سلق اللحمة
نصائح للمبتدئين لسلق اللحمة
النصائح دى للبنوتات اللى لسه داخلين المطبخ جديد ،أما حبايبي ستات البيوت أساتذة وأنا بتعلم منهم١- اللحمه مش بتتغسل ممكن شاطفة سريعة بالمية . لأن الاحماض الأمينية التى فى اللحمة بتدوب فى الميه وتصبح اللحمة ليس فيها أى قيمة غذائية.
٢- البصله مع شوربة اللحمة هي اللي بتدي طعم للشوربة من غيرها الشوربة ملهاش أي طعم.
٣- الريم اللي بيطلع ع وش الحلة لو مش اتشال بيمرر الشوربة وبيخليها زفرة.
٤-النار لو عالية أو هادية اللحمة مش هتستوي وهتشد ، لازم نار متوسطه مايلة إنها تكون هادية.
٥- السكر ونواة البلح بيسرعوا عمليه التسوية بس في ناس قالت إن النواة خطر والله أعلم.
٦-الفلفل الأسود لو اتحط من أول التسوية هيغمق الشوربة وهتحتاجي كميه كبيرة عشان يظهر طعمه ف الآخر وده مش صح.
٧-إنك تحطي أي خضار ، فلفل أو جزر أو توم أو طماطم أو كرفس كل ده بيدي طعم أحلي للشوربة وبيعلي قيمتها الغذائية.
٨- عشان الطعم يبقي أحلى وأحلى تبلي اللحمة في بصل وفلفل وتوابل وإديها تشويحة ف التيفال أو معلقه سمن قبل ما تضيفي الميه الساخنة هيفرق ف الطعم جدا.
٩- أثناء سلق اللحمة لو احتاجت ميه ضيفى الميه ساخنة لأن الماء البارد هينشف اللحمة وميخليهاش تستوى( تقرمز)
١٠-إضافة التوابل للحمة زي رشة كمون و الحبهان وورق اللورا والمستكة لو وجدت بتدى طعم حلو للشوربة.
١١-لوحسيتى إن اللحمة عجوزة وهتاخد سوى كتير بعد ما تغلي شوية إطفي النار ساعة أو ساعتين وولعى النار
عليها تانى هتستوى أسرع.
١٢-وأهم حاجة تجيبي اللحمة من مصدر موثوق فيه ولو هتسلقي اللحمة عشان تحطيها في الخضار(الطبيخ) ممكن تجيبيها موزة أو ملبسة أو من وش الفخدة دول أحلى ٣ قطعيات جربتها وعجبتني جدا.
وبالهنا والعافية 
اسم الموضوع : سلق اللحمة
|
المصدر : مطبخ الغابة العربية
