انفاس في سطور

[عابر السبيل]

ياقاطف الاثمار بالخد منك اثمار
ولون الشفق يا غالي الخد من لونك

مرّيت ودي بس اسلّم بدربي مار
واقول كيف الحال ياحلو وشلونك

وحطيت في صفح التعابير لك دينار
كله على شانك وتكرم لي اعيونك

ياكم احطك لحن في حافل الاوتار
وحلو الصبايا وسط لحني يشيلونك

الله ياخد ن كما حفلة الازهار
كل الذي جوا لك من الشوق يغلونك

حطيت في قلبي على ثومته مسمار
وعقبه غديت اهواك بالدرب مجنونك


عابر السبيل

 

[ندى الورد]

الله الله على جمال حرفك وسلاسته

عابر عبرت بقلوبنا فنشرت فيها عطر فرنسي فخم اشكرك لتلك الكلمات الندية الجميلة ودي ووردي لك

 

[عابر السبيل]

وقفت ودي بس امسيك بالخير
وباقي السوالف يا رفيقي سلامات

سلام ياللي كل وجهه تعابير
مقسومة(ن) مابين بسمه ودمعات

كم ذا بكى من دمعتك نايح الطير
ولوحات حزني منك تبكي بلمسات

عند الشجى يا كم طاحت دنانير
من عين منهو يعشقك انت بالذات

اللي مشى لك في ظلام الدياجير
كن يلتهم ليلن تماوج بظلمات

عينه على شطن يجي له مسايير
شط(ن) علاماته مع الليل شمعات

جيته ودمعي فوق خدي محادير
وتحير في صدري من الشوق كلمات

يا صاحبي لك في خفوقي مزامير
يجي لها في ظلمة الدرب شيلات

بليا سبب جينا ولا به معاذير
والا انت خابر في الخوافيق نسمات

من شن بقلبي جيت امسيك بالخير
وباقي السوالف يا رفيقي سلامات

عابر السبيــــــ(محمد الحربي)ــــل

 

[أموي وأفتخر]

الله عليك
احب هءا النمط من الشعر
تابع تألقك

 

[عابر السبيل]

راااىع

شكرا لك على كل ماقلتي وافتخر بتواجدي هنا مع اناس احبهم وادين بالانتماء لهم

 

[عابر السبيل]

الله عليك
احب هءا النمط من الشعر
تابع تألقك

مرحبا بك ونورت المدونه لعلي اقدم ما يحبه الجميع ويرقى لذائقتهم

 

[عابر السبيل]

الله الله
تسلم شاااعرنا الرائع

اشكرك ولا يسعني الا ان اسأل الله ان يوفقني في تقديم ماتحبون

 

[عابر السبيل]

خطرن يصب الزين من خدها طيب
وعين ن من الانعاس صارت صريعة

وشفايفن حمرن رقاق ومراطيب
لاهي على ضيقن ولا هي شنيعة

والوجه صبحن طار صوبه يعاسيب
والورد في وجهه تفتّق ربيعه

ورموشها دقاق ن طوال ومهاذيب
وفي العين سر ن ليتها لي تذيعه

وخشمن على الخدين عالي المراقيب
ياهي لمجنون الضماير فجيعه

كن الذهب في شعرها له ملاهيب
تشري فوادي نوب ونوبن تبيعه

ياكثر ناس ن يطلبونه مطاليب
واكثر قلوبن من سببها وجيعه

من وين ماشفته فلا به عذاريب
يطيعها زينن وهي ماتطيعه

ياسلسبيل ن منيتي م المشاريب
او حلو عنّاب القلوب المجيعه

مالوم لو والف معا مثلها الذيب
يهوى مواصلها وكب القطيعه

حاق الغلا في كفّها له مقاضيب
يولع بها زينن وهي له وليعه

ينوّخ جمال الكون عنده مراكيب
تصهر جمال الكون فيها وتميعه

ملت على الشرق هو والمغاريب
وضاق الشمال ابها وجنوب البقيعه

اربع جهاتي كلها له معازيب
سهل ووعر والمرتفع والوضيعة

اشب من شانه مع اليوم واشيب
وصدري لها شقّ ن ولا له رقيعه

تمشي تكب الزين قدمه تكابيب
لاهي على ريث ن ولا هي سريعة

تشبه لغيم ن غيّب الشمس تغييب
يضفي لها ظلن غريب الطبيعة

يامستحيل ن بين بعد ن وتقريب
اشقيتني بين العطا والمنيعة

يحضر معك عقلي على الحب ويغيب
ولا سد رمق الجوع منكم ضريعة


عابر السبيل

 

[عابر السبيل]

يا حلو ياللي بالضماير توسّط
يا محرمن هتن المدامع تجِفِّي

يا جاعل(ن) دنياي شيل(ن) معا حط
متى على الله لوعتي بك تِكفّي

الموت يوم انّك تمشَّى على الشط
تمشي وكفك يمسكه غير كفّي

حسيت روحي م الجواشن تِمَعَّط
والقلب م اللوعات دلّى يِرفِّي

هامت حروفي م العمى لك تخبَّط
والخاطر اللي كان يمَّك يشفّي

كنّي على درب الحزن ماسك(ن) خط
في ساعة (ن) زانت لراع التشفّي

شروى سجينن بالظليمة تورَّط
وفي كف سجَّانن وعيّا يعِفِّي

قد له كثير ايام بالنوم ما غط
زاده حفاف وبالغثا مستحفي

أشربتني كاس(ن) به الموت الارقط
خليتني عقب العقل مستخفّي

واودعت بي حزنن بجوفي تصلقط
مره يضيّعني ومره يضُفّي

يا سن ياللي بالاباهم تِقَرَّط
عضوضك بقلبي دمّها مذرهفّي

أو كن قلبي بالمخاطر يْلَعَّط
خفوقه كما طار(ن) بكف(ن) يِدِفّي

ريحة حروقه فوق نار(ن) تشلوَط
بين الاضالع ينشوي ومتخفي.


بقلم : عابر السبيل

 

[عابر السبيل]

كم يعتصرني بعض الاحيان طاريك
وكم تختطفني م التبسّام ذكراك

سبحان رب ن بينهم حيل حاليك
ياللي مع الانفاس ياحلو مجراك

لو انت ليلي عشت الايام ساريك
وياكم يطيب لواله القلب مسراك

ياكم اوقّف بالمواعد محاريك
وياكم يروح الوقت للي يتحراك

شالت هبوب الوقت رسمك واثاريك
وكم اكتبك ياصاحب القرط واقراك

باقي بسطري تايه ن من مواريك
كن الزمن يحفر لذكرك ووراك

عرفت عقبك فخ الليال وشرابيك
مستور قلب وفعل الايام عرّاك


عابر السبيل

 

[عابر السبيل]

لا تنشد المجروح من ويش تبكي ؟
خله ترا ما فيه يا حلو يكفيه

لولا هموم الصدر ما كان يشكي
ولا جاد دمعن فوق الاوجان يبكيه

قالو تفرَّج قلت يمكن وبلكي
وراح العمر ما بين يمكن وبلكيه

يا ضيقة (ن) بالصدر يكفيك تكِّي
شوفي لغيري م الملا ثم تكيه

مثل القبر ضك(ن)معا ضيق ضنكي
ومليت من ضك الحساير وضنكيه

لا به يقينن واقضبه مثل شكي
ايقنت انا مره برمحن تشكِّيه

قلبي كما الدينار في كف سكّي
وش كثر دينارن بكفك تسكيه؟

عمر الزقاره راح مزِّ(ن) ومكّي
وعمري زقاره بين اشافيك مكّيه

لي عبره تمسك ولا لي تفكي
يا ماسك العبرات للقلب فكيه

كنك كتبت اليوم بالكف صكي
وصكي ورا بابن بياسك تصكيه

ضيفك بقلبي جالسن ومتركّي
وابغضت ضيفك من مواجع مراكيه

لي ناطقن بالليل حلو التحكي
ويروي لك القصه مع الليل حاكيه

لا يا هزيل الطيف مشيه توكِّي
شيب بعيني مشيته مع توكّيه

عابر السبيل

 

[عابر السبيل]

كـريــم يـــا بــــرقٍ شـعـوقــه تــعــروج كـسَـر ظــلام اللـيـل شـاعــق عـروجــه

مـن بارقـه حــط الفيـافـي كـمـا الـمـرج ذوب الـذهـب يسـطـع بمظـلـم مـروجــه

الـبــلّ تـــرزم والـدبــش لــــه تــمــاوج منـهـن خـلـوجٍ قـــد لـهــا وقـــم حـجــه

ولــي خـلــوجٍ تـخـلـج الـقـلـب بالـخـلِـج انـتــي وأنـــا كـلــن خــلاجــه يـخـلـجـه

وحمام ياللي ممرح(ن) ويش ذا الهزج وش ذكّــــرك هــــزجٍ بـلـيــلٍ تـهـزجــه

صرمـت لـي ضلـعٍ واحيـيـت بــي لـعـج ضاقـت شواجـن مهجـتـي مــن لعـوجـه

اكـسّـر العـبـرات فـــي خـافــي الـمـهـج يـشـبـه لـمــوجٍ الـيــا تـلاطــم بـمـوجــه

يـتـلّــهــا قـــلــــبٍ بـــدمــــه تـــضــــرّج يــا عـونـة الله مــن شـنـايـع ضـروجــه

يـا شـارب دمــعٍ ودمــي عـلـى الـمـزج تـدعـي علـيـك مــن القـوافـي زعـوجـه

حـبــك بقـلـبـي بـانــيٍ شـاهــر الــبــرج واصـوغ انـا القيفـان مـن راس بـرجـه

ســلام يــا عـيــنٍ حـلاهــا مـــع الـغـنـج يـــا زيـــن عـيــنٍ زيّــنــه زود غـنـجــه

اذا سمعـت اسمـه معـا طــارف الـهـرج يـــــــرج قــلــبـــي راج روجٍ يـــرجِــــه

وإن زال زولـه جـلّ الاضــلاع لــه لــج لـجــة سـوانــي شـربــة الـــزرع لـجــه

إليـا مـشـى كــن فــي عيـونـي تـمـروج كـــن الـســراب بـنـاظـري راج روجـــه

يــا مبـسـمٍ زاهــي ثـمــانٍ كـمــا الـثـلـج يــا رمــح عـنَـانٍ فــرى الـقـلـب خـجــه

يـا عنـق ريـمٍ عـاودت عـقـب مــا هــج تـبـى الهجـيـج وعــاودت عـقـب هـجـه

مـتـى عـلـى الله عـســر الايـــام يـفــرج ونلقى مـع اللـي تشتهـي النفـس سجّـه

وارتــاح مـــن ســـوّاج هـــمٍ يـتـسـاوج ويــمـــوت عـــــلاَجٍ بـقـلـبــي يـعـلـجــه

تسـرق عيونـي نـظـرةٍ فـيـه الــى ســج احـيـا بـهـا مــن قـبـل مــا يـثـور عـجِـه

عـلـيــك قـلـبــي كـــــل يـــــوم يـتـبـعَــج تـبـعــاج بــيــتٍ بــعَــج الــعــج فـلــجــه

كـنــي يـتـيـمٍ فـــي الـمـسـاجـد تــحــوَج مـــا ادري شـمــالٍ او جـنــوبٍ يــوجِــه

عـلـيـك دمـعــي كــــل ســــاع يـتـزعــج تـزعـاج وبــلٍ خـضَـب الـقــاع زعـجــه

أســــود ثـلـيــلٍ فــــوق وجــــهٍ مـبـلَــج وبــالــج صــبــاح روع الـلـيــل بـلـجــه

إليـا ذكـرت رمــوس عـصـر لـنـا ادلــج ابـكــي زمـانــن يـاكــل الـــروح دلـجــه

مطيتي الهوجـاس والشـوق لـي سـرج آصـــل بـهــا ديــــارٍ بـعـيــدات فــرجــه عابر السبيل

 

[عابر السبيل]

كلّ ن نهار العيد عيده تهنّاه
وانا نهار العيد عيدي نحيبي

مرحوم ياحبن قديمن دفنّاه
عز الله اني عقبكم بان عيبي

كم هاجسن لك بالمفارق شكيناه
ياخذك وقتن مالك الله يجيبي

عليك قلبي يابسات ن حناياه
وانا على لاماك اقنب قنيبي

ان ابتسم ذبح المعنّى ثناياه
واليا لحظ جنِّك سهومن تصيبي

لو ينعرض هرجه على الطير غناه
وانا اشهد انه علتي والطبيبي

لا باغي(ن) غيره بخيره وحسناه
ولا نايم(ن) ليلن وهو لي طليبي
لا واعلى مسكة يميني بيمناه
وارقد هني وخابر انه نصيبي

ينلاع قلبي له وروحي تمناه
باسباب هجره صرت كني مشيبي
لو ينشرى قربه بالاموال جبناه
وارخصت من شانه بعيد وقريبي

لي روعة(ن) لامن حنا ذكرناه
بين العظم والجلد تدبي دبيبي

عجز البخت يبني لنا ما حلمناه
وحظي من الاقدار جرحن عطيبي
غدى ضميري له قصورن مبنّاة
وفي عالم التذكار امري غريبي

قبل امس وسط السوق يمشي وشفناه
ماكن كنته في المواضي حبيبي

ياحيف ياللي بالقصايد رسمناه
بيتي من الاشجان لحنه طريبي

سارت بنا الايام دربن مشيناه
والعمر كمّل مابقى الا سريبي

هذا الكلام اللي م الافواه قلناه
والله على صدق الملافظ رقيبي


عابر السبيل

 

[عابر السبيل]

ياللي حضنت بناعم الكف خديك
تشرق بها بسمه تلظ الخوافي

لون البنفسج يالغلا تايهة ن فيك
وخلفك شفق شمس ن تبيها عوافي

شفت الخيال مسنّد ن خلف كفيك
كف ن بذبح الخل شبره بيافي

ياسي مع الرجوى تلاهث بحديّك
يبين ياسي فيك والعشم خافي

ياخادم القنديل شبيك لبيك
حي ن سراجك والعتم منك طافي

لا يامدى شوفن يوقّف بحديك
سوداء الكواحل والمراميش ضافي

كنّه سرابن بين عيني وعينيك
واموت ظميانن بحد الاشافي

سحبة هدبها مثل لاسك وردنيك
ظله جحيم وشوكها موت حافي

يا ابجد الحرفين صرنا نشاكيك
ويخلط رزين العقل فينا خفافي

يبكي النجم لا جيت ودي اناجيك
دمعه شعاعن حط ليلي شظافي

ياشق في قلبي على الله مرافيك
وان ما رفاك الله فلا فيه رافي


عابر السبيل

 

[عابر السبيل]

صحيت من نومي على نور شمسي
واثره بشاير وجهها واحسبه شمس

ثابت غلاهم مثل كفّي وخمسي
وقل لي وش كفوفن خلت منهن الخمس

لاكاتب حروفن ولا فيك لمسي
خسمة حواس ن ضيعت حسة اللمس

كني ضرير (ن) بدّل الشوف طمسي
وش فايدة عين الى شوفها طمس

اشبه لميّت ودعوا وسط رمسي
حي ن وميّت وسط الازوال لك رمس

لامصبحن صبحن ولا امسيت ممسي
في عالم الاحباب ماشفت لي جنس

تفرح قبال الناس وبالقلب عمسي
لابارك الله فرحة ن غالها العمس

كنك سليم ن والوجع فيك غمسي
طعونن مع التذكار تزداد في غمس

والقلب بن ن فوق نارن تحمسي
وسمر ن حدا المحماس يذكي لها الحمس

ضجيج ماضينا تخالط بهمسي
غريب ياماض ن مضى بس لك همس

خذيت انا ادروسي لباكر من امسي
خيرن لباكر درسي اليوم يا امس


عابر السبيل

 

[عابر السبيل]

إيه ايه ياللي كنها فص محار
من غليها سمَّوه من غالي الدان

مجلوبة(ن) بالكف من موت بحّار
حطَّه على لوحن على الموج م الزان

سليلة الامواج يا بنت الاخطار
يازين زينك لو دهر عصرنا شان

حارت على لونك بصيرات وابصار
من زود زينك واصفك راح عميان

كم مات في سعرك من التبر دينار
زنقيل دينارك مشى اليوم طفران

تشبه زليل الماء على راس مسمار
صغير مطراقه على وجه سندان

تكفّ وتبصر فيك عَميَات الانظار
في قلب من شافك تِشيدين عِمدان

صرتي نجيَّ الورد معشوقه ازهار
دمع الزهر في صفحة الدان ودَّان

اوقيّة الاحساس يا زوج قنطار
او تولة العنبر معا ريح مكنان

حطيت ريشن في فوادي ولك طار
بدَّل معاليق العنا بجوز جنحان

خليتي طيفن مع الريح سيَّار
وفي لوحة الاشعار ريشه وفنان

فوق السحاب العين للدان مسبار
ورزين عقلي عضتني فيه بجنان

يا صاحبي تنصاك م السطر الاشعار
تموت بك قيفان وتحياك قيفان

يوم اللحن روحن حيا منه مزمار
عود القصب غنَّاك ياحلو بالحان

كم تنتحر في لحن الالحان الاوتار
اليا رجح لحنن بلحنن بميزان

ومسيرها تصبح سواليف واخبار
تذكار دانن بين سجنن وسجان


عابر السبيل

 

[عابر السبيل]

(نجمة الماي)

يا نجمة (ن) تِعْكَس على صفحة الماي
ومع نفحة النسمة تراقص وتجري

واليا سكن ماها تجي منية شفاي
اصير انا فوق(ن) وهي تصير حدري

مره تصير فراش ومرة لي غطاي
وحبيت نجم(ن) في دجا الليل يسري

بعثرت انا الميعاد في خوض يمناي
ثم صار نجمي بالملايين سحري

ابكيك بالبسمة واباسمك ببكاي
غيرت بي حال(ن) وانا كنت ما دري

اخطيك باعذارك واماشيك بخطاي
سمعت انا عذرك ولا سمعت عذري

ياكم ليل(ن) راح ما ارتحت بغفاي
وبيحت لنجوم السماء خافي امري

اغنيك في نوحي واناجيك بغناي
حيرت انا في حزة النوح قمري

ياعلة بالروح ما شفتي دواي
مر(ن) حلاك وسكرك صار مري

اشوف انا اقصاكم تقارب مع ادناي
مفضوح الاقصى وداني السر سري

اطلبك يا يأس(ن) ترافق مع مناي
يوم اختلط مع صاحي العقل هذري

طالع وناظر في مكانك بحنياي
وطالع لبستان الزهر تحت سدري

كتبت انا اسماءك وشطّبت اسماي
وتلقى حروفك اشرقت جوف صدري

يا اخر الدنيا متى صرت مبداي
عمرك بدا بي وانتهى فيك عمري

اربع حروفك يالغلا همسة الناي
سكر(ن) لفكري وغولها غول خمري

يا غصن ورد(ن) توّجه وردة الشاي
اخضر رطيبك وايبس الهجر خضري

بقلم : عابر السبيل

 

[عابر السبيل]

ياكم يجفاك الذي ماجفيته
وكم يكرهك من كنت يومن تحبه

وياخذك من بعض العرب من عطيته
وكم مادحن مدحه يجي فيك سبه

الله ياعمرن بحبك قضيته
اهدر سواخن دمعة اللي يصبه

الله ياللي ب الجميلة نويته
كم شب في قلبي بحبه مشبه

في سويدا القلب شيدت بيته
وصكيتها ياصاح قفلن وضبّه

واليوم ياوقتن بشوقي حييته
اليوم لادارن ولا به مربّه

واصل طريقن بالمحازن مشيته
ووهم ن خلقته يا ابلج العين كبّه

مسير ياشاعر عيشته بس صيته
يشبه لجوعانن والعشا من مهبه

دواك هومعييك اوّك عييته
ياتايهن يبحث مع الناس طبه

عابر السبيل

 

[عابر السبيل]

فكرت ف المقسوم من حظ غيري
ما فيه حيله لا بغى الله يتمّه

من اولن كنك على الغصن طيري
واليوم ورد الغصن غيري يشمه

وش جبت لي يا لايج(ن) في نظيري
سم الذي قد جبت بالاسم سمّه

واليوم حاير والمحاجر تحيري
تنقط على خدي دموعي والمّه

شفت الاصابع وانكسر لي ضميري
يا دبلة الاصباع صرتي مطمّه

طول النفس واصبح بصدري قصيري
وصدري يضيق وفتَّقه كبر همه

مبروك يا راع الزهر والحريري
مبروك ملكة غالي(ن) مستتمه

فرشت لي م الحزن فرشن وثيري
واصيب بعض العقل واخطي واخمّه

اليوم حبي مثل حب الضريري
جفت عيونه والضماير مجمّه

يا نفس سيري با شهب الوقت سيري
مع شاعرن يكتب على السطر دمه

مهموم همه صار عنده سريري
يوم الليالي ما رعت فيه ذمه

بقلم : عابر السبيل

 

[عابر السبيل]

أسود على ابيض صارخ الحسن حسنك
يا متوِّج(ن) ليل(ن) على وجه(ن) اصبحْ

ياجامع الضدين في جنان سجنك
اسعد سجينين(ن) وثالثهن املحْ

انا اذكر الله فاخر الزين رِدنك
الله يفكْك من عيون المشَفَّحْ

يا شادن(ن) م الريم واحلو شدنك
يا حلو شعر(ن) م الهواء ثار يلفحْ

يا لابس المحزم على هضم بطنك
نحيل خصر(ن) عيَّره وافي اكشحْ

يا ناعم(ن) انعم من القطن قطنك
تلعب على موج(ن) لشوفك ترنَّحْ

أظرف خفيف(ن)في الموازين وزنك
تمشي على الماء ما تعلَّمْت تسبحْ

أعذب ربابه هي تناغيم لَحْنِك
تشنّفْ لحونك مسمع(ن) فيك يفرحْ

لويسمع البلبل هوازيج رطنك
غنى كلامك ساري الليل ما امرحْ

هو انت إنس(ن) اوتزاويل جِنِّك
أو انت طيف(ن) في عيوني تَلَمَّحْ

يا خالط(ن) شَهْدِك على ذوب سمنك
في مبسم(ن) ورده على الخد فتَّحْ

يا ليِّن(ن)م الغصن تفخر بْلدْنِك
فوقك من القمري هَزُوج(ن) تِمَرْجَحْ


من هو عصر قلبي على ازهار غصنِك
دمّي على زهورك بالالوان يرشحْ

ما ادري الهواء يهوى مفاتين فَتْنِكْ
والا سحرت الريح وجاتك تَنَفَّحْ

قامت تنفس م الشذايا بوجْنِكْ
جنون(ن) على ريحة ورود (ن) تِفَوَّحْ

باسبابها ميلك يسارك ويَمْنِك
سلام غصن(ن) مع هواء الريح شرْشَحْ

أشنع حروب(ن) ف الميادين هَدْنِكْ
يا مازح مزوح(ن) خفيفاتها ارْزَحْ

تمْطِر حصى(ن) من رايح المزن مزنك
بروقك رماح(ن) في السراجيف تَرْمَحْ

شفت الصحاري تايهات(ن) بمدنك
في فيّ ظلك واسع البيد تمرح

يا مخلّي(ن)تحت المحيطات سفنك
بحرك على غارق سفينتك يطفح

ما شفت انا من واسن العين وسنك
غضيض طرف ومرمش العين يجرح

ارهف اصم من المساميع اذنك
ابكم وهرجك م التفاصيح افصح

اشوف صمتك ف المناجاة حصنك
اغلطت صحَّي وغالطك يالحلا صح

خليت قلبي من لوايعك يَضْنِكْ
وخد(ن) من هتون المدامع تِقَرَّحْ

رميت انا باكي القوافي بحضْنِكْ
شفهن وناظر بالقوافي تِصَفَّحْ

خذهن ترا هن من مواليد حزنك
أجداث قاف(ن) باحمر الدم تنضحْ

وما ظنتي تكرم بيوتي بصحْنِكْ
يا اكرم بخيل(ن) كرمتك وافي الشَّحْ.


بقلم : عابر السبيل