السلام عليكم ورحمة الله وبركاته
صباح الخيرات والليرات والمسرات حبايب ألبي
آسفة والله البارت كان جاهز وامس بسبب
عطل النت والقروشة نسيت ما نزلته
اترككم معه الآن وقراءة ممتعة
_________________________
أسرار القلوب
البارت الثالث
وتهدينا الحياة أضواءً في آخر النفق
تدعونا كي ننسى ألماً عشناه ..
المدرسة عند البنات
كانت جالسة لوحدها تنتظر صديقتها تجي
تأخرت كثير اليوم واحتمال تكون غايبة؟
تنهدت ورجعت لورا تتكئ على كرسيها
وعيونها على طاولتها تتأملها من الملل
دخلت الفصل وراحت لها مبتسمه
شهد وهي تضم الهنوف/ هلوو ماي قيرل
ابتسمت الهنوف / هلوات بقرتي الحلوه
جلست جنبها شهد ومازالت الابتسامه تزين محياها/ اقول وشبك جالسة كنك مطلقة
ضحكت الهنوف على وصفها/ تأخرتي وتوقعتك مو جاية وأنا اصلا فاتحة المدرسة مليت
شهد حطت شنطتها على الطاولة/ والله محد قالك تجين من بدري وانتي عارفة يوم الخميس نص الطالبات ما يجون
الهنوف تنهدت وهي تحس بألم في قلبها/ ياخي مليت من كل شي
شهد تعدلت بجلسها/ ويي هنو شنو صاير معك ؟
دمعت عيونها وابعدتها عن شهد/ ولا شي بس تعرفين مشاكل الاهل
شهد اتكئت على الكرسي وتنهدت/ تنتهي حياتك ومشاكلهم لا طنشيهم يابعدي والله لو جلسنا نفكر بكل شي بيروح عمرنا على فاضي .. اليوم تلاقيهم متذابحين وبكرا مافي احسن منهم مالهم امان لا تتعبين نفسك عشانهم ولا شي ابتسمي الحياة حلوه بوجودنا فيها هنوتي
ابتسمت الهنوف وحطت راسها على كتف شهد / ايلافيو شهدي ( وتمسكت بذراعها ) مارح تتركيني صح؟
شهد ابتسمت وهي تتمسك بيدين الهنوف/ مستحيل ياقلبي انتي اختي الي ما جابتها امي واي شي يضرك يضرني وأنا مستحيل اتخلى عنك بكون معك في المُره قبل الحلوه
وبدو الطالبات يدخلون الفصل وحدة ورا الثانية مما خلاهم يسكتو وقامت شهد جلست على طاولتها وتركت الهنوف تغرق في افكارها
عند ليان
كانت جالسة بفصلها وهي سرحانه و ملانه ما تحب بنات فصلها وما تختلط معهم بعكس اول كانت مع شهد والهنوف بنفس الفصل وتم نقلها
المعلمة/ ليان ركزي معي
ابتسمت لها عالخفيف وحاولت تتابع مع المعلمة
لكن هيهات .. تذكرت شي وسرحت في خيالها من جديد
حست بأحد يرفس رجلها عالخفيف
عقدت حواجبها والتفتت لورا وتنهدت _ لا حول ولا قوة الا بالله كان ناقصني انتي
ابتسمت للبنت الي وراها واخذت
الورقة منها بدون ما المعلمة تحس
فتحتها بهدوء وقرأت محتوى الرسالة
أخذت شهيق وزفرته بقوة وهي مغمضة عيونها
اخذت القلم وكتبت ( لا ) ورمت الورقة على ورا
ورفعت رجولها عن الارض وعيونها على المعلمة
مها
دخلت الصف وكانت اخر وحدة تدخل
المعلمة / ليش التأخير يا مها
ابتسمت عالخفيف وخدودها مورده
بسبب مشيها السريع/ آسفة بس اخوي تأخر علي
المعلمة تنهدت بملل من حضورها المتأخر دائما / اجلسي مكانك وهذي اخر مره اعديها لك
ابتسمت وراحت جلست جنب الهنوف
وتبادلو الابتسامات
مها/ كيفك يبقرة
الهنوف ابتسمت لها/ بخير الحمدلله اسكتي والا بننطرد نتكلم وقت الفسحة
هزت راسها والتفتت لشهد وطالعتها من فوق لتحت
شهد استغربت من نظراتها لكن ابتسمت لها
مها صدت عن شهد وكل وحدة أخذت كتابها
وبدو يتابعون مع المعلمة ..
ريان
كان جالس في غرفته وفاتح جواله
ويقرأ محادثات قديمة له مع الي
خطفت قلبه وأسرته بدون ما يحس
وكان مشغل اغاني بسماعة البلوتوث
وعايش جوه .. كانت مشاعر مابين
حب وحنين! حب ممزوج بكره!
مشاعره كانت متناقضة
ما كان عارف وش التصرف
الصحيح والي لازم يسويه
تنهدت بضيق ورمى الجوال جنبه
على السرير وبدا يمسح وجهه
بكفه وهو مغمض عيونه والصداع
يشق راسه شق .. التفت لصديق عمره
ولقاه نايم كأنه اخطبوط رجله بجهة
ويده بجهة وفاتح فمه .. ضحك
على منظره وأخذ جواله وصوره
حاب يهدده بالصور ويستفزه
الشخص الوحيد الي يتحمله
بكل مواصفاته الحلوه منها والشينة
تذكر كيف كان اول لقاء بينهم
عمره ما توقع انهم بيكونو أعز
الأصدقاء وما يستغنى واحد عن الثاني ..
كان جالس بالكافيه لوحده وهو كاره
عيشته والسيجاره بيده ..
جا واحد من الموظفين وطلب منه
يطفي السيجاره لأنها ممنوعة عندهم!
قلب عيونه وهو منزعج من قوانينهم
المعسل موجود لكن الدخان ممنوع!
زفر بعصبية وهو يطفي السيجاره
ويتكئ على الكرسي بملل وهو يتأمل
الناس الجاية والرايحه
التفت للشخص الي جلس على طاولته
ورفع حاجبه بمعنى " خير "
ابتسم له الشخص الي جلس / أبد والله شفتك قاعد لحالك وقلت اخاويك ولا معك احد؟
ريان بهدوء وبعيون بارده/ مامعي احد لكن من الأدب انك اذا تبي تجلس على طاولة شخص تستأذنه قبل
ابتسم له ووقف/ تسمح لي اجلس معك على طاولتك يالحبيب؟
رد عليه بإبتسامه جانبية/ ما اسمح لك
ضحكت وهو يجلس/ تسمح ما تسمح جالس يعني جالس بالرضى كان ولا غصب
رفع حاجبه وهو يأشر/ يا كثر الطاولات روح اجلس على اي وحدة وفكني منك
اتكئ على الكرسي وراه وابتسامته يزيد/ من بين كل الطاولات ما شدتني الا طاولتك وهذا يعني انك شخص مميز؟
ابتسم له وقال بهدوء / شسمك
تعدل بجلسته ومد يده/ اسمي فهد وانت؟
كان يطالع يده وهو مبتسم ويحول انظاره
مابين الشخص الي قدامه وبين يده / ريان
ومد يده وتصافحو ومن هنا بدأت صداقتهم
صارو كل يوم يتقابلون في الكافيه واخذو
ارقام بعض وحبه حبه تقربو من بعض
وصار كل واحد يفضفض للثاني ومن
زياره لأخرى حتى اهاليهم عرفو بعض
وصارت صداقتهم يعرف عنها كل معارفهم ..
ابتسم وهو يشوفه عافس ملامحه بسبب
ضوء الشمس الي بدا يتسلل من نافذة الغرفة
قام وفتح الستاره الغرفة واختفى ضوء الشمس
عن وجه فهد ورجع انسدح بمكانه عالسرير وغمض
عيونه يحاول ينام شوي اليوم عنده مشاوير
كثيره قد شعر راسه على قولته..
خلووونا نتعرف على ابطال روايتنا الحلوين
اسيل
انسانه كتومة وطيوبة جدا وهذا سبب
اغلب مشاكلها متهورة في بعض الأحيان
تميل للهدوء والعزلة وتحب تعيش في عالمها الخاص
ليان
هادئة بعض الشيء لكنها مشاكسة تحب
تحاشر خلق الله وتحش فيهم بدون ملل
طيوبة وفزعة للبنات لسانها سليط ترد
الكلمة بعشرة وتقرف من بنات صفها
شهد
طيوبة لأبد حد وحنونه
صديقة وفية وتقدر تعتمد عليها
في المواقف الصعبة .. هي خليط
مابين العاطفة والعقلانية لكن
عاطفتها دائما تتغلب عليها
الهنوف
هادئة وطيوبة ما تحب تجرح احد
وتحاول دائما ترضي غيرها ولو كان
على حساب راحتها وسعادتها
تحب تعطي السعادة لغيرها اكثر من نفسها
كتومة مره وقليلين الناس القريبين منها
مها
هادئة وحنونه لكنها انانية
عندها حب تملك غير طبيعي
طموحاتها كثيرة لكن ماعندنا شغف
عشان تحقق احلامها وتميل للسلبية
عبدالعزيز
رجال شهم وكفو صاحب مواقف صعبة
كتوم بطبيعته وقلبه طيب يحب يساعد
الناس فرفوش لكنه يميل للهدوء اكثر
صقر
هادئ وطول وقته منشغل ترك دراسته
بعدما توفى ابوه وبدا يشتغل عشان امه
واخته الوحيدة طيوب مره وكتوم
ريان
طيوب وفرفوش يحب المزح
لكن يحب الهدوء اكثر له عالمه الخاص
اكثر انسان يختلط فيه ويرتاح معه هو
صديق عمره فهد يميل للنرجسية
فهد
انسان طيب وفرفوش كتوم جدا
يخفي حزنه ورا ضحكاته المستمره
ما يحب يبين ضعيف قدام احد
غير ريان ويحبه اكثر من اهله
بدر
منبع الحنية يحب اخته اسيل
ودائما يجلس معها إذا شافها مكتأبة
همه الوحيد يكونو اهله بخير ومبسوطين
مزوح وشبه صايع وراه بلاوي ما يعرفها
الا اخته اسيل ..
هذولا هم ابطالنا الحالين وفي حال
تم التحديث بعطيكم خبر
وشرايكم نكتفي لهنا!
ونكمل في البارت الجاي إن شاء الله
و زي ما أقول دائما
اتقبل جميع الآراء والانتقادات
اشوفكم على خير الخميس
القادم حبايب ألبي
دمتم بخير
<امزح
اكيد ليان غششتك ياويلها مني
يمكن ما أرسلت بهم
