انفاس في سطور

[عابر السبيل]

ياعازفن عمري على نغمة الناي
دونك حياتي يالغلا غنها لي

عابر السبيل

 

[عابر السبيل]

لك كل شوقي ياجميل البشاير
ياللي جمعت الملح كله والانوار

قد لي سنين امشي على الدرب ساير
يموت لك مشوار ويحياك مشوار


عابر السبيل

 

[عابر السبيل]

شدوا رحلهم واعطوا الدرب يا منير
وقام يتقطع خافقي في قفاهم

كنّه يبتّر خافقي له بواتير
ونظير عينن مالك الله نساهم


عابر السبيل

 

[عابر السبيل]

ياللي عليك الحور تاكل شفاها
ياعود ورد وخالط العود ليني

يوم انت ترقص مع هبايب هواها
لزمت انا قلبي معا كفتيني

حفيف ريحن لحّنت لك غناها
وقلبي وروحي لك غدن طبلتيني

همومي معا ليلي وقلبي عشاها
ياصاحب النقطة غدت نقطتيني

كم تفقد نجومي بصبحك سماها
غرايبن هامت على وجهتيني

عابر السبيل

 

[عابر السبيل]

حفظت انا م الليل كاس ن عشانك
تلقى نجومي ساكنه داخل الكاس

ثم حط في وسط كاسي بنانك
وتصبح نجومي دبلة ن لك م الالماس

عابر السبيل

 

[عابر السبيل]

كتّامة الاهات يا شمعة الدار
بالنور تصرخ ثم تسمعك عيني

ياحلوة ن حطت على تاجها نار
ترقص بها نارن على راس زيني

عابر السبيل

 

[عابر السبيل]

تذكّر يا رهيف الحس
وعودن كنت تعطيها

تلاشت مع شعاع الشمس
وخالي الكف تاليها

حسايف يالعيون النعس
بحر والرمش شاطيها

حياتي من بقايا الامس
مواضي بس احييها

تلامس للخوافق لمس
وعيني هل صافيها

عابر السبيل

 

[عابر السبيل]

وش بس ابوصف فيك وش بس اخلّي
يا ملمحن يطمس جميع الملامح

نور البدر بالجو صار متجلي
ولا بيّنت شمسك تبين المفاضح

ماشفت انا شي ن عليك متعلي
ياكود تاج ن م الحلا منك ناضح

عابر السبيل

 

[عابر السبيل]

يرحمك يا وقتن من اعمارنا ضاع
ماعاد ندري وين حتى مكانه

خليتني يا وقت م الصب ملتاع
والشاعر اللي ضاع حالي زمانه

شاهدت انا من لوعتك كم وانواع
حتى القلم ضيّع بفعلك بيانه

عابر السبيل

 

[عابر السبيل]

يا سندرلا الزين تضحك مراياك
وش عرّف الفاظك لصافي المرايا ؟؟؟؟

تعدّ في وقت المسا لك مزاياك
بالليل لك ميزة وصبحك مزايا

وتحشد برمش العين زاحف سراياك
عينك لها افواج ن وخدك سرايا

لا ياظلام الليل تطمس عراياك
يوم ان من حولك جثو لك عرايا

يامالي ن في كل جوي زواياك
وش عاد باق ن مانملا م الزوايا؟؟

ماشافت عيوني بغيرك حلاياك
يا مسلّفن حلو الصبايا حلايا


عابر السبيل

 

[عابر السبيل]

ثكلى الحروف وارملة بيت الاشعار
تحيا مع الالحان بالبيت واتموت

ياكلمة ن لك رقوة ن عقب محدار
في حنجر الشاعر عجز يخرجك صوت

في نوط قلبي ثابته مثل مسمار
في وسط حرفن راح بالقلب منحوت

وجدي على بوحك فلا شك محتار
وصدري من الحيرة غدى مثل تابوت

لا ياهديل الورق في غصن الازهار
ياطيب حظك بحت ماكان مكبوت


عابر السبيل

 

[عابر السبيل]

انشدك ياللي عندك اشتات قلبي
يغيب عني ويجتمع مع جنابك

يامعطي الاصفار حاصل لضربي
ياهو يحيّرني غرايب حسابك

سالم سلامك لي غدى اليوم حربي
يموت من حربك شريد ن لجا بك

ألغيت لي شرقي وتيّهت غربي
واربع جهاتي كلها في جرابك

يامضيّّعن من تحت الاقدام دربي
ألهث طريدن خلف مبعد سرابك

عابر السبيل

 

[عابر السبيل]

غريب دار (ن) جال وسط المدينة
جال النظر فيها ولا به معازيب

متفرش الغربه ولحفه ونينه
شروى عليلن ما لقى له تطابيب

يشيل في كيسه مواضي سنينه
وحاضر زمانه مالقى به تراحيب

يشبه لمن ضيّع مع الناس دينه
اللي خلط دينه بخرط وتلاعيب


عابر السبيل

 

[عابر السبيل]

لا يا يباب البيد يا ملعب الريح
شعوف الهواء تاخذ مع البيد مشوار

واغصان قلبي تقترب ثم ن تشيح
في وسط جوفي جا لها اقبال وادبار

ياخارطة خل ن على بعد امشيح
بيني وبينك نجم ليل مع اقمار

ياكم تشفّق شوفها لك مشافيح
في عتم ليلن تسحر عيون سمّار

عابر السبيل

 

[عابر السبيل]

وش هو بقى على الطلل يا رفيقي ؟؟
ودربن لقطهم طلعة الشمس وينه؟؟

ياغشوة ن بالقلب ليتك تفيقي
وكم تشقي الانسان بالحب عينه

وكم واسع ن م الهم يصبح بضيقي
وكم يخسر الانسان زهرة سنينه

ولّيت با بيتن يجي في طريقي
من حبهم حبيت لبنه وطينه

عابر السبيل

 

[عابر السبيل]

يسري بي الهاجوس وجهة ديارك
كني مع الطاري على صهوة الريح

سلام ياللي يشعفنّي ديارك
ياريح عطرن مشت به لوافيح

يازين صبحن جلله لي سمارك
بعض المشاعر ماتبي زود توضيح

كني مع الاقدار كاذب خيارك
امشي واجمّع في مساري تباريح

اصعب مسارن قد مشيته مسارك
امشي كما الهالك على الدرب واطيح

في نياط القلب يسكن شرارك
منكم عرفنا سكة ن للمجاريح

ليته يصادف في المساري مدارك
ياحلوة فيها من الحور تلميح

او ليتني ياصاحب الزين جارك
ياللي لها جد ن في غموضة تمازيح


عابر السبيل

 

[عابر السبيل]

بالله ترفّق وانتظرني ثواني
ودي بكلمة في عجالة طريقك

مضى زمانن منك انا كنت اعاني
ودي اعرفك بالوهم او حقيقك

هل هو زواك اللي بحبك زواني ؟؟
هل كنت انا يومن بدربك صديقك؟؟

ياكم ذيبن في ليل حبك عواني
وكم اتمنى م السوالف رقيقك

الله يا رهف الهوى بالثماني
في مبسمن كن العسل كان ريقك

كم افقدك لامن ليلي ضواني
واكتبك حرفن في جبينك عقيقك

عابر السبيل

 

[عابر السبيل]

مسّيك بالخيرات يا ناعس الطيف

ياشبه عطرن ساكنن في المناديل



ياساكتن تهواك بوح وسواليف

نامت عيون الليل يا باخس الكيل



حظي سهر عينن سهرها سواريف

وهزيل قلبن واني الحول والحيل



يامحيي ن روحي كما تحيي الريف

زهورن تهازع من على ضفة النيل



يابو ثمانن في المباسم مراهيف

ياساحرن عقّال حبك مهابيل



لا وا حسايف يالغلا والف ياحيف

عصرن مضى ما يجي بالمقابيل



تمسي على الخيرات ياناعس الطيف

ياشبه عطرن ساكنن بالمناديل



عابر السبيل

 

[عابر السبيل]

هو انت تسمع بالغلس من يناديك؟
النازح اللي من البعيدة حكى لك

فريسة ن ياحلو الاعيان يهذيك
كنه جوابن ما يعرفه سؤالك

ياصاحب الفنجال منهو يقهويك
قامت تبرا منك حتى دلالك

ياميت ن م الهجر منهو بحييك؟
جف القلم واسهر يالهواوي لحالك

كن القلم لك يارفيقي يعزيك
في ميت القيفان حرفك بكى لك

اجلس ونادي عسى الخل يوحيك
جرّب يمين السطر والا شمالك

عابر السبيل

 

[عابر السبيل]

كم يعشق الانسان من هو يشوفه
وانا عشقته دون سمعن ولا شوف

كن العطر بالشفايف رشوفه
ماقد سمعت العطر بالشف مرشوف

كم آتلمّس بالقوافي وصوفه
وكم يتعب الواصف على وصف موصوف

عابر السبيل