في حب الماجيكو... أبو تريكة

[ملاذ أمن]

لماذا كل هذا الحب لـ صاحب القميص رقم 22 ؟

الحقيقة إنك لما تيجي تبص علي واحد زي أبو تريكة وتتمعن فـ تفاصيل حياته ، هتكتشف إن قيمته و مكانته العظيمة عند الناس مجتش من فراغ ، ولا لـ مُجرد إنه لاعب فذ وأسطوري

لـ إن أكم من لاعبين أفذاذ مروا علي تاريخ الكورة في مصر وجايز يكونوا موهوبين أكتر من تريكة ، لكنهم فين دلوقتي ؟ أصبحوا فـ طي النسيان

عشان كده من الظلم و الإجحاف إنك تختذل الكلام عن تريكة فـ إنه قِدر يحقق نجاحات و إنجازات عظيمة و أرقام قياسية مُستحيل حد يعرف يحققها من بعده و لا حتي عشان موهبته اللي قلما تجود بيها الملاعب المصرية .!

الموضوع أكبر بكتير مـ الكورة وأشمل حتي من فكرة الرياضة بـ شكل عام .. إنت هنا أمام حالة إنسانية فريدة من نوعها

حب الناس وعشقهم لـ تريكة ونظرتهم ليه علي إنه قدوة ليهم ومِثال يُحتذي بيه فـ كل شيء ، جاية من مواقفه بره الملعب قبل ما تكون جاية من موهبته داخل المُستطيل

أبو تريكة بقي أسطورة عند الناس لـ إنه منهم وشبهم وبتاعهم و عمره ما نسي نفسه ولا تَبَرَّأَ من أصله ولا إتنكر لللي حبوه

متربي علي طبلية أبوه ومتواضع ، عمره ما إتكبر علي الغلابة اللي هو منهم وطالع من وسطهم .. واضح و صريح و دوغري فـ زمن عز فيه الرجال .!

ميعرفش اللوع ولا الميس صاحب مبدأ يقول علي الغلط غلط لو الكل قال صح ويقول علي الصح صح لو الكل قال غلط

ولو مُنتظر منه موقف مُعين فـ تأكد تماماً إن الكل ممكن يخذلك إلا تريكة ، لـ إن رهانك عليه دايماً هيكون " كسبان "

ملوش فـ الحسابات ولا فـ المُداهنات ، مبيعرفش يطبل عشان يمشي أموره ، ولا بيعرف يمسك العصاية من النص

المكاسب اللي مُعظم الناس بيهرولوا عشانها
مش موجودة فـ حساباته ولا شغلاه

صاحب رأي وموقف ويقول الحق لو علي رقبته ، كان و مازال وسيظل مُحتفظ بقيم ومبادئ لا تتجزأ مهما كانت المُغريات .!

إركن بقي علي جنب الدوري والكأس والسوبر وأفريقيا وكأس العالم للأندية ، إركن البطولات والألقاب والنجاحات والأرقام الشخصية .. وتعالي نسبح فـ بحر " تريكة الإنسان "

تريكة كان عامل " أچندة " كاتب فيها أسماء الناس اللي محتاجين مُساعدة وكان بيبعتلهم مُرتبات شهرية ولولا شديد قناوي وعفروتو إتكلموا فـ القصة دي مكنش حد هيعرف عنها أي حاجة

تريكة أكتر واحد وقف مع والدة الراحل " محمد عبد الوهاب " ومع أهالي الشُهداء ، وكان بيزورهم و بيساعدهم في السر من غير ما يقول لـ حد والنبي صورني وأنا بعمل خير .!

تريكة فـ الترسانة كان عقده 200 ألف جنيه أيام الفلوس ما كانت فلوس ولما قرروا يرفعوا قيمة العقد لـ 230 رفض بس عشان مياخدش أكتر من أحمد زغلول صديق عمره

تريكة جاله عرض إحتراف بـ 5 مليون دولار من نادي الهلال السعودي فـ 2008 ورفض لما شاف إستقبال جماهير الأهلي ليه فـ مطار القاهرة بعد كأس العالم للأندية

تريكة فـ عِز الأجواء والأحداث المُشتعلة فـ الأراضي المُقدسة ضرب بـ عرض الحائط تعليمات الإتحاد الدولي FIFA بمنع أي شعارات سياسية أو دينية فـ الملاعب ، وفاجأ العالم بـ إنه رفع قميص " تعاطفاً مع غـ,,ـزة " عشان عمره ما نسي القضية ا

تريكة كان كل يوم بيشوف ويسمع إعلاميين وصحفيين ونقاد
بينهشوا فـ لحمه ، وبيستخدموا كل الأساليب الرخيصة عشان يكرهوا الناس فيه ويتهموه بـ الباطل ويصفوه بـ أبشع الصفات ويخوضوا فـ سيرته ويشككوا فـ ذمته وهو ساكت وصامد زي الجبل وقال .. أنا بتصدق بـ عرضي إلي الله

تريكة إتحجز علي أمواله وأرصدته فـ البنوك ، تريكة أبوه مات ومعرفش يدفنه ولا حتي ياخد عزاه لإن إسمه مُدرج ع قوائم ترقب الوصول .!

كل ده فـ البلد اللي إتربي و عاش فيها و اللي شرف إسمها في كل مكان ، لكنه رغم كده بـ كل الحُزن والأسي لسان حاله كان دايماً يقول " بلادي وإنْ جارت عليَّ عزيزةٌ "

تريكة فـ قلب beIN Sport اللي صاحبها " ناصر الخليفي " اللي هو فـ نفس الوقت مالك أكبر نادي فـ فرنسا طلع وشجع الناس علي إنهم يقاطعوا المُنتجات الفرنسية دفاعاً عن سيدنا رسول الله ضد الحملات الغربية المُسيئة

تريكة تاني فـ قلب beIN Sport هاجم بشكل واضح وصريح جولات دعم الشوا.z فـ ماتشات أقوي دوري في العالم .. وهو عارف إنه مش هيسلم من هجوم الغرب عليه

تريكة رفض 50 ألف يورو من أمير الكويت نظير مُشاركته مع نجوم العالم فـ ماتش ودي بمناسبة إفتتاح ملعب جابر الدولي

تريكة رفض 100 ألف دولار من قناة دبي نظير حوار تليفزيوني مدته 20 دقيقة وأصر إنه يعمل اللقاء مجانا

تريكة طلب يلبس تيشيرت 72 فـ رحلة إحترافه
فـ الإمارات مع نادي " بني ياس " تخليداً لـ ذكري الشهداء

تريكة رفض الظهور علي شاشة قناة العربية
مُقابل 45 ألف جنية فـ الدقيقة الواحدة .!

تريكة بـ مِنتهي التواضع كان بيستني عمال
النادي عشان يصلوا الفجر ويفطروا مع بعض

تريكة كان بيشتري كتب دينية ويهديها لـ جوزيه
عشان يعرف أكتر عن تعاليم وسماحة الإسلام

تريكة سيرتة الذاتية إلي آلان بتُدرس
فـ مناهج التعليم فـ كتير من البلاد العربية

ياتري عرفت دلوقتي ياصاحبي سبب كل الحب ده لـ صاحب القميص رقم 22 وليه إحنا بنعشقه وشايفينه أسطورة صعب تتكرر ؟

كل سنة وإنت طيب يا ماچيكو بمناسبة عيد ميلادك ​

 

[رااشد]

نقل قيم
سلمت يدااك
دمت بود

 

[جهآد 👵]

أبو تريكه ده ال يعرفه* يا يحبه جداً يا يكرهه جداً ، تقريباً مفيش حل وسط .