ابن الأصول

[LioN KinG]

تحية لاولاد الاصول
------------------------------
‏بتعرف ابن الأصول إزاي؟

أنا أقول لك.
إبن الأصول:

عمره ما ينكر فضل حد بعد فضل ربنا عليه أو ينساه.

بيفضل باقي على العِشرة لحد آخر لحظة وبيعمل كل إللي عليه وزيادة.

ما بيردش الأذي بالأذي.

وقت الشدة لو احتجته لازم هتلاقيه ويمكن من غير ما تطلب كمان هتلاقيه قدامك.

‏بيساعد الكل من غير أي مصلحة تعود عليه.

إبن الأصول كرامته عنده رقم واحد ومستحيل هيقبل أي إهانة . ونِفسه عزيزة عليه فوق ما تتخيل . بس برده بيعرف يسامح

إبن الأصول بيعرف يعتذر. لو غلطان مش بيستكبر ويتكبر على خلق الله . ولما يبقى غلطان بيقول أنا آسف وغلطت فعلاً وغلطه ما بيكرروش.

إبن الأصول كلمته واحدة . لما يقولك هأعمل صدقه . وبيعمل

‏إبن الأصول ضميره من جواه ييتحكم فيه وما بيسلمش ودانه لحد .

إبن الأصول صاحب صاحبه جدا . مستحيل يبيع صاحبه علشان مصلحته . ولا عمرك هتلاقيه منافق أو بوشين

إبن الأصول حد جدع بالفطرة . الطيبة ملازماه.

إبن الأصول بيعرف يعاتب مرة واتنين وثلاثة علشان مش من طبعه إنه يفرط في حد بسهولة. بس لمّا بيفرط ‏ربنا ما يوريك عمرك ما هتعرف ترجعه تاني

إبن الأصول ملوش في الحوارات . بيقولك في وشك إللي هو عايزه وإيه إللي ينفع وإيه إللي ما ينفعش. اللف والدوران مش سكته .

إبن الأصول عزيز وله بدل العزيز عزيز واتنين مش زي غيره مالوش غالي .

إبن الأصول لو اتظلم عمره ما يظلم. بيسيب ‏ربنا يجيبله حقه .

إبن الأصول بيصفي بسرعة لو لقاك شاري، وينسي بسرعة لو لقاك بايع .

إبن الأصول يحب الخير لغيره حتي لو مش هيطول من الخير ده حاجة . ويفرحلك من قلبه بجد .

إبن الأصول عينه شبعانه عمره ما يبص في رزق غيره ولا يبص في حياة غيره .

إبن الأصول بيقدّر ويحترم ‏أبسط وأقل حاجة حلوة بتعملها معاه .

إبن الأصول ما بيعرفش يخون ولا يجرح ولا يستغل فرص ولا يستغل حد . ولا يرقص على السلم

إبن الأصول صاحب الكل. ومش متكبر

إبن الأصول ما يعديش عليه واجب ويديلك حقك من غير ما تطلبه .

إبن الأصول يديلك إللي محتاجة عادي جداً،
‏ويطلع من جيبه لحد آخر قرش معاه.
ابن الاصول ما بيفكرش في نفسه وبس لان طبعه وأصله الكرم.

إبن الأصول مهما كان ناجح أو عنده كتير أخلاقه غلباه . ما يعرفش يتغر علي خلق الله.

إبن الأصول مستحيل يعايرك بإللي عمله معاك في يوم . بيسيبك لوحدك تعرف الفرق بينه وبين غيره .

إبن الأصول جواه رحمة وعدل ‏ودايما بيحط نفسه مكان غيره.

إبن الأصول مش لازم يكون مشهور أو إللي بيلبس برندات ولا إللي معاه فلوس ولا إللي راكب افخم عربيات و لا اللى ساكن في أحلي الأماكن . ولا اليقولك انا من عيلة كذا واصلى كذا وانا ابن فلان
ابن الاصول هو اللى بيتعامل مع الحاجات دى كلها عادى مش اللى ‏منبهر بيها لان فاهم ان قيمته فى ذاته و ميلزموش يعرف اللى حيعرفه علشان الحاجات دى .

إبن الأصول مش منصب ولا جاه.

إبن الأصول إللي بيعمل الأصول⁦

 

[فطيم ♘]

صح لسانك
سلمت على الطرح الجميل .

 

[ندى الورد]

كلام رائع جدا وعلى ااالاصل دور ودا من شيم الناس الذهب عجبني الموضوع اشكرك ياامديرينا الغالي يابن الاصووول

 

[رضا التركي]

نعم هو كذلك عملة نادرة
قلما نحصل عليها
بوركت أخي على الموضوع الجميل
دمت بكل ما هو خير وأكثر

 

[ألرمز]

تحية لاولاد الاصول
------------------------------
‏بتعرف ابن الأصول إزاي؟
إبن الأصول مش منصب ولا جاه.

ابن الاصول بين الحقيقة والتجني
اجاد استاذنا الفاضل في التعريف بابن الاصول وبالافعال الطيبة التي يقوم عليها نوع
من البشر وتلازم مسيرته بالتربية كما اشار اليه عنوان الطرح بـــ ابن ,, بكونه
منسوب الى ومسندا لقول الشاعر

وَيَنشَأُ ناشِئُ الفِتيانِ مِنّا ,,, عَلى ما كانَ عَوَّدَهُ أَبوهُ​

او بالفطرة كما ورد في بيان الطرح
إبن الأصول حد جدع بالفطرة . الطيبة ملازماه.
مسندا لحديث كل مولود يولد على الفطرة فابواه
يهودانه او ينصرانه او يمجسانه .

وبين التربية والفطرة شعرة التجني بدمج اللقب كاصل من اصول اللغة
ليفهم مجازيا بطيب اصل كل من يفعل الطيب بغض النظر عن شخصه
وعن حقيقة طيب منسبه من عدمها حتى ليكاد يفهمها الكثير بانها من المسلمات فقد
ينسب فاعل الطيب الى اصل لاطيب فيه وانما تولد الطيب بشخصه من فطرته وليس باصله كما اشار الى ذلك الامام علي ابن ابي طالب :
كُن ابن من شئت واكتسب أدبًا,,, يُغْنِيكَ مَحْمُودُهُ عَنِ النَّسَبِ!
فليس يُغني الحسيب نسبتهُ ,,, بلا لسانٍ لهُ ولا أدبِ!
إن الفتى من يقول ها أنا ذا ,,, ليسَ الفَتَى مَنْ يقولُ كان أبي!
,,, نعم للاصول الطيبة ,,, ونعم لابنهم ,,, ونعم لكل طيب ,,, طاب اصله او تردى ,
طرح قيم ومفيد وفقك الله استاذنا لكل خير .