الصبر بين الصمت والحكمة
في زمن السرعة اللى كل حاجه فيه بتحصل في ثانية، اصبح الصبر صعب.. ويمكن غريب!
بقينا عايزين كل حاجه دلوقتي.. ننجح بسرعة ونكسب بسرعة وحتي ننسي الألم بسرعة بس الحقيقة؟ مفيش حاجه عظيمة بتيجي بسرعة. والمعادلة البسيطة اللى ناس كتير بتتناساها «كل تأخيرة.. فيها خيرة»
الصبر مش مجرد إنك تسكت
الصبر هو قرار واعي أنك تنسي، وإنك تحافظ علي هدوءك حتي لو الظروف مش في صالحك.
والصبر نوعين:
_صبر إيجابي؛ وهو إنك تسعي وتحاول وتعمل اللى عليك وتسيب النتيحة على ربنا.
_صبر سلبي؛ هو إنك تستني ومتعملش حاجه وتقول "مكتوبلى كده "
لكن الفرق كبير بين اللى بيحاول ويصبر، واللى بيكسل ويستسلم ويسميه "رضا".
والصبر الحقيقي بيبان في ثلاث مواقف.
1_ وقت الغضب: لما حد يستفزك.. وانت تختار تهدي.
2_ وقت الخسارة: لما تخسر شغل، شخص، حلم.. وتكمل من غير ماتنهار.
3_ وقت التأخير: لما الحاجة اللى بتدعي ربنا متجيش بسرعة.. وتفضل واثق إنها جاية بس في وقتها الصح.
الصبر بيقولك: أنا أقوي من إني أستعجل وأكبر من إني أنكسر.
لكن خلينا نقول الحقيقه
في لحظات بنضعف فيها...
بنقول" كفاية بقي! تعبت من الصبر.. "
ودي لحظة طبيعية.. لكن الفرق إنك مستسلمتش فيها.
وهنا اقدر اقولك ازاى تكون صبور من غير ما تستسلم..؟
_خليك دائماً بتسأل نفسك: انا عملت اللى عليا؟
لو الأجابه أه يبقي أرتاح وسيب الباقي على ربنا.
ولو الاجابة لأ.. يبقي قوم كمل سعيك.
المؤمن القوي.. هو اللى يصبر ويشتغل مش اللي يسيب الحياة تمشية.
الصبر مش ضعف.. ولا سلبية
الصبر هو اهتيار.. اختيار إنك تكون إنسان ناضج يعرف يتحكم في في نفسه وفي غضبه وفي ألمه.
في الأخر..
افتكر ان الصبر مش بيضيع
وإن ربنا قال في كتابه العزيز:
"إنما يوفي الصابرون أجرهم بغير حساب"
خلى صبرك دافع مش عبء
وخلى دايما في قلبك يقين إن بعد العسر يسر
وإن كل لحظه بتصبر فيها .. هي لحظة بتقربك من الفرج.
اسم الموضوع : الصبر بين الصمت والحكمة
|
المصدر : المنتدي العام
