انفاس في سطور

[عابر السبيل]

في عتمة التذكار ياحلو شمعات
ومع كل شمعة يالغلا منك ليله

شمعات نارت في دهاليز عتمات
وكل(ن) للاخرى يا رفيقي خليله

تجاورن في الزين بالوصف جارات
وحلو اللحن للشمع انا صرت اشيله

يا للي لوى لي باصبعه خمس خصلات
يا خمس خصلات الغلا لي فضيله

ارشها عطرن من اكمام وردات
شي(ن) تجيبه زهرة الزنجبيله

من غليها تسوى من التبر نيرات
ما دامها خصلات وافي الجديله

يا جامع البسمات مع حر دمعات
دمعات حزنك يا الغلا ويش هي له

لايا ذهب عصرن من الوقت مامات
تلقى لفكر الصب مليون حيله

يا كم يهيج القلب مع ريح هبّات
لا قام ريح الصبح ريشه يشيله

اشوفني بك مثل معدم سلامات
يطرد كريه الهم وغصبن يجي له

عليك اسطر من عنا القلب كلمات
من عامي (ن) ضيع بحبك دليله

نثر(ن) تباكى لباكي القاف وابيات
دمع القوافي جاري (ن) لك مسيله

ما باقي (ن) يا صاحبي غير تفتات
راح اكثر ه واليوم قل ب حصيله


عابر السبيـــــ(محمد الحربي)ـــل

 

[عابر السبيل]

جلل ظلام الليل روس المبادي
من ظلمته روس المبادي غدت سود

ثم ابتدى ليلي وحضّر سهادي
وغنى سهر ليلي على الناي والعود

لا ياغريب الروح لا وين غادي ؟؟؟
كنيك معا ليل التهاميم موعود

ماناح من لابّاسة الريش شادي
من فوق غصنن لاعبه هادي النود

الا ويبدي لك من الدمع حادي
وهم ن يتك النفس بالصدر مرجود

يامسيلن من رهف الاحساس وادي
سيلك ترادم قض في دربه اسدود

يامتيّه ن م الضاد بالقاف ضادي
وش لك بخل ن من سواياك مضهود

يامنيتي دنياك فيها عوادي
تغيّب لخل ن عقبما كان موجود

يا ابيض الذكرى بعالم سوادي
الحال والله بين شاهد ومشهود

اسكب بوسط البيت صارخ ودادي
وصارخ ودادي عاد م الولف مردود

يوم المطايا قاف فوقه شدادي
بيوتن خلت يا صاح من كل منقود

حبري لها ياحلو من عين كادي
مع دم معلوقن معا حبرها زود

يوم ان كل ن م المواليف جادي
ولا لك الله شفت يا منيتي جود

عابر السبيل

 

[عابر السبيل]

لحظة تذكِّر عندها القلب ينهار
ثم تنقسم روحي من الفقد نصفين

بالعين دمعي والجوا يشتعل نار
نارن بجوفي والبحر صار بالعين

ياليت ندري وش يجيبن الاقدار
ودارن حوتكم يا غلا القلب في وين؟

انشدك عن خدن به الورد وازهار؟
هل هو على خبري ذهول المجانين؟

خدن خلط لي زنبق الزين وانوار
توي عرفت الخد يصبح بساتين

باقي كلامك يشبه اللحن واوتار؟
يا مهدي الفنان زين التفانين

باقي على دربك من الضيق محتار
ويا كم سين(ن) يالغلا يتبعه سين

قل لي عن عيونن بها السر واجهار؟
يا كم كتبت ابها بقلبي دواين

جفت لك عيونن وانا عندي امطار
خدين منها يا غلاتي غريقين

بالجو عيني ما لقت غيرك اقمار
تصفى السما لك ساعة انك تجلّين

الله يا سحرن سحر كل الابصار
نور القمر لك يا غلايه فساتين

واليوم قلبي ياكله منك ما صار
ليتك على الذكرى لمثلي تحنين

غديت طيرن يلهجك فوق الاشجار
يا سامعي ليتك لصوتي تردين

يشوقني لك فوحة البن وابهار
واحن لك ما حن قلبي تحانين

بالوقت كني لك مع الفقد سنمار
اللي انقتل يا صاح من فعله الزين

ياسلوتي لو كنت في مبعد الدار
سلوات طفلن لج حوله بزارين

كم اشتري لك يا رفيقي م الاعذار
كن الخطا مني ولا انتيب تخطين

سطور حبن تكتب اليوم ب اغبار
ابهت بها وقتي ولا فيه تلوين

واليوم انا الهث راجي(ن)منك الاخبار
وش سوت الايام ووش هو تسوين؟

بالليل عندي لك ثقلين زوار
والعين منها للمدامع مواعين

للحين تضحك لك مزاهير الانهار؟
والا انت مثلي توفي الدين بالدين؟

من بيننا تضفي التواعيس الاستار
والزين عقبك ياغلا القلب جا شين

القبر يشقى به من الناس قبّار
لزوم يحضر به بعيد المعزين

اغليت كف(ن) زان في شوفه اسوار
وعنقن زهى من نايف التبر قرطين

واليوم كني صورة(ن) سجنها اجدار
تلعب بها من ظلم ليلي شياطين

يا كم سد(ن) في مناجاك ينهار
ما انحاز كف(ن) من كفوف الموازين

الله يا غصنن تمرجح بالاثمار
ويا عين كم يشقيك منهو تشوفين

يا كم قلبي للحزن فيك يختار
عاش التعاسه في ديار السعيدين

يشبه لعازف ينفخ الليل مزمار
كنه يغني بين جمع المصلين

اتلى كلامي يا نحيلات الاخصار
خصرن نحيلن يضهدنِّه عظيمين

قولي التذكر عنده القلب ينهار
يوم انقسم روحه من الفقد نصفين.


عابر السبيـــــ(محمد الحربي)ــل

 

[LioN KinG]

قصيدة رائعة يعطيك ألف عافية

 

[عابر السبيل]

ليت الليالي تعتـذر من المحبيـن
ويعتذر عصر الشقا من ضحاياه

وياليت منهو قد تمنيت هالحيـن
اليا فقد شوفي بيـوم(ن) تمنـاه

عليه اصلـح باكيـات التفانيـن
وما ناح من بيت (ن) عليهم كتبناه

ياغصن وردن غار منه الرياحين
يامخجل السوسن بزينه وحلياه

ياناعم الاطراف يا منتهى الزين
لا يابعد قلبن تنثر دماياه

عابر السبيل

 

[عابر السبيل]

ما كان لك دربن على ابواب قلبي
لكن معك لمغولق القلب مفتاح

يا ساحري وانته بشرقي وغربي
قلبي معك طيرن لفح لك بالاجناح

تناسبت عكسن بعيدك وقربي
وفصلت لي من نار ردني مع وشاح

تقول يا فارع قوامن وحربي
خلى المدينه يم نجده والاسياح

عقبك عمار القلب يا صاح خربي
وافراح عمري لك تبدل بالاتراح

خليتني حزنن تباكى المثل بي
والا سرابن باوسط البيد سرساح
عابر السبيل

 

[عابر السبيل]

فكرت ف المقسوم من حظ غيري
ما فيه حيله لا بغى الله يتمّه

من اولن كنك على الغصن طيري
واليوم ورد الغصن غيري يشمه

وش جبت لي يا لايج(ن) في نظيري
سم الذي قد جبت بالاسم سمّه

واليوم حاير والمحاجر تحيري
تنقط على خدي دموعي والمّه

شفت الاصابع وانكسر لي ضميري
يا دبلة الاصباع صرتي مطمّه

طول النفس واصبح بصدري قصيري
وصدري يضيق وفتَّقه كبر همه

مبروك يا راع الزهر والحريري
مبروك ملكة غالي(ن) مستتمه

فرشت لي م الحزن فرشن وثيري
واصيب بعض العقل واخطي واخمّه

اليوم حبي مثل حب الضريري
جفت عيونه والضماير مجمّه

يا نفس سيري با شهب الوقت سيري
مع شاعرن يكتب على السطر دمه

مهموم همه صار عنده سريري
يوم الليالي ما رعت فيه ذمه

بقلم : عابر السبيل

 

[عابر السبيل]

ياقف على حد الشفق م الغلا عود
يلوّح يودعني ب ردنه مساها

هيفا المخاصر تجمع البيض والسود
بيض المقابل والليالي قفاها

سحر الجدايل لا تلاعب مع النود
تبصر به عيونن وتنسى عماها

تحط في قلبي على النار بارود
ينسى المصلي سجدته من سهاها


عابر السبيل

 

[عابر السبيل]

يا معطي(ن) موج البحر منك نظرات
كنك تحرّى لك غرايب سفينك

يلاعب لشعرك م الهواء لفح مرات
يخفيك شعرك نوب ونوبن يبينك

ميامن القذله تخالط ويسرات
ويضوح في اللفحات صافي جبينك

يا مهدين للبحر زين ومسرات
قام يتفكر في جمالك وزينك

صيري كما عطرن سقط منه قطرات
تبقى على قلبي وتبقى سنينك

ينجن لك عطرن ترك حلو زهرات
يلازم لطيفك دبلة(ن) في يمينك

تلقى عبيره بين اياديك زفرات
يملا لك الشاطي على شان عينك

عابر السبيل

 

[عابر السبيل]

لا يا سنين العمر من عاد باهديك؟
غير السطور اللي بوقتي يتيمات

اغرب سنينن يلهج القلب ماضيك
واحلاك وقفاتن معا ماضين فات

يجري على قلبي من الحب واديك
وانتي غريباتن واحب الغريبات

للحين باقن في خدودي مجاريك
دموعن جرت راحت بحب المتاهات

ما عاد نلقى من البواقي بواقيك
كنتي ثقيلاتن وصرتي خفيفات

يا كم تحسّف بك بواكي اماقيك
لا يا بطياتن وصرتي سريعات

قال الحزن لك حولِّي ثم با عطيك
ومن ساع حوّلتي اهو قال لك هات

عابر السبيل
​

 

[عابر السبيل]

سلام يا وردن على طور سينا
مضى الزمان وزاهي الورد بك حي

اوه اوه يا قاس(ن) على نوع لينا
طويتني يا صاح طي(ن) على طي

يا كم بعنا م الغلا واشترينا
ولا بقى من ربحنا يالغلا شي​

 

[عابر السبيل]

خيال زينن في يده فاخر الورد
ما ادري يشم الورد وإلا يشمه

من شفِّته ريح(ن) يخم الجوا سرد
يا شفة(ن) كنك تناظر لدمه

توت الشفايف خلفها يرقد البرد
ساحر جمالن ما رعى اليوم ذِمّه

تقدر تحط الورد والشف في طرد
والكل منهن عاطر الريح كمّه

اللي على عرش الهوى جالسن فرد
يشتتني افرادن واعاود والمّه


عابر السبيل

 

[عابر السبيل]

كم شدني لك تالي الليل طاري
او ريح طيبن فاح في محفل الناس

ياكم يجري لك على الخد جاري
وياكم شربنا م العجيبات من كاس

اهذي على نجمن مع الليل ساري
لا دك بي من واهس الفكر هوجاس

يا جنتي وانته مساعير ناري
يا قصة(ن) صارت على القلب وسواس


عابر السبيل​

 

[عابر السبيل]

شريدة الايام باقي لها انفاس
تقبل وتقفي كل ماعنّ هاجوس

مره تغوص بعالمي مثل غملاس
ومرة لها حد(ن) كما شفرة الموس

تجمع لنا ذيل المواضي مع الراس
يا كثر ما شفنا من الاذيال والروس

تخلط لنا صفر المعادن مع الماس
شي سليم وبعضها ينخره سوس

تضحك وهي تحفر لنا لحد الارماس
مره لها داس(ن)ونوبات له دوس

تملا لها من زاعف السم بالكاس
تشهد على موت الضحايا لها كوس

دنيا تخبط الناس في وصف عرماس
متخالف فيها المواتم مع عرُوس

يا لادن غصونن تهاوى ونسناس
تعيش حلم وتالي الحلم كابوس

يا مثل هيفاء طاري العود ميّاس
ترفل بثوب الزين في وصف طاووس

يا ريح مي الورد يا نفح الاحساس
مجناه مرج(ن) في تضاريس طوروس

ناعم بنان(ن) يجرحه لمسة اللاس
وعينن لها رمشن وقف مثل حاروس

ان قلت حرّاس(ن) فهن مثل حراس
وان قلت نِعَّاسن فهن جزم ناعوس

يمشي غضيض الطرف مع جملة الناس
ويلس قلبك من نواعيسه لسوس

عابر السبيل​

 

[عابر السبيل]

باقي بقايا العطر بآخر رساله
يشبه لذكرى ن دقت ابواب قلبي

م الصاحب اللي شد قلبي وشاله
ولهيت عن قلبي ادوّر ل طبّي

مامع حبيبك يالغلا الا ظلاله
ونار ن على الاضلاع دايم تشبي

ارتاع لا هبت صليفن شماله
وان جاء هواكم قلت ياريح هبّي

أغليك ما اغلى صاحب المال ماله
وكم قلت ياعين الشقا اليوم صبي

عابر السبيل

 

[عابر السبيل]

يامعلقن حرفي على غض الانهاد
مليتني غيره على اول حروفي


عطيت حرفي منك حلوات الاوساد
شي(ن) تحبه م الملامس كفوفي

عندي معك بالحب ياحلو ميعاد
وانا على الاسفار يا كثر طوفي

علمتني بالليل ياحلو الاسهاد
ظاميك انا وانته عجايب رشوفي

في وصف مثلك تعجز الصاد والضاد
ويعمى على سطري من الوصف شوفي

صار القلم بالسطر سرداد مرداد
وانته مع الاحلام غالي ضيوفي

أهواك انا ياجامعن كل الاضداد
ويموت في شوفك مع الشوف خوفي

صرته شرابي ياضنيني مع الزاد
وانسى على شانك عجايب ظروفي

لك في خفوقي ياغلا الروح مقعاد
وعيني سبب فرقاك دوما(ن)ذروفي

خليتني شاعر غريبن باالانشاد
وانا على فقدك كثير الحسوفي

هي قصة بالفكر ياحلو تنعاد
قصة غرامن تذبحه لي صروفي

ينقص لنا وصلن والابعاد يزداد
ينقص وهمي ياكل اليوم جوفي


عابر السبيل

 

[عابر السبيل]

سلام يا سرن ب هالعين مدفون
وشي ن تخبى خلف توت الشفايف

القاتل اللي يذبح الناس بالهون
راعي ثمان ن بالمباسم رهايف

كم يختفي في حضرتك زاهي اللون
طيفن على كيف المضامير كايف

انا اشهد انك م الحلى حيل مشحون
حملك ثقيل وحمل غيرك خفايف

عابر السبيل

 

[عابر السبيل]

في خلسة من زمان جست حول ديار كانت لي ولك ,لم يعد هناك منها سوى بقايا كانت في سفور وايتمت الحضور
هل افلست من غدى بكاء على امسي ؟؟
مالي ارتحل وقتي لك واجوب السطور بك ؟لما اتسول الكلمات ولماذا اوقد شموع من الذكرى لك في مكان لم يعد به سوى صورة معلقة كهل الزمان واقفر ولا تزال الابتسامة بتلك الصور تقاوم الليل وتضيء المكان تلوك الريح المكان ويزدريه الزمان ولكن يبقى ثمينا انها واحتي في هجير النوى وضجيج الذكرى
زوايا خلت من الشموع وصرير الابواب الذي يخطرني بخلو المكان فأكاد اسمع الصمت في صلج من حزن وديدن من شوق ترفعه نجاد الفرح وتهوي به وهاد الاحزان
خلى المكان وهلك الشمعدان يجوس النور حينا ويختفي فأراني على الجدار الوح واختفي بين جيئة وروح , اعوج رقاب المطايا لمكان واهدر قلبي لزمانك .
تنظر في داخلي ولم يبقى سوى فتات من ماض اقتات به ,
سأظل اجوب سردك واحتفظ ببقايا وردك .
سيأتي يوما وألحق بك فاحسن استقبالي واكرم وفادتي



عابر السبيل

 

[عابر السبيل]

صح منطوقكك شاعرنا

صح بدنك وصح حالك وفالك شكرا لك

 

[عابر السبيل]

لون الكرز شف ن تطابق على شف
من بينها قلبن يرشه بالالوان

يموت وقت الصد والشف ماجف
شفّين فيها للمواليف عنوان

من فوقها ومن تحتها الورد ينلف
يا شفتينن وردها صار تيجان

ياقلب ياللي كنك الدف بالكف
ويجاوبك قلبن رجف مثل طيران

عابر السبيل