انفاس في سطور

[عابر السبيل]

حفنه من الذكررى مواريث باقيك
وتالف سطورن في رثيث الرسايل

تجوش اشجاني وتسكب ب واديك
الله من واد ن جرى اليوم سايل

كن الخلا في وسط كف راجيك
وكم تعتذر في وسط حبك وسايل

عابر السبيل

 

[عابر السبيل]

رجيت وقتي في بعض الاحيان بالجود
وخلت كفوف الوقت لا تبذل الخير

وانا على صدري من الهم مرجود
وافرج التهمام مشي ومسايير

سلام ياماشي تهصّر بك العود
ولذيذ هرج ن شبيه الدنانير

عينه بها سيفن من الموت مجرود
من سطوته تهفى حداد البواتير

عابر السبيل

 

[عابر السبيل]

حذراك تخسر باكرك لاجل ماضيك
مثل الهبيل معايد القريتيني

ان افقرك امسك ف باكر بيغنيك
روح ولا تهدر بها دمعتيني

كمن تبيعه واهوه الارواح يشريك
باع الحصيل وباع غرة سنيني


عابر السبيل

 

[عابر السبيل]

من صوبها عيني كثير ن لججها
والسمع من يمه حديدن رهيفي

عزاه يا نفسن تجاهر حججها
والعقل في طاريه ياهو خفيفي

اليا ابتسم يجتال نفسي رججها
حتى مع العتبى عتابه ظريفي

الروح في حبه غريبن نهجها
وابي السلامه مار ماهو بكيفي

عابر السبيل

 

[عابر السبيل]

يسعد مسا اللي نسانا مع العيد
عدى ولا يرمي علينا سلامه

رحنا محاديرن وجينا مسانيد
ولا لقينا في الرسايل علامه

عادات وقتك بالمقارب وتبعيد
وياكم يقفى العجل م الندامه

عساك سالم يالذيذ التناهيد
ياعطر وردن انتثر من كمامه

عابر السبيل

 

[عابر السبيل]

بالخير ياشاري من النوم غطه
غطة سهيدن ماتصاحب مع النوم

بحار ينظر بالبحر وين شطه
قلبه على شوف المواليف محموم

وش لك ب خل ن شيلها مثل حطه
الظالم اللي لبس ثوب مظلوم

عابر السبيل

 

[عابر السبيل]

من حاضر الايام يشريك ماضيك
داع ن دعااك من الليالي الخوالي

وليت يا ماضن دخل م الشبابيك
كنه درى اني جالس له لحالي

ياميت الماضي على الله مشاكيك
من قبل شوفك كنت جذلن وسالي

لا لا رعاك الله درب الشرابيك
كم اندفن بك من غريب السؤالي


عابر السبيل

 

[عابر السبيل]

على الذي قد راح مامن حسايف
تبدي لك الايام معدن رفيقك

صدق المحبه ما يجيها خفايف
ومن لا يودك ابعده عن طريقك

لو كان له شف وثمانن رهايف
اسكب على ناره دلال وبريقك

عابر السبيل

 

[عابر السبيل]

لا تبدي المرقاب يلعب بك الهوى
ويذكرك المرقاب كل خليل

وترا هبيل القلب من لا يهمه
فراق الاخله والزمان طويل

سقا الله وادي ن في الحجاز مقابل
ابو سلم ورق الاغصان ظليل

ترا باسفله سدر وعالي فروعه
وسيله يسيل قرى ونخيل

تلقى بنات الغيد يلعبن حوله
ويهزعن اغصانها وتميل

تلقى بها راعي الذوابه جالس
احم الاشافي في وجناه نيل

احم الاشافي ادعج العين ليتني
ألقاه وانا بي عليه غليل

 

[عابر السبيل]

من كان همه طي الاقفار هايم
مسير في دربه يلاقي الحتايف

مثل الورق في طواع النسايم
يحوف قلبه م التهاميم حايف

قلبه كما طيرن مع الغيم حايم
ياتي لجنحانه بالخضيرا رفايف

سلام ياعين بها الموت نايم
ذاب العسل يا صاح بين الشفايف

عابر السبيل

 

[عابر السبيل]

رافقت ظلي في مهاميه الاقفار
والظل يرحل لا تجرهد لك الليل

وانته كما نجمن مع الجو سيار
ولا ظهر ظلك ب ضي القناديل

وميلاد ظلك دايمن بعد الاسحار
لو كان هو لك واني الحول والحيل

عودت ظلك بالسحر كل مشوار
وقمته تعد امتارها والمكاييل

البارحه مريت حفلن وسمّار
حفلن ينوع لك قصيد وتماثيل

ثم انهمر من هامل العين مدرار
ولا فيه للاعيان ياصاح منديل

عابر السبيل

 

[عابر السبيل]

بالخير يا سايق من البن فنجال
ألذ ما ذقنا من البن والهيل

عوده كما راك ن مع الريح ميال
ياكم يشدك غصنها والتماييل

من بينهن يمشي كما الفخر تخيال
وقالوا ترا السحر احيان ياتي تخاييل

ضوح الجمال اللي عجز ستره الشال
يحط في قلبي له اعمال ويشيل

ياصاحبي واصبحت مضرب للامثال
تعيش يا سايق لذيذ الفناجيل


عابر السبيل

 

[عابر السبيل]

كم للطواري بعض الاحيان خمات
وتقوم كنك ناوي ن لك مشاوير

واحيان تاتي علومك سلامات
تاقف تهوجس دايرن للتفاكير

وشوقن حيا لك بعد ما كان قد مات
وتزعج على الاسطار لاجله تعابير

تشع من حسك على السطر كلمات
وينبت على الاسطار زهر ونواوير

عصرن مضى لك قد مضى له سنيات
ويدفع فوادك من زمانك فواتير

لك باقي ن ينفح على الروح نفحات
ويعطر اجواءي بالاحساس تعطير

عابر السبيل

 

[عابر السبيل]

قالت تسولف قلت مامن سواليف
ودي بسولافن تقوله عيونك

انظر بهن كني معك شارب الكيف
وشعاع حبن تجيبه شجونك

كم مرني من لياليك من طيف
وكم طيف مني يارفيقي يجونك

كم كلمة ن جتني ترادف مراديف
ومع المحل ودي تجيني مزونك

عابر السبيل

 

[عابر السبيل]

الله من شي تمنيت نوله
وقالوا التمني راس مال المفاليس

الله ياللي يرقد القلب حوله
بالليل انثر على اسطار ه الكيس

ينساح بالي كلما شفت زوله
وارسل سلامي له مع هبوب النسانيس

يشبه لعطرن وانسجن وسط توله
يفوح ريحه كلما جاه تنفيس

عابر السبيل

 

[عابر السبيل]

الليل سترك يالعيون الشقيه
جودي بدمعك يالشقيات هاتي

وانا مثيل اللي تخبى من خويه
وليل الهوى يشبه ستير العباتي

طويتني طي ن على اثار طيه
ضعيت منها يارفيقي صفاتي

ماتت سنينك بس الاشواق حيه
وابذر الايام واهلك حياتي

عابر السبيل

 

[عابر السبيل]

بني معن ماشفت لي هايف اخصار
ارق م النسمه قبل طلعة النور

بالود ودي بالذهب اكتب اسطار
بالجادل اللي طلعته كنها الحور

ياما تجشمنا على شان مشوار
وكم ذا شرى لي باقة الورد وازهور

لذيذ كنه م الحلى قطر نكتار
انفاسها تفخر على فاخر اعطور

عابر السبيل

 

[عابر السبيل]

على اديمك ياورق وشمن وشمته
يمضي الزمان ووشم الاسطار باقي

حس ن احسه بالورق لك رسمته
مادام للاحساس بالقلب ساقي

البارحه ياصاح حلمن حلمته
في خاطرن منها حدور ورواقي

ياكم ليلن راح بالود نمته
عيت على نومه عيونن شواقي


عابر السبيل

 

[عابر السبيل]

اوحش مكانن غادره صافي اللون
يروّع مكان ن يهجره حالي الاوصاف

ينباح من شوفه خافي السد مكنون
ودارن هجرها تنترك ثم تنعاف

مير البلى قلبي ب هالدار مسجون
وعيني عليها بعض الاحيان مذراف

ياعلها دربن للمراويح وامزون
مر ن حقوق وبعض الاحيان هتاف

وقفت فيها ساهمن مثل مجنون
مثيل من قلبه من الرجف خفخاف

فيها الروابع يجون ويرحون
تهلك لها اوصافن وتحيا لها اوصاف

وين الذي يرسم على خدها نون
اليا تبسم طلعةالنون تنشاف

عابر السبيل

 

[عهود منسية]

ليه قلت لي إن النهاية سعيدة
دام الطريق اللي مشيناه مقطوع ؟؟

ليه قلت لي؟ آمر بكل ما أريده
دامه تلاقينا كما حبة الكوع ؟؟!




عهود




مساكم الله بالرضا وراحة البال وأسعد الله أوقات شاعرنا المبدع ملك الكلمات