مساجلة شعرية بحب قيس وليلى❤ مع (white wizard.....قرينة القلب)

white wizard · 4 أكتوبر 2021

عاوز اقولك كلام كتير

انك مثلا لو تبقى جنبي

احس ان الدنيا دي مملكة

وانا الأمير

انتي تظني اني احبك

لا وربي دا اللي جوه

بقلبي ليكي اكتر بكتير

من كلمة بأربع حروف

حتى لو قلتلك بحبك

كتير ألوف

لساها فقيرة

مش قد شوق

ولا قد حيرة

ولا أد قُصة بتهفهف

فوق الضَفِيرة

يا هل ترى ممكن يا قلبي

تبلي ريقي بكلمة حلوة

تكافئي بيها عرق الأجير

وصدقيني لساني بردو

عاوز اقولك كلام كتير

نغــم · 4 أكتوبر 2021

ايوه بحبك ونَفَسي طويل

وصوت موالك ساكن سمعي

ماأسمع غيره ، من المواويل

ماأنا في دروبك ؛ بزرع بذرة

وصل ، ولا أتعب ..

مهماً كان الدرب طويل ..

وكل كيانك يسكن كُلّي . .

ااه من كلّك .. انت ياللّي

يميل الغصن الثابت جدره

وغصنك فرعه ، كان مايميل ..

يفضل يسند ..

وكمان يفضل صمتي بيعند ..

ويصرخ فيا بصوت مبحوح

أرفق حال من شوقه بيضعف ..

ولا كان عمره ضعيف وهزيل ..

وأنا عرفاك ياحبيبي .. شجاع

صاينه رموشك حبي بدمك ..

نبضك من فرقاه .. ملتاع

بعرف عنك ..

حَسَّك قلبي ، كأني أنا أمك .

وأرجع أقولك ..

اه انا بحبك ..

ويرضى هوايا يعيشلك دايماً

وجوا عروقك يجري ، يسيل .

وهفضل أحبك ، ماأنا نَفَسي طويل .

الاستاذ · 4 أكتوبر 2021

قيس وليلى
هنيئا لنا بكما

white wizard · 4 أكتوبر 2021

طيب خلونا نخلي جزء من المساجلة لمناقشة السلبيات الموجودة في المجتمع بشكل كوميدي وف قالب زجلي كدا ، يعني مثلا حد زي ندى مثلا معلوماتها عن الطبيخ زي معلوماتها عن دورة كارنو ف الديناميكا الحرارية

ف يلا بينا بعد اذن شريكتي طبعا الأستاذة

@نغــم

عامله كيوت متغندره
والقُصة كمان متسنتره
وتقول دا انا حتة سُكره
وان قلت يا حلوه أطبخي
على طول قوام تجيب ورا
تقولي دا مكانش اتعذر
وع الطريق بيبيع جزر
وحياة مَامّا وحياة بَابّا
ماعرف التوم م الكزبرة

نغــم · 4 أكتوبر 2021

الساعه دقت دقّه ،
دقّه
وصوتها شقّ ف الصمّت
شقّه
ساكت كأنك ناسي
كلامك
ويوم ماتحكي بتقولي
لأه
جرى أيه ياعم سمعني
صوتك
أحكيلي عنك ، وبلاش
سكوتك
حق حواري انك تُرُده
وأوعاك تجور على شيء
بحقّه
عاملي فيها أمير
زمانك
راح فين جنانك !
رغي الساعات
وسرد الحاجات ..
دا أنا خُلقي ضاق
من طول بُكامك
وخلاص جناني هيطقّ
طقّه .

white wizard · 5 أكتوبر 2021

انا اللى كنت فاتح فى قلبى
خمسين راق
وبقبل كل الكلام جواه
ولو حرّاق
وهمسة مِسا
مستأنسه
بعطر النِسا
ولقمة لُقا
متغمّسه
رحيل وفراق
وف يوم وليلة
خطفتني!!
ام الرموش
شبعانه سُهد
وعيونها البني
لو شافها جبل
يتهد ...
أما الشفايف شهد
والخدود
صهد ...

نغــم · 6 أكتوبر 2021

اااه ياقلبي ..

السؤال موجوع بينزف

والجواب بيبعد ، وخايف

جرحك المكشوف ماينشف

مهما تحكيه ( الشفايف )

فين حبيبك ؟

جوا روحك ليه بينسف ..

ويعبي جوفك بالقذايف .

ضحى بيك وكان بيجزف

حتى دمعك ماهو شايف .

white wizard · 6 أكتوبر 2021

اااه يا قلبي

حمّال آسية

زي ما يكونوا الخلايق

قسموا الفرح بينهم

وفاتوا الوجع ليا

حتى لما حبينا

الضحكة قلبت بدمعة

وانطفت بغدر الهوى

جوانا شمعة

واتاري موت ياسين

كان بأدين بهية

نغــم · 6 أكتوبر 2021

ومنين هنضحك ،

او حتى تيجي

البسمه لينا

ودروبنا تبعد ...

رافضة ضحكة بتلاقينا

وليه نسلّم للظروف

ونملى سمعنا بلحن خوف

وليه نسيب كل الآسى

من فوق سمانا طليق يطوف !

أنا رافضة قيدي

ورافضة قيدك

ولو هواك هو القيود

أنا سمكة حرّة

في بحرك أنت

ويوم ماتغمز

تبقى صيدك

سلّمت قلبي ..

بدون حدود ..

ولو تعبت ف يوم انا ..

خليني أغفى بين عيونك ..

او أحط تعبي في حضن أيدك .

همس الروح · 6 أكتوبر 2021

في حبك ياقيس تكتب الاشعار

فعشقك خطف القلوب والانظار

ولكن عشقك لي اجمل وأعظم انتصار

بقلمي

white wizard · 7 أكتوبر 2021

وعاوزك تكون إلي وحدي

احس بدفا انفاسك

بتدَوِب جليد خدي

تكون فارس مواويلي

وف عز العتمه قنديلي !

ولما ابكي تكون

يا حبيبي منديلي

ولو أعطش شفافك

تكون نيلي

ووقت الحزن تغنيلي

تكون صبحي تكون ليلي

ولو مال عليا الكون

تكوني كتفي وما تميلي

نغــم · 7 أكتوبر 2021

صباح ، وشمس

وكوب ليمون دافي في يدي

بترسم فوق مداه شفايفي

حنين ، وهمس

وعيون حيارى

بجفون ماتطبق فوق شجوني

ورموش ماترضى

بأي .. وَمس

وأيدين .. جليدها

ماتذوب جباله ،

ألاّ بحنوك ، وأيديك

دفا بيزيده لمس .

و حضن فاضي ..

رغم كسوفه ،

محتاجك أنتَ

تطبق ضلوعه ،

وتلم أنفاسه

اللي تاهت دون وجودك

مرة ، ومرة

وعشرين ، وخمس .

white wizard · 7 أكتوبر 2021

أيا حورية الحدقة

أنا المجذوب الذي

لم يطمع في عشقك

الا ببضع بسماتٍ

صدقة

تأبط خصلاتك بين جناحيه

وعلى رنات صوتك الدافيء

المنقوش في وجدانه

اقام يا حبيبتي

الحلقة

نغــم · 8 أكتوبر 2021

أخبرني

أيا رجُلي البعيد ..

من مثلنا قد عاش الحب

وفي جنباته .. بات شريد

وأتقن أن يقتات ( العشق )

كلقمة فرحٍ .. أضحت عيد

وأحيت قلباً بعد .. مماته

كان بفرط السُهد .. شهيد

من مثلك أنتَ ، ومن مثلي

أريدكَ أبداً جداً .. قُربي

وأعلم ما تهوى ، وتريد .

white wizard · 8 أكتوبر 2021

بعد ليلةٍ ممتلئة بتفاصيلك
" ظلَّ قلبي ينهلُ من
فيض ِ الذِكرى حتى ثمل ْ ...
وأدرك َ النُقصان َ فى الفؤادِ
حتى اكتملْ ..
وكلّما ارتوى وَلَهاً
شعر َ بـ عطشٍ
لـ شوقٍ مُحتمل ْ ..
وجّه كفّيه للسمآء ِ
وقال .
ياإلٓهى ما العمل ْ؟
كيف َ أبرءُ مـن وجدٍ
يختلط فيه المشمول ُ
مع من شَمل ْ ....
وكيف كلّما قارب َ
الجُرح التئاماً
أدعوكَ بألا يندمل ْ .

نغــم · 8 أكتوبر 2021

حظي كدا ..

وأنا راضيه ..

أعيشك حلم في خيالي

وأكتم بركان ثاير لهفه

ودموع وجعاني ،،

ليها أداري ..

وأحلم ألقاك ، وأتمنى

كأنك حلم م الجنه ..

ينشد تفاصيل بتجذبني

ونوره يلف في مداري

ولو يوم يقتلني حرماني

هعيش الحلم من تاني ..

وأكفكف دمعي دا بيدي ..

وأحس بأنها يدك ..

نسيم بيزيح رماد ناري .

وكفاية عليّا نَفَسَ صدرك ..

يكون نَفَسي ..

يحسسني أن أنا منكَ ..

حبيبتك ، صاحبتك ، بنتك

وطول عمرك تدوب فيا ..

وعشقي في الوريد ساري .

white wizard · 8 أكتوبر 2021

ولما بحاول اهرب
الاقي طيفك غالبني
حتى لما بكتب
أنا مش بكتبك
أنا بكتبني
كل ما امشي جنب منك
الاقي ضِلّي راح لك
وسابني

نغــم · 9 أكتوبر 2021

خبّرني ياحبيبي

على فين أهرب

من أشواق محوطاني

ورافضة بأنها .. تعتقني !

شوك الهوى بخدوشه

صار أدماني ..

من يوم ماقلت

أن أنت .. تعشقني .

white wizard · 9 أكتوبر 2021

تحملُ شفاهً

صغارا غلاظ

. توزع شوقاً

يعلو السديم

شفاهٌ بلونِ

الوردِ البهيج

تُزفرُ ناراً

تُلهب بوقع

السوطُ الاليمْ

وخدٌ كصفحة

الماء العذب

شديدُ الرَوَاق

من شدة صفاه

يكاد يبينْ

طويل اسيل

حلو المزاق

كأنه الشهد

او خمر مُعتّق

طوته السنين

وجيد طويلٌ

شديد البياض

حرير الملمس

محلي بعقد

الدر الثمين

ضممتها حتي

كادت تموت

لاشفي في نفسي

شوقٍ دفين

وان ارسلتها

لهيبٌ في جسدي

وأسأل نفسي

الا تشبعين!!!!

نغــم · 10 أكتوبر 2021

ثم ماذا ؟
أفلتنا الحب
أم أنه من طغى و أفلتنا !
والعين تأبى الصمت
وفي هدبها مُنية
تغفو الأماني ..
لا لمسناها ، ولا أحسّتنا .

عاوز اقولك كلام كتير انك مثلا لو تبقى جنبي احس ان الدنيا دي مملكة وانا الأمير انتي تظني اني احبك لا وربي دا اللي جوه بقلبي ليكي اكتر بكتير من كلمة...

مشاركة هذه الصفحة

الساحر

توليبيـّة 🌷

عضو

الساحر

توليبيـّة 🌷

الساحر

توليبيـّة 🌷

الساحر

توليبيـّة 🌷

*بين النبض أمنيه غافية **

الساحر

توليبيـّة 🌷

الساحر

توليبيـّة 🌷

الساحر

توليبيـّة 🌷

الساحر

توليبيـّة 🌷

الساحر

توليبيـّة 🌷

مشاركة هذه الصفحة

المواضيع المتشابهة

منتديات الغابة العربية لكل العرب :

تابعنا