أخبار فنيه متعرفهاش
اللي في الصور ده مش اسماعيل يس 
- دا الشخصية الحقيقية اللي ابو السعود الابياري اكتشف وقتها اسماعيل يس وقدمها للجمهور بالشكل ده، يعني اسماعيل يس مش شخصية اصلية طبيعية ذات ضحكة طبيعية وافيهات اصلية زي ما كنا فاهمين، بل للاسف هو كاراكتر مقلّد من ممثل فرنسي شهير جدا بشكل عالمي اسمه فيرنانديل Fernandel
مين فرنانديل ده؟؟ 
- فيرنانديل هو ممثل عالمي، نجم الشباك في سينمات العالم لأكثر من مرّة ومخرج وكمان مطرب ، بدأ مشواره في اوائل الثلاثينات قبل اسماعيل يس بسنين طويلة، يعني اول فيلم ليه كان سنة ١٩٣١ اللي تصدر الشباك في فرنسا On purge bébé ، في نفس الوقت اللي كان اسماعيل يس كان عنده ١٩ سنة و بيدور علي حلمه انه يكون مطرب زي محمد عبد الوهاب، لحد ما بدأ يغير مشواره لفن المونولوج سنة ١٩٣٥م.
اما عن فيرنانديل، فكان نجم الشباك وقتها، واتشهر فيرنانديل بسبب مدرسته في الكوميديا، اصل خد المفاجأة دي، كان فيرنانديل بيعتمد علي حجم بقه الكبير، تخيل؟
واعتماده في الكوميديا كان علي ضحكته الشهيرة وحركات وشه وجسمه الكوميديين، بجانب تقديمه للاغاني المسماه "سكيتشات" في افلامه حاجة زي المونولوج كدة، اغنية خفيفة بيقدم فيها قضية وكانت الاولي من نوعها
- في الوقت ده السينما الفرنسية كانت مشهورة في مصر وبتعرض افلامها هناك منها افلام فيرنانديل نفسها، يعني فرنسا هيا اللي دخلت السينما مصر اصلا فا اكيد اقل حاجة تعملها انها تعرض فيها افلامها، كذلك في دول شمال افريقيا اللي كانت واقعة تحت الاحتلال، واتشهر فيرنانديل هناك.
- اشتغل بعدها اسماعيل يس في السينما في مشاهد متفرقة في مجموعة من الافلام، وكان فيرناندل في عز تألقه بقاله ٢٠ سنة، فا قدمه ابو السعود الابياري للسينما كنسخة عربية جديدة لفيرنانديل، بيستخدم فيها اسماعيل يس حركاته وافيهاته وحتي بعض القصص والمشاهد الكاملة اخدها وعملها، مع اضافة لمسته الخاصة طبعا لان اسماعيل يس مجتهد في النهاية
حابب اقولك كمان انه مخدش من فيرنانديل بس، هو اقتبس كمان من نجوم تانية زي شارلي شابلن وضاف حركات للممثلين عالميين تانيين زي حركة الجنون بهز الدماغ "شارلي شابلن" والخوف المبالغ فيه مع هز الساقين واليد من الممثل الامريكي لو كوستيلو.مضطر اصدمك تاني واقولك ان فيلم "اسماعيل يس في متحف الشمع" ماهو الا نقل حرفي لفيلم Abbott and Cotsello meet Frankenstein ، ومن لو كوستيلو اقتبس اشهر حركات الخوف اللي اتشهر بيها اسماعيل يس زي الاستنجاد بعبد الفتاح القصري او الصراخ بصوت مبحوح او هز الرجلين، وده مشهد من الفيلم اللي هوا هوا بالحرف الفيلم المصري بنفس ميكاب فرانكشتاين
نيجي لفيرنانديل Fernandel ..علي سبيل المثال بقا، فيلم Ignace سنة ١٩٣٧م دا فيلم قدمه فيرنانديل وكان قايم علي انه بيقدم في الجيش وبتبدأ الكوميديا من اول الاختبارات اللي هوا مش قدها طبعا لحد ما يبقا في الجيش نفسه ويبقا جندي حقيقي، يقوم اسماعيل يس في الخمسينات يعمل اسماعيل يس في الاسطول، ويستخدم نفس الافيهات والمشاهد اللي عملها قبل منه فيرنانديل. 
- فيرنانديل قدم فيلم اسمه Coiffeur pour dames او كوافير السيدات، وفيه بيكون البطل حلاق للحيوانات وبيحلم يمتلك كوافير كبير للسيدات، المرادي اسماعيل يس قلّد الفيلم كله من الالف للياء، وسماه حلاق السيدات، وهحطلك لينك في الكومنتات
مشهد من الفيلم هتتفرج عليه هتحس انك بتتفرج علي اسماعيل يس عادي مفيش اي اختلاف - فيرنانديل سنة ١٩٣٩م قدم فيلم Raphaël le tatoué واللي فيه بيعمل دورين، اخ طيب وتوأمه، وده اللي قدمه اسماعيل يس في فيلم "اسماعيل يس في الطيران"
دا غير تشابه افلام كتير جدا مع مسيرة افلام اسماعيل يس وتجسيد نفس الادوار تقريبا واللي كان بيقدمهاله ابو السعود الابيادي، يعني نقدر نقول ان ابو السعود الابياري نقل صورة الكوميديا الفرنسية حرفيا للمصرية والعربية عن طريق تقديم شخصية تشبهلها تماما، مع الاخذ في الاعتبار ان اسماعيل يس قدر يحط بصمته ويطور من اداؤه وتفوق علي فيرنانديل عربيا بأنه عمل سلسلة افلام تحمل اسمه وعمل دور السيدة (وده اللي معملهوش فيرنانديل) وطبعا الافيهات اكيد بتختلف لان المجتمعين مختلفين اصلا،
- الجمهور العربي والمصريين عرفوا فيرنانديل في الخمسينات عن طريق فيلم اسمه Ali Baba et les 40 Voleurs او علي بابا والاربعين حرامي، وده لان المخرج جاك بيكر اختار سامية جمال المصرية عشان تشارك فيرنانديل البطولة في الفيلم، وكان الفيلم عبارة عن اسماعيل يس مع سامية جمال، ووهحطلك لينك اغنية من الفيلم وافتكر ان اللي هتشوفه مش اسماعيل يس
من المفارقات، ان في منتصف الخمسينات تخلي فيرنانديل عن كوميديته الصريحة اللايت لان شكل السينما في العالم كان اتغير، وبدأ يقدم اعمال عميقة عن الحرب والشيوعية وخلافه وده اللي ضمنله الاستمرارية لحد السبعينات، وكان اشهر اللي قدمه هي سلسلة افلام اسمها دون كابيللو 
- في نفس الفترة اللي استمر فيها اسماعيل يس علي اداؤه مغيروش، حتي انه في فيلم اسماعيل يس في البوليس السري لما كان عامل رقاصة اسبانية، كان بينده علي عبد السلام النابلسي بأسم "دون كابيللو" نظرا لشهرة الافلام وقتها
- في النهاية، نمطية اسماعيل يس في الاداء وتغير شكل السينما العام في كل حتة في العالم ادت لان نجمه يخفت وتبتعد عنه الاضواء لانه استمر علي الوجة اللي اتقدم بيه، بعكس فيرنانديل النسخة الحقيقية اللي استمر واحد من المع نجوم اوروبا والعالم في مجال الكوميديا، لانه طور وغير من جلده..
طيب ليه كنا بنعمل كدة ومعندناش ابداع؟- سينما مصر للاسف مكانتش بالتطور الكافي عشان تقدر تنافس بشكل عالمي او تبتكر حاجة جديدة من الاساس في الوقت ده، مكنش فيه اهتمام بالروائيات، مكنش فيه ابداع مصري خالص الا فيما ندر، فما كان من صانعي الافلام الا انهم يقلدوا
- يعني هند رستم مثلا طالعة علي حس مارلين مونرو، والطفلة فيروز طالعة علي حس شيرلي تمبل، وغيرهم.
في النهاية، لك ان تتخيل ان ضحكة اسماعيل يس اللي كانت بتموتنا من الضحك لما كان بيضحكها بخجل قدام البطلة، ماهي الا ضحكة مصطنعة اقتبسها اسماعيل يس من فيرنانديل "اول صورة"، اخيرا، وقت تصوير فيلم "اسماعيل يس في دمشق" لما كان في سوريا، الاذاعة والتليفزيون عملت لقاء مع اسماعيل يس وسألوه "فيه ناس بتشبه بينك وبين فيرنانديل فا انتا شايف ايه الاختلاف بينكم؟- قالها وهوا بيضحك " هو بيتكلم بالفرنساوي".
اعضاء الغابة العربية شاهدوا ايضا
اسم الموضوع : أخبار فنيه متعرفهاش
|
المصدر : اخبار الفن و الفنانين
