من أجل من نعود ضع مشاعرك هنا ..
كان ذلك عنوانا لموضوع كتيييير مميز ،وحلو ..للغالية
@ندى الورد
وانا عم أقراه امبارح كتير اتأثرت فيه ،وبكل الردود ،وماقدرت رد حتى !
لهيك رديت اليوم ،وحبيت حط ردي هنا كذكرى :
--------
يسعد مساكم..
-أولا ..عذرا منك غاليتي
@ندى الورد
ما انتبهت على الدعوة
وتعلمين جيدا أني لا أدخل قسم النقاش إلا بالصدفة ،كما حصل معي الآن ..
حين رأيت موضوعك المميز هذا .
ياااه ياندى ..
كتيير عجبني الكلام يلي ذكرتيه ،وكل المشاركات كانت حقيقة أكثر من رائعة ..
بصراحة ..انا بحس إنو الغابة صارت بيتي الثاني،وماكان بدي أتعلق هيك بالمكان!
لان للأمانة انا وقت كنت بغير منتدى زعلت جدا وقت راااح ،وانتهى برفة عين! .وراحت معه كل ذكرياتنا الحلوة،
والمرة كمان ..وكل رفقاتنا يلي بمثابة الإخوة الحقيقيين ..وكل مشاركاتي يلي حتى ماكنت محتفظة فيها عندي للأسف .
لكل هدول ماكان بدي أتعلق بالمكان، ولا اتعود على الأشخاص،والصحبة الطيبة يلي هنا كمان ،وكان بدي اعتبره مجرد متنفس مو اكتر ،وكنت إذا بتذكري ياندى في البداية رافضة نزل حتى مواضيع من قلمي! ومكتفية بالمشاركات
والرد فقط .بس لانو نحنا بشر من لحم ودم صعب نفصل ،وننفصل ،ونقول أشخاص افتراضيين ،
او حقيقيين ،وخلف شاشات وهيك قصص ،وننسى الوقت الكبير يلي عم نقضيه بهالمكان ،
حتى لو كان فيه بعض المنغصات أحيانا كغيره ..بس اتعودنا عليه وتعودنا على كل روح حلوة فيه .
لهيك صرت ارجع اتفاعل ونزل مواضيع جديدة ،وقديمة من يلي عالقة بذهني..
لان مافيني أتوقف عن كتابة الخواطر او الشعر .؛ أو أترك القلم ! والكاتب او الأديب يحتاج إلى قارئ جيد ،
والغابة ماشاء الله قامة وقيمة بكل مافيها ،ومن فيها .
لذا لا قيمة للمكان من دون أصحابه، والكل بيكمل بعضو ،وفي مثل دارج بيقول : (البيت بسكانه مو بحيطانو..)
فيارب يحفظ هاد البيت وصحابو ..
وعنجد مابتخيل حالي اني ارجع أبعد ،ولا يصير شي للغابة ،ويخرب كمان ،حتى أني
احيانا رغم انشغالي وضغوطات الحياة بدخل وبشارك،مشان عجلة الغابة تضلا شغالة ،ومستمرة ..
.
.
- وبحب اختم بمقولتي يلي بحبا ككل أخواتها
:
لا شيء سوى طيب الأثر ؛ هو الباقي..
إذا غبنا يوما..ولم يعد يسعفنا التلاقي
-وأخيرا.. ربي يحفظكم جميع ..ويبارك فيكم ..
وتضلوا منورين الغابة بكلشي حلو ،ومميز .
ومشكورة حبيبتي على هالموضوع يلي بلامس الروح والوجدان
وبخليك تكتبي بكل عفوية ،وتلقائية كلشي بتحسيه.
.بدليل اني كتبت بالعامية كمان
@روح أنثى
بعنوان : ( أكتبني في الطريق الذي لا يعود ).
