انفاس في سطور

[عابر السبيل]

واحدن دواته بالقوافي وريده
واحدن على شوف المواليف ظامي

يانايحن غنى براس الجريده
كنك تبدد في المظامي عظامي

يامفضفض العبرات وسط القصيده
تمطر لك عيونن بليّا غمامي

نار الصبابه بالهوامل تزيده
ويظهر مع الابيات ما كان كامي

عابر السبيل

 

[عابر السبيل]

كن الذي قد راح ماهوب عايد
والممكنات اللي غدن مستحيلات

ياهيناتن واصبحن م الكوايد
سهلات كانن واصبحن لي صعيبات

باسبابهن واصبحت زوج القصايد
غريب يطرق لك بيوتن غريبات

صارن لي فراش ن وصارن وسايد
واخذ بهن في ليل الاحزان غفوات

قديمة الابيات صارت جدايد
لا ياقديماتن وصارن جديدات

عابر السبيل

 

[عابر السبيل]

يوم الهروب اسهل دروب السلامه
اخترت انا الصعبه ويالله على خير

كم ميتن قد مات خوف الملامه
جزر السباع وينهبه قاشع الطير

وكم واحدن موته يجي من كلامه
يذوق من هرجه رهيف ا لبواتير

عابر السبيل

 

[عابر السبيل]

ياكم اسامح من البهاذيل الجروح
مغفور ذنبك يالجروح القديمة

كم اسطر م القصايد فيك بوح
وعينن على فرقاك دايم كريمة

تالي السفينه في بحارك غدى لوح
مكتوب فيها لي جروحن أليمة

عابر السبيل

 

[عابر السبيل]

روس النخل تعصف بها هايج الريح
تشبه هنوفن تلفح الشعر امواج

يقوم حظك م البهاذيل وايطيح
لا طالعت رمشن على الخد مغناج

في دربها تلقى صريع المجاريح
ذبح المعنّى حطته مثل منهاج

عابر السبيل

 

[عابر السبيل]

من وين لك عطرن دفن ريح هالبيت ؟
ومن وين لك نورن طمس لي ظلامي

ياشبه طيفن فتت القلب تفتيت
من عقبكم يازين مادري اش علامي

لا انيب حي م المخاليق والميت
فعلك غريبن لا حلال وحرامي

من شن بقلبي في حراويك مريت
ثم قمت ابلّغ م الشفاقه سلامي

عابر السبيل

 

[عابر السبيل]

هي كلمة ن طاحت من اشفاف مزيون
اربع حروفن قالها واسحرتني

حتى السراب اصبح له اشكال مع لون
وغروب شمسن في الغروب فتنتني

عابر السبيل

 

[عابر السبيل]

سلام يا طيفن تجلّى على النور
اللي لها بالغيم بيتن وديرة

نجومن على صدرك كما الدر منثور
يواصل بها الساري بدربك مسيرة

كم ذا بنيته فيي فوادي لك الدور
متخالط الاحساس شره وخيرة

مني هديه طرد شعرن مع ازهور
ومني تحايا ن لك لشوفك وفيره

عابر السبيل

 

[عابر السبيل]

وقفت اناظر باقي ن من بقاياه
طرحه وعطر وخصله من جديله

وغديت كني شي من عارض اشياه
وقلبن خرشني بالصدر من جفيله

الريح ريحه والجدايل من اتلاه
ومن كان مثلي اه واعزتي له

كم ميتن فيني على الريح محياه
ولاعاد في كفي لقلبي وسيله

شطبت انا اسمي واكتب الدوم باسماه
من فوق جذعن صار مثل الهبيله

اجيه انا باليوم والحلو ماجاه
وحرفن بدمعي كل يومن غسيله


عابر السبيل

 

[عابر السبيل]

الكل غير وطلتك بينهم غير
ياللي بشاير طلتك حفلة انوار

ماياسعك بالشعر ياصاح تعبير
عجزت تجيبك بالتواصيف الاشعار

مريت ودي بس امسيك بالخير
ماناح في روس المشاجير الاطيار

عابر السبيل

 

[عابر السبيل]

كم يكرهك من كان يومن يحبك
وكم ذا يحبك من كرهته وتجفاه

وكم تخفي الايام بالوقت طبّك
وكم ناقلن يمشي وداه برداه

عابر السبيل

 

[عابر السبيل]

كنك رداء الليل يغرق للابحار
نام البحر ياليل من لمسة ايديك

اغمضت ياليل الهوى نور الانوار
كن النجوم الساهر ة لك مماليك

عابر

 

[عابر السبيل]

الف ن صباح الخير والف ن مسا ن لك
والاف مابين المسا والصباحي

قطر الندى يعشق م الحلايا ل فلّك
وعطر ن طلوع الشمس بالصبح فاحي

اي والله انك باقي ن في محلك
والشوق فيني دايم الدوم صاحي

صرت اقتنع بك والبسيطه وكلك
ياشبه صبح ن في الفيافي وشاحي

لو كنت عميانن ف قلبي يدلك
لو انته اكبر ماجرى من جراحي

هو انت تدري من فرى قلب خلك ؟؟؟؟
في يوم قلبي كاتم السر باحي


عابر السبيل

 

[عابر السبيل]

بالله قل لي كم تبيع الفناجيل
وانا علي البن والطيب وبهار

والا فعطني من حلى التوت بالميل
من مبسمن نلقى به الثلج والنار

سلام مني يالعيون الذوابيل
عينن بها لي م الاماني والاسرار

عابر السبيل

 

[عابر السبيل]

جينا على خير ومشينا على الخير
عسى السعاده ياغلاتي نصيبك

وقفت اناظر في سطور الدنانير
واصبحت اناظر م الغرايب غريبك

تبقى بقلبي لك طويل المشاوير
ياليتني بماض ن مضى لي حبيبك

عابر

 

[عابر السبيل]

وش سوت الايام ياساحر اليوم؟؟
قبل امس كنا ياحبيبي رفاقه

ورثت عقبك لوعة الهجر واهموم
والكل منا صار شوفه شفاقه

شوف الرسايل حط بالقلب معلوم
سلام يا راعي الكفوف الرقاقه

كم مات في ظلمة الحبس مظلوم
وما ساقت الايام بالحبس ساقه

صرت اتسول عقبكم لذة النوم
عقب الهوى جانا من الوقت فاقه

عابر السبيل

 

[عابر السبيل]

يكون في علم الجفا والتصاديد
بايبس على عود الامل وانطر الغيث

لا صار وادي الحب يجري مخاديد
تشرب له طيورن وتسبح براغيث

لا يومها باصبر واجر التناهيد
واحدث احلامي بغيثك تحاديث

وان مت في غصني ولا لي مواليد
اشعار قلبي كلها لك مواريث

عابر السبيل

 

[عابر السبيل]

كم واحدن تهواه من غير شوفه
الاذن مثل العين تعشق لها احيان

توسوس سلاسيلن بحالي كفوفه
وخلاخله تعطى مع المشي الحان

عابر السبيل

 

[عابر السبيل]

رفيف برقن بالمناشي يرفّي
ينماج عن ضوحه بهيم الظلامي

مثل الامل في صاحبن لك يشفّي
يقطع قراريص النوى بالكلامي

ياراعي الاشجان وين متخفّي؟؟؟
جاك السلام ولا ترد السلامي

تفنى المطايا بين حافر وخفّي
ماتت على دربك جياع وظوامي

عابر السبيل

 

[عابر السبيل]

كني بها في مرقد الليل دافي
غض الانامل تكتب الحس مخلوط

جديلها من فوق الامتان ضافي
قلبي عليها كنه اليوم ممعوط

هافي المخاصر والمراديف وافي
ينزع لها قلبي ولو كان مربوط

عابر السبيل