول لخالد اللي بدى يصب من الجهه الثانيه : هات الدله عنك . لا استرح تسلم انا ابي اصب مع رفيقي .. وشدد على اخر كلمه يبيني اسمع لكن بمزحه بايخه وقاسيه في نفس الوقت يرد ماجد : هذا اول يالحبيب زين انه سمحلك تدخل لبيته معانا هات عنك بس وقعد يضحك .. حسيت انه جرحه وتعمد يهينه ولولا اني حكمت عقلي ذيك اللحظه وتذكرت انه في بيتي كان صفقت وجهه بالدله اللي معي .. صحيح ان ماجد كان معروف عنه انه انسان فظ وعربجي ومزحه زي وجهه ولايثمن كلمته او حتى يفكر فيها قبل لايقولها لكن لوفي ظروف غير هذي الله العالم وش كنت بسوي فيه .. هذا اذا ما ادبته اول مايطلع خالد ادري انكم تقولون طيب هذا اللي انت تسويه مع خالد بس ما ادري اذا قدجاكم هالشعور انه ممكن اجرح او ازعل انسان غالي علي بس لو احد ثاني حاول يفور دمي واعصب !! المهم سويت روحي ماسمعت وكملنا صب .. جلسنا .. اللي يسولف واللي يضحك كنه ماصار شي الا انا وخالد كنت امر بعيوني عنده كل شوي ولأني افهمه من عيونه وبدون اي كلمه عرفت انه ينتظر الشباب يمشون .. اذن العشاء وقاموا الجماعه الا خالد وكنت متوقع هالشي بعد ودعتهم وشكرتهم على الزياره وعند الباب قال لي سامي بيني وبينه : والله انكم مفضوحين الغلا واضح بينكم حتى لوحاولتوا تبينون العكس والله الله في خالد وانت عارف اكثر مني انه مافي مثله انت العاقل ولاتغلط غلطته انتم بدون بعض اسمحلي ماتسوون شي ولاتخلون شي تافه يهدم احلى صداقه شفتها في حياتي اصلا والله يابندر انه يحز في نفسي اني اوصيك عليه وانتم اللي من اول نخاف نقول شي عن واحد منكم قدام الثاني .. شكرته وقلت : قلبي ياسامي مايزعل وانت تعرف خاصه على خالد بس الامور احيانا تطلع من يد الواحد والله يخليك لاتفتح معي الموضوع مره ثانيه تراه علي اصعب مما تتخيلون .. مع السلامه .. ودعته ولما التفت لقيت خالد واقف عند الباب الداخلي ينتظرني قربت عنده بدون اي كلمه وكتفت يديني بدى بالكلام على طول .. بندر سامحني ياخوك ترى كل هاللي قاعد يصير ماله داعي انا تهورت وقلت كلام ماكان لازم اقوله وجيت اليوم اعتذر لك واحب راسك بعد تكفى خل عنك العناد وريح بالي ترى ماصارت المسامح كريم يالغالي .. سكت فتره اول مره اسمع تكفى منه كانت طالعه قويه منه لكني حاولت اختار كلماتي قبل لاقوله شي .. اسف ياخالد صدقني ما اقدر انت حطمت كل الاشياء الحلوه لك في داخلي بعد ماسمعتني ذاك الكلام والانسيت ؟! اذا انت نسيت تراي اذكر كل كلمه قلتها وتردد في بالي كل يوم ذاك الكلام اللي زي السم واتهمتني باطل بعد بدون ماتحسب لصداقتنا اي حساب . ياخالد انا للحين احس اني في حلم مو قادر اصدق اللي صار انت من بد كل هالعالم تبيعني انا في لحظه ؟! ماكان العشم والله وبصوت مليان الم .. يعني ايش يابندر 16 سنه صداقه معقول ماقدرت تلقى لي لحظه وحده تشفع لي عندك وتخليك تسامحني ؟؟!! بعد كلامه انهمرت الذكريات من كل جهه لكني حاولت اتجاهلها بكل ما اقدر وانفجرت .. اسأل نفسك قبل لما اهنتني قدام البشريه بدون ماتعطيني حتى فرصه اني ادافع عن نفسي انت ياخالد حتى ما حاولت انكتظن فيني خير وبعتني بسهوله نسيت كل شي ياخلود نسيت اللي اذا ضاقت بك الدنيا يصير لك الدار ويضيق خلقه لين تنفرج عليك ونسيت اللي صانك وحفظ اسرارك طول عمره نسيت اللي مايرضى احد يغلط عليك وانت بكل بساطه تجرحه وتظلمه وتجرحه قدام الكل ياليتك قدرت معزتي ومحبتي الكبيره لك حركت يديني بعصبيه ياخساره ياخالد انا بس ابي اعرف ذنبي قلي ليش سويت معي كذا ؟؟!! عمري غلطت عليك بكلمه ؟ او حتى ضيقت خاطرك بحركه ؟ تجرحني بهالسهوله ليه؟ علمني ياخالد لاتوقف ساكت تكلم ياخوك ؟؟! المشكله هنا ان الغلطه جت من غالي وهذا اللي يخليني ما اقدر امشيها .. عضيت على شفتي وانا اشوف ملامحه تتغير .. تجاهلته وكملت تدري وفر علي كل الكلام اللي بتقوله لأنه ماعاد ينفع شي الحين اللي انكسر مايتصلح ماعاد لك بقلبي مكان ليتني ماعرفتك ياخالد .. كنت اقول هالكلام عشان ارد له اللي صار فالاستراحه وداخلي يصرخ .. يامكبر كذبتك يابندر انت لو احد سألك وش دنيتك مايجي في بالك الا اهلك وخالد سكتنا شوي وخالد يهز راسه وعيونه تتلامع والف صوت في داخلي يقول له : تراي مثلك يالغالي عزيز وداخلي منهار وعشان انهي هالمشهد الحزين قبل لا اضعف قدامه قلت : في بيت شعر سمعته مره وما اظن ان معناه وصل لي او يمكن المشاعر اللي وصفها الا اليوم :
الجرح لاجا من اغراب عادي .. بس الجرح موت الجرح لاجا من احباب
لاجا من احباب ياخالد وانت ياخوي ماقصرت كفيت ووفيت معي فهمتني البيت بطريقه ما اظن الا متأكد ان ما احد يقدر يوصلها مثلك ماودي اقول اني نادم على الماضي لأني فعلا ماندمت لكنك خيبت ظني فيك رفع راسه وقرب يده من اذنه من قسوة الكلام اللي سمعه .. كافي يابندر كافي انا عارف انك دايس على قلبك وانت تقول هالكلام فإذا كنت تثبت لي شي او حتى لنفسك صدقني تراك اثبته واذا كنت تحس انك مخدوع فيني او مصدوم فأنت الحين بأصرارك على الزعل تسوي مثلي ومهما صار او بيصير ترى غلاك في قلبي هو الاول دايم وعشرتك عمرها ماتهون عندي وبالنسبه لك انا اكثر انسان فاهمك في هالدنيا عشان كذا بصبر عليك شوي لكن ما راح استسلم وعارف انك مهما تقسى وتبعد طيبتك وحنية قلبك بترجعك لخويك وعارف بعد اني ما اهون عليك .. همست وعيوني فالارض : وش اللي يخليك متأكد لهالدرجه ؟؟! مثل ماهنت عليك في يوم بتهون علي اليوم !! طالعني بنظره يائسه وحزينه .. الله يسامحك يابندر والله ما اظن انه يفرحك انك تحرج خويك بهالطريقه .. اذا كنت قادر تنسى وتلغي احلى سنوات من طفولتك وشبابك فانت بتقدر تنساني اما بالنسبه لي فانا ما اقدر استغنى ولو عن لحظه من ذكريات عمري معك لأني ما اقدر انسى حياتي كلها .. رديت بسخريه واللي سويته فالاستراحه وش تعتبره ؟؟ مثل مانسيت اللي بيننا بسوء ظن انا نسيته بهالجرح وادري انك ماتستحمل فكرة ان اي احد يزعل منك لكن انا ..... قاطعني .. يابندر انت مو اي احد وراك تكلمني كذا ؟! فتح عيونك تراي خلود .. فعلا انا مو اي احد والدليل سواتك فيني .. ابتسم بألم .. لا حول ولاقوه الا بالله ماتوقعت العناد يوصل فيك لهالدرجه على كل حال الموضوع الحين صار في يدك وتقدر تحكم فيه بالطريقه اللي تبي بس اتمنى انك ماتسوي شي تندم عليه ولا تغالط نفسك اكثر من كذا انت تعرف من انت بالنسبه لي وهالعالم اللي حولي بدونك ما ابيهم وما اقدر اتخيل ان اللي كان بينا بيكون ذكرى في يوم من الايام انت متخيل هالشي وانت تقول هالكلام ؟؟!! هزيت راسي .. محد يموت قبل يومه الدنيا كذا والحمدلله على نعمة النسيان .. اقامة الصلاة وودعنا بعض وطلع

 

[روفي]

(( الجزء السابع ))


بعد هالموقف حسيت براحه كبيره حسيت ان احنا متعادلين الحين او يمكن كان سبب الراحه اني تكلمت معه بعد فتره اعتبرها في نظري طوييييييله وطلعت كل اللي في خاطري اصلا ماعاد فيني صبر على فراقه واكيد انه حس بغلطته وهذا اللي كنت ابيه وقررت اني انسى اللي صار خلاص وارد عليه اذا دق المره الجايه واسامحه واطلب منه يسامحني بعد يعني حتى انا قلت كلام ما كان لازم يطلع مني وقررت ان احنا نسافر بعد عشان نعوض كل الايام اللي بعدناها عن بعض علمت ريم بالسالفه كلها كانت مستغربه وهي تسمعني : تصدق يابندر هذي والله العالم عين وصابتكم اجل معقوله خالد يسوي اللي سواه لا والاغرب انك قويت نفسك ولاسامحته لا لا اسمح لي هالكلام مايدخل العقل ..!! ضحكت وانا اسمعها وقلت : من جدك ماسامحته ؟؟!! اصلا من اول ماشفت اسمه في جوالي سامحته على طول وبيني وبينك قلبي ماقوى يزعل عليه من الاصل لكن الظاهر اني كنت امثل على نفسي قبل لا امثل على احد !! ثانيا المسأله بأختصار كانت رد اعتبار لكن تعرفين حنا مو زيكم انتم يالبنات اذا زعلت وحده الثانيه تعتذر على طول غالبا والثانيه بعد تسامح بسرعه وهذا في ظني اللي يخلي صداقات البنات اجمل واطول بعد اما الشباب فالكرامه والعزه تتغلب على العواطف الثانيه دايم نحس ان احنا مو بحاجة احد والاعتذار بعد من اصعب الاشيء علينا هذي طبيعتنا اللي حطها ربي فينا هذا وانا وخالد نعتبر طفره جينيه بالنسبه لصداقات الرجال .. الله يعين ان شاء الله انا الحين بس استناه يدق خلاص ماعاد فيني صبر .. طالعتني بتعجب .. والله انك غريب يابندر طيب ليش ماتدق انت عليه ؟؟!! اووووه انت غبيه والا تتغيبين وش قاعد اتفلسف عليك من الصبح اقول لك ما اقدر صعبه علي وبعدين خلود مايقدر يصبر بعد اكيد بيدق هو قال لي انه بينتظر علي شوي .. عطتني نظرات ما ادري وش تبي وقالت : الحمدلله والشكر لحد يسمعك بس وبعدين لاتسوي روحك فاهم البنات لانك ماعندك سالفه وفي شيء ابيك تفكر فيه تتوقع لو الوضع كان العكس خالد كان بيسامح والا بيسوي مثلك ؟؟!! وطلعت وقعدت افكر في كلامها واللي اجابته كانت واضحه بصراحه وهي بعد كانت تعرف الاجابه لأن مواقف قديمه تبين ان خالد حتى لو كان صعبه عليه يسامح ومن النوع اللي زعله شين بس انه يسامحني انا دايم مهما صار لكن هالكلام مايهم الحين مر كم يوم وخالد للحين ما دق لكني يوم الاربعاء شفت ميه مس كول من طلال ورجعت ادق عليه قلت اكيد ان خالد يبيه يتوسط بيننا لأنه يعرف معزة طلال عندي لما فقد الامل فيني وبعدين انا خلاص وصلت عندي ابي كل هالسالفه تنتهي ودقيت وانا فرحان مرحبا طلال ...... ه .. ه .. لا .. بندر .. صوته ابدا ماعجبني واختفت الابتسامه .. طلال خير ان شاء الله عسى ماشر معليش ماكنت عند الجوال قبل شوي بغيتني في شي ؟؟!! الرجال بدى يتنهد وحسيت ان في شي مو زين صاير .. بندر انا لي ساعه احاول ادق عليك لكن .. طلال ياخوك لاتلعب بأعصابي قلي وش فيكم ؟؟!! انا ذاك الوقت الهواجيس لعبت فيني لعب قلت ابوهم توفى لانه كان رجال كبير فالسن ومريض من زمان والا اخوهم الصغير تركي اللي كان عنده ربو حاد جاه شي كل شي مر في بالي وكنت طول الوقت افكر بس في خالد وشلون بيتقبل هالاشياء وانا اعرف غلا ابوه واخوانه عليه وعزمت اني انسى كل اللي صار واوقف معه في محنته كل هذا قبل لاينطق طلال بحرف خالد يابندر ..........!! لما سمعت الاسم حسيت ان قلبي وصل حلقي ولاعاد قدرت اتكلم او حتى اتنفس وبصعوبه ..خ .. خ .. الد وش ... فيه حرام عليك تكلم ؟؟!! كنت انتفض وركبي ماعاد تشيلني خالد يطلبك الحل يابندر ادعله بالرح ....... وخنقته العبره اما انا فكنت ساكت ولاعاد اشوف شي قدامي قعد يتكلم كلام مافهمت منه شي اللي قدرت استوعبه انه الظهر صارله حادث والظاهر انه كان متوجه لبيتي وتوفى بالمستشفى .. قفلت الجوال كنت واقف وبحركه بطيئه قعدت على الارض وبعدين انسدحت عالارض وقعدت اناظر السقف لفتره طويله ويدي على راسي فقدت الاحساس بكل اللي حولي لادموع ولاكلام ولاصدر مني اي ردة فعل .. طلعت بسيارتي امشي فالشوارع بدون هدف ماوعيت الا وانا فالمجمعه ديرة خالد اللي تبعد عن الرياض حوالي الساعتين وياما زرناها سوى وقفت السياره قدام فلتهم الي يجونها ايام الشتاء لما جا الليل رجعت للرياض دخلت البيت ورحت لغرفتي وقعدت اتقلب في فراشي تصوروا كل هذا بدون اي احساس الظاهر اني ماكنت مستوعب المصيبه اللي انا فيها لما جا الصبح رحت لبيتهم على طول وقبل اوصل دق علي طلال .. الو .. هلا بندر .. اذا ودك تسلم عليه وتودعه قبل الدفن تعال للمغسله اليوم قبل صلاة العصر مارجعت للبيت رحت للمغسله وسألتهم قالوا مابعد وصل من المستشفى تبون الصراحه كان للحين عندي امل ان السالفه كذب او فيها غلط زي حال الكل وقت المصايب ماودهم يصدقون واني بشوف خالد بعد شوي قعدت عند الباب الى الساعه 30 : 2 والا اشوف سيارة اسعاف جايه ووراها سيارات اخوان خالد كلهم وقف الاسعاف وفتحوا الباب الخلفي شفت طلال وباقي اخوانه عند السياره لما شفتهم يطلعون طرف شي ابيض شهقت ورحت اركض فالشارع كنت احاول ابتعد عن المكان بقد ما اقدر مشيت لين وصلت اخر الشارع وجلست على رصيف واحد من البيوت لما هدت نفسي شوي رجعت للمغسله كان لازم اوجه الواقع لوكان قاسي

 

[روفي]

(( الجزء الثامن ))


دخلت وانا شماغي على كتفي وماسك العقال في يدي وحالي دمار لقيت موبس اخوانه حتى اعمامه واخواله وزوج اخته بعد الكل كان متواجد لما شافوني تغيرت وجيههم وحضنوني بحراره كلهم اعرفهم ويعرفوني زين عرفت اني ذكرتهم فيه لما شافوني حتى واحد من اخوانه مارضى يتركني كنه بتعلقه فيني يحس انه مع اخوه خالد والغريبه انهم كانوا يعزوني بدال ما انا اعزيهم المهم جاني طلال وعلامات التأثر باينه في وجهه تبي ادخل معك ؟؟ احنا تونا طالعين .. قاطعته لا لا بدخل لحالي .. كانت هذي اول جمله انطقها من اول مادخلت للمغسله حتى لما عزوني مارديت عليهم تعوذت من ابليس وبديت اذكر الله ودخلت في الغرفه اللي دلوني عليها كانت فيها روايح غريبه الريحه اللي قدرت اعرفها هي ريحة المسك والصابون الظاهر ان الرجال اللي كان فالغرفه هو المغسل وقفت في مكاني عند الباب ماكنت عارف وش اسوي ؟؟!! قرب جنبي وكان شخص يميل للقصر وابيض ولحيته طويله وصاحب ملامح سمحه حط يده على كتفي وحس بالرعشه اللي تهزني كنت اطالعه بنظرات استغاثه وبصوت وقور قال عظم الله اجرك ياولدي واحسن الله عزاك الله يلهمكم الصبر والسلوان قبل جبهته وادعله بالثبات عند السؤال وباللي يجي في بالك كنت اطالعه وانا اشهق بدون دموع وطلع من الغرفه شوي قربت من عنده وشفت منظر في حياتي ما مر علي مثله حسيت الدم وقف في عروقي لما شفته انهارت كل حصون المقاومه والصبر اللي بنيتها ما ادري وشلون اشرح الوضع كانوا حاطينه على شي زي الطاوله ومرتفعه عن الارض بمسافه قليله مغطين جسمه بشراشف بيضاء الا وجهه وجزء من صدره كانت عينه وجزء من جبهته متحوله للون الازرق من فعل الصدمه اما خده ورقبته كانت فيها جروح بسيطه لكن واضح ان تركيز وقوة الصدمه كلها جت على صدره كان زي اللي نايم بس بدون اي اثر للحياه والظاهر اني ما صدقت الخبر لين شفته بعيوني فقدت اعصابي في ذيك اللحظات وصرخت صرخه مريعه حضنته بين يديني وقعدت اصيح بحرقه زي الاطفال دخلوا علي بعض اخوانه يوم سمعوا صوتي وحاولوا ياخذونه مني لكني كنت متمسك فيه بقوه .. يابندر قل لا اله الا الله لاتسوي في نفسك كذا ترى مايجوز ... وانا اصرخ من كل قلبي احس اني فقدت عقلي للحظات .. اتركوني خالد ياخوك رد علي كلمني ياخالد طلال خالد ليش بارد ؟؟ ليش تاركينه كذا ؟؟ ليه ماغطيتوه ؟؟ حرام عليكم نزل راسه وانسابت الدموع من عيونه .. انا لله وانا اليه راجعون تعال معي يابندر وتعوذ من الشيطان وخلنا نطلع .. وانا احاول اكلمه ياخوك وين رحت وتركتني ؟؟!! انا من لي غيرك ياخالد ؟؟ ودموعي سيول واخوانه يحاولون يفكون يدي عنه وبعد جهد قدروا ياخذونه من بين يديني بعد مابين اثر ضغطي على جسمه وانا منهار وفي حال مايعلم فيها الا الله سبحانه كل لحظه انادي بأسمه .. جابوا لي كرسي وقعدوني عليه وانا كني معهم ومو معهم واحد من اخواله شيخ كبير من الناس اللي فيه خير وصلاح والله هاديهم قعد يمسح على راسي وصدري ويقرى علي قران لين هدت نفسيتي شوي ناظرت فيه .. خالد صدق راح ياخال ؟؟!! شد على يدي وهز راسه ورجعت دموعي ويديني على راسيو وانا اهز على الكرسي .. مايصير ياخال والله مايصير .. قعد يستغفر وانا على حالي كنت مفجوع الله لا يفجعكم في حبيب .. رحنا نصلي عليه كان المسجد مليان واللي برى اكثر من اللي داخل كان الله يرحمه رغم صغر سنه انسان محبوب من الجميع صغار وكبار وفي المقبره مع الزحمه وكل هالعالم اللي حولي الا اني حسيت بوحده رهيبه كنت بعيد عن الجماعه ما ابي احد يعرفني او حتى يشوفني رغم اني عارف ان الكل يسأل عني تلثمت بشماغي ولبست نظارتي الشمسيه ووقفت بعيد عنهم جاني تركي واللي كان له غلا كبير عند خالد بحكم انه الصغير وكان دايم يقول انه رغم صغر سنه الا انه كان حكيم ويفهم اكبر من عمره بكثير كان عمره تقريبا ذاك الوقت 12 سنه سلم علي وحضنته وانا احاول اتماسك قدامه ولكم ان تتصورون مقدار صعوبة الامر خاصه انه يشبه خالد كثير قال لي : بندر خالد كان يعزك اكثر من اي واحد في هالمكان وكلهم مجتمعين حوله الا انت .. لاتتخلى عنه في هاللحظات عشان ماتندم باقي حياتك تشجع وادع ربي انه يصبرك بس لاتحاول انك تهرب من احزانك بهربك من هالموقف كانت كلمات عظيمه اثرت فيني وشفت في هالطفل اللي فقد اخوه في حادث مفجع الصبر بمعناه الحقيقي .. لميته لصدري مره ثانيه وكنا نواسي بعض بخسارتنا الكبيره .. مسكت يده وتوجهنا لهم استعدوا للدفن وسمعت اخوانه ينادوني .. قلت لهم اني انا اللي بنزل فالقبر واحطه ونزل معي واحد من اخوانه يساعدني .. سلمونا اياه فوق وحطيته وانا ادعيله واذكر الله طول الوقت كان ودي لو اجلس معه او حتى اشوفه او اسمع صوته لأخر مره لكن عرفت ان شمسي غابت خالد (( الرمت )) غاب من حياتي وهالحياة للأبد

 

[روفي]

(( الجزء التاسع ))

بعد وفاته رجعت ذاك الطفل الكتوم المنطوي على نفسه .. انا تركت قلبي معه لما تهاوشنا ولما راح .. راح قلبي معه ابتعدت عن الناس والعالم فتره طويله كنت فاقده بشكل خيالي واللي يحز في خاطري اكثر لما اتذكر انه توفى واحنا بعيدين عن بعض يعني 16 سنه عمرنا ماتفارقنا وقبل اقل من شهر على وفاته نتهاوش !! اللهم لا اعتراض راضي يقسماك وحكمك يارب لكن املي فيه انه كان فاهمني وعارف اني ما اقدر استحمل زعله وقلبي مايشيل عليه واني زي ماقال مهما حاولت اكابر وانساه مصيري ارجعله .. بعد عدة اسابيع على وفاته عطاني طلال دفتر وقال : هذا كان من اغراض خالد الله يرحمه واظن ان من حقك تتطلع عليه وتحتفظ فيه بعد اذا ودك لما شفت الدفتر تذكرته على طول كنا يوم انا واياه في المكتبه بنشتري كتب للجامعه وشاف الدفتر وعجبه وقلت له هذا مايصلح للمحاضرات ياعمي قال : عارف بس تدري وش باستخدمه فيه ؟! بكتب فيه مذكرات لكن مو اي شي الاحداث المهمه في حياتي بس .. اذكر اني ضحكت عليه من قلب وقلت له انت من جدك ؟؟!! والله ماتصلح لك هالحركات ونسيت الموضوع بعد كذا فتحت الدفتر وكان مكتوب بالصفحه الاولى : بالرغم من اني اعتقدت ان اليوم الذي ستملئ به هذه الصفحات لن يأتي ابدا الا انه اتضح لي عكس ذلك وعدت يوما اني لن اكتب به غير احداث مهمه من حياتي .. احداث تستحق الكتابه وقد جاء هذا اليوم بالفعل .. فاليوم اخطأت في حق صديق عمري ورفيق طفولتي .. بعد هذي الكلمات القليله بعددها والكبيره بمعناها في قلبي لقيت بعض ابيات الشعر :

بندر حرك ضميرك واعترف اني وفيت
سيرة النكران هذي فضها واذكر غلاي

اعترف بسك تكابر منت واصل مابغيت
ريح عنادك وخلنا انتفاهم باللي جاي

لاتحاول تمتحني ماخذيت ؟؟ الا خذيت
قلبي الغالي بلاش وماتركت الا شقاي

صح في لعبة غيابك زاد شوقي وابتليت
بس لاتظلم تراني ماصبرت الا برضاي

مادريت ان المحبه قاسيه لكن دريت
خطوة المليون جرح وافقت دربي وخطاي

كم تذكرت الليالي وانت ياخلي نسيت
ومن تناسى صدق ذاته ويش اقول الله معاي

يابني ادم تلاحق خاطري لامن طريت
خلك الطيب وحاول تكسب الوقت بوفاي

لاتخليها معاند ان قويت او ما قويت
القوي الله (( ياعمي )) وانت تدري عن مداي

وبعد كذا انهى كتابته بهالبيت :

خسرت ولاربحت الا قليل من الصبر وجراح
ربحت بندر وان خسرت العمر عسى تحييني اوراقي

وهذا كان اللي مكتوب بكل هالدفتر بس الدفتر عنده قبل اكثر من اربع شنين وهذا اللي مكتوب في ولاشي اعتبره مهم في حياته الا هوشتنا ما ادري اذا كان حاس بموته من قبل والا البيت جا كذا المهم لميت الدفتر لصدري وقعدت ادعيله كنت اقعد مع طلال بعض الايام ومره قال لي ان في اخر سفره لخالد مع اهله واللي ماراح معهم طلال فيها قال له : ماوصيك على بندر ياخوي لاتخليه يحس اني مو موجود خلك حوله دوم .. كمل كلامه وانا ماسك دموعي اللي اتعبتني .. ادري انه مافي شيء يخليك متحس انه مو موجود مثل ماقال ومافي شيء يعوضك او حتى يعوضنا بس ترانا كلنا حولك حتى ابوي يسأل عنك دايم .. رديت وانا اغالب الدموع وافكر في حال اهله من بعده .. ماتقصرون .. حاولت اشكي له شوي يمكن اخفف من هالالم الفظيع اللي احس به .. والله انه ماعاد لي قلب ياخالد .. يوم حسيت اني غلطت بالاسم خلاص انهرت وفضحتني دموعي رجعت للبيت وبعد فتره دخلت ريم علي تحاول تواسيني وتطلعني من دوامة الحزن اللي انا فيها .. بندر يا اخوي كل شوي والله اني خايفه عليك كانت جايبه عشاء لكني صديت عن الاكل .. طلبتك ياريم والله ما اشتهي شي هزت راسها .. ياخوي فضفض وطلع اللي في قلبك انا اختك وحاسه فيك مايصير تكتم كل هالالم في قلبك .. رفعت راسي .. وشلون تبيني اتكلم ياريوم الوحيد اللي قدرت اشكيله في يوم راح وخلاني خالد راح ياريوم وتركني في هالدنيا لحالي .. استغفر ربك يابندر هالكلام مايطلع من واحد مثلك انت انسان مؤمن وتعرف الله وبعدين حرام عليك تضغط على نفسك وتحملها هموم فوق طاقتها تتوقع خالد الله يرحمه يرضى لك بكذا .. امتلت عيوني بالدموع زي كل مره اسمع فيها اسمه وانا احاول اخفيها عنها .. مسكت يدي .. لاتحاول تخفي دموعك ياخوي طلع اللي في قلبك اللي فقدته موشوي انا ياخوي جايه اقولك ترانا كنا معاك وحولك في اي وقت تحتاجنا فيه .. ياريم انا شفت الدنيا على يده لكنه ماعلمني اعيشها بدونه انا خسرت القلب الكبير من بعده صرت اشوف كل شيء حزين الدنيا ياريم ماعاد لها طعم بدونه ليت الزمن يرجع و .. وضغطت ريم على يدي .. لاتعذب روحك ياخوي كلمة ياليت ماتنفع وهذا قدر الله ورغم مرور السنوات على وفاته الا اني عمري مانسيته او حتى راح من بالي عايش داخلي دايم وادعيله بالرحمه والمغفره كل الاوقات رحت للعمره ادور الراحه النفسيه بالقرب من الله تذكرت وانا اطوف لما اعتمرت انا والشباب العام الماضي قسمنا نفسنا عشان الزحمه كان خالد ماسك يدي ويمشي فيني بين الناس وانا اقرى من كتاب الادعيه وهو يأمن ولما رحت اشرب من زمزم تذكرت شكله وهو يصب المويه على راسه وجسمه كنه في بيته واحنا نقوله ترى وراك سعي ماراح تعرف تمشي واحرامك مليان مويه ويرد واذا صار ؟؟ والله ماعندكم سالفه هذي بركه يالله سوو مثلي بلا دلع وفي السعي لما شفت العربات تذكرته لما كنت اجره بالموت عشان مايوقف وهو يأشر على العربات الله يخليك خلنا نقعد شوي خلاص يابندر رجلي ماتشيلني خلنا نرتاح شوي والا شرايك نستأجر عربه وانت تدفني ؟! .. وانا اهاوشه على كلامه واجره بالقوه ..خالد تراك اذيتني قسم باللهالبزران مايسوون مثلك .. ولما جينا نتحلل كلنا قصرنا شعورنا الا هو حلق شعره كله كنت دايم في اي عمره اقصر شعري لكن هالمره حلقت .. واخيرا لما رجعت حافي للفندق زي ماكان يسوي خالد تذكرت لما خليناه ينام على الارض فالغرفه وشكله وهو يهمز رجله بعد تعب العمره وهو يتأفف : ياسلام عليكم بتنوموني على الارض هالسنه ؟؟ ترى مابيني وبينكم الا شهور حرام عليكم مو كل مره بندر وسامي ياخذون الاسره في هالغرفه المفروض يصير فيه تناوب !! فالغرفه الثانيه يتناوبون مو انتم يالظالمين .. بس محد عطاه وجه ولما قام الصبح كان يشتكي من ظهره وانا اضحك على طريقة مشيته .. امش زين لاتنصب والعمره الجايه ان شاء الله بتنام عالارض بعد رد علي .. هين يابندر ان ماخليتك انت تنام على الارض انا مب خالد .. سبحان الله دنيا دواره .. هالسنه اعتمرت لحالي ونمت عالارض وتركت الاسره فاضيه ولما قمت الصبح وحسيت ظهري يوجعني ابتسمت بحزن استقبلت القبله وقعدت ادعي بحراره ودموعي تنهمر .. يارب اغفرله تراي احبه فيك ياربي ارحمه وبرد علي وامسح على قلبي واجمعني فيه .. كانت هالعمره الله يتقبلها لخالد

 

[روفي]

(( الجزء العاشر والاخير ))


اقترح علي شيخ فاضل من اهلنا اني احفرله بير في وحده من الدول الافريقيه الفقيره واسميه بأسمه الله يرحمه عشان ارتاح بعد وعلمني عن الاجر الكبير اللي بيجيه ان شاء الله وفعلا سويت هالشي كنت تعبان من جد اشوفه في كل الوجيه واسمع صوته في كل الاصوات وذكرى اخر يوم شفته فيها ماتفارقني ابد .. في عيون الناس اشوف اشياء كثيره بعضهم يذكروني دايم ان خسارتي موبسيطه وبعضهم وحشتهم شوقتنا مع بعض وهذ يتعبني زياده واللي يصعب الوضع علي بعد اني وين ما التفت القى ذكرياته ماليه حياتي اثاث غرفتي اللي اخترناه سوى لما انتقلنا لبيتنا سيارتي اللي اختار لونها وساقها قبلي وعطره اللي للحين في درجها !! ياغلاة اللي راح لكن كل ما اتذكر ان ذاك الانسان كان صديقي ورفيقي القريب في يوم من الايام افرح وابتسم واعرف ان الله يحبني اللي رزقني بأخ مثله والله يعوض عليه شبابه في الجنه ان شاء الله واذا كنتم تقدرون تناظرون في عيون ربعكم اليوم وتسمعون حسهم في هالدنيا احمدوا ربكم على هالنعمه وحطوهم على راسكم دوم خاصه الناس اللي يستاهلون صدق واعرفوا انكم محظوظين لأن غيركم مايملك ولابعض اللي عندكم اما بالنسبه لي مابعد خالد احد والله يجمعني فيه بالجنه ان شاء الله انا عرضت قصتي على الناس عشان تاخذ منها عبره وفاته شي مقدر ومكتوب لكني ابتعدت عنه في اخر شهر له في حياته بسبب تافه جدا متخيلين قمة القهر والالم ؟؟!! هو غلط رحمة الله عليه وانا عاندت لكن اللي صار بيننا ماكان يستاهل اللي سويناه وهذا اللي دايم يسوونه الناس يخسرون احبابهم وربعهم بأسباب تافهه يتركون الشيطان يلعب في عقولهم لين تكبر السالفه ويفترقون ولو سألهم احد عن السبب يلقون ان ماعندهم اجابه واضحه وهم مايدرون ان الاشخاص اللي يحبونهم يمكن يروحون فجأه ياناس انا استنيت لين صار صديقي ذكرى تبون تستنون مثلي ؟؟ فالنهايه اطلب من كل واحد يقرى قصتي يدعي لخالد بالرحمه ويدعي لي ان الله يمسح الحزن اللي عايش فيني كل هالسنين ونصيحه من قلب ذاق مرارة الفراق الانسان اللي تحبه وتغليه رح اليوم وقله هالكلام خله يدري لاتستنى يمكن ماتلتقيه بعدين الا مثل مالاقيت خالد وشي ثاني مهم لاتنتظر انك تفقد انسان غالي عشان تعرف قيمته وقدره عندك
ختاما : الى الفقيد الغالي الانسان اللي علمني كيف احب الناس والحياة الانسان اللي نسى سعادته عشان يسعد غيره صاحب القلب الكبير المليان الخير لكل الناس اللي تعلمت منه الكثير وافادني في حياتي ولازلت استفيد الانسان اللي كان غير الناس اللي اقابلهم في حياتي واعرف انه زي ماكان اول صديق بيكون اخر صديق لأن مافي مثله في هالدنيا احد .. صديقي الوحيد خالد العبدالعزيز الله العالم بحالتي بعدك يالغالي ياليتك هنا عندي ماراح انساك يا رفيقي هو في احد يقدر ينسى مثلك ؟؟ ليتك قبل مارحت علمتني وين القى انسان زيك !! متأكد انك تدري اني دايم شاري ما ابيع وتقبل اسفي البالغ على كل اللي صار مني .. الوداع .. قبل لا انهي القصه اذا كنت تقرى قصتي وكان بينك وبين من تحبه مشكله وكنتوا بعاد عن بعض ارسله قصتي وارفقها بأعتذار بسيط دام عندك فرصه الحين

** واخالداه **
واخالداه وضح الجرح في كبدي فسرت بالجرح لانوي على احد
يبكون من _ وقد ناحوا _ على ولد اما انا فبكائي حرقة (( الرمت ))

******

يطوف وجهك في روحي فأسأله بالله ! قل لي اهذي فرقة الابد ؟
واخالداه ! يغص الشعر من الم كما تذوب عيون الشوق سهد

******

ويخطر الموت فوق البيد عاصفة من الدموع .. فنادوا الصبر ايا اهلي
غبت في الامس .. عل الامس يسعفني اذا افقت ولم ابصرك صبح عد

******

فلحت لي وجدار الموت منتصب حتى لأوشك شوقا ان امد يدي !!
اين بسمتك الحسناء ؟ هلسقطت شمس النهار على ليل من الكمد ؟

******

واخالداه ! وعاد الناس .. وانصرفوا وانت في القبر .. لم تبرح .. ولم تعد
تبارك الله ! نجري كلنا زمرا نحو المنون ولايبقى سوى الصمد

******


النهاية

 

[وعـــد 🎵]

الله يغفر له ويرحمه ،،
صدق بعض الصداقات لا تعوض
وبعض الاصدقاء اخوه انجبتهم لك الايام

الله يسامحك صدع راسي من الصياح

 

[روفي]

الله يغفر له ويرحمه ،،
صدق بعض الصداقات لا تعوض
وبعض الاصدقاء اخوه انجبتهم لك الايام

الله يسامحك صدع راسي من الصياح

امين يارب

عادي أنا شوي وكنت حبكي بس الله ستر وأنا انقلها تذكرت الأحداث وخنقتني العبرة
الله يديم لنا اصدقائنا ولا يحرمنا منهم ولا يجعل للزعل بيننا باب

نورتي وعوده الجميلة

 

[سلمــان]

فعلا صداقات الطفولة والحارة جميله وما تتعوض
انا عندي مجموعه من الاصدقاء تربينا مع بعض ومنهم ناس اخواني من الرضاعة طبعا تربية الصحراء ههههههههه

 

[روفي]

فعلا صداقات الطفولة والحارة جميله وما تتعوض
انا عندي مجموعه من الاصدقاء تربينا مع بعض ومنهم ناس اخواني من الرضاعة طبعا تربية الصحراء ههههههههه

الله يحفظكم ويديمكم لبعض ولا يفرق بينكم الصداقة كنز ثمين حافظو عليه

نورت اخي سلوم

 

[هدوء]

اين تجد الاوفياء هذة الايام
اصبحت عملة نادرة فالاصدقاء
الخيربن كالروح لاتغيب عن الانفاس
قصة جميلة رغم كومة الحزن الذي فيها
شكرا غاليتنا ع نقلك المميز ودام
عليكم وعلينا نعمة الصديق الوفي ..'


لروحك

 

[روفي]

اين تجد الاوفياء هذة الايام
اصبحت عملة نادرة فالاصدقاء
الخيربن كالروح لاتغيب عن الانفاس
قصة جميلة رغم كومة الحزن الذي فيها
شكرا غاليتنا ع نقلك المميز ودام
عليكم وعلينا نعمة الصديق الوفي ..'


لروحك

امين يارب

مرور جميل وراقي كصاحبه أنرت أخي الغالي

 

[امل مفقود]

اختيار موفق
يعطيك العافية على الجلب القيم

..​

 

[روفي]

اختيار موفق
يعطيك العافية على الجلب القيم

..​

الله يعافيك يروحي منورة