انفاس في سطور

[عابر السبيل]

هنيّ خبلن طافي العقل هلباج
همّه ببطنه لين كرشه ملاها

طبلن يدندن وسط الاسواق هرّاج
ما ميّز الايام ولاعه غثاها

لإمّه سريرن فاخر الفرش والعاج
ورزقه عليها وزاد بطنه قراها

ماهوب مثل اللي للايام مسهاج
كم ليلة ن غدراء بهيمن سراها

ياكم وطى ناب ن من الداب منعاج
كبود الفيافي من اللوايع فراها

عابر السبيل

 

[عابر السبيل]

إليا استتم البدر في ليل الاشجان
كن الحصى بالبيد ولّع به اشموع

اذكر رفيقن هذّ من قلبه افنان
يهدي لي ابياتن تشاهر بها النوع

لعب ن لها حلوات الاخصار بانواع
طرق البني اللي يبيعن لنا اللوع

من بينهن شيماء كما راك الاغصان
تلوي لها عود ن ويصبح لها طوع

وليل ن تتلّه يخلف العقل ب جنان
تلمس لها صخر ن من اللمس ويموع

تلفح لها شعرن على الجيد ب اوزان
شعرن تتلّه باشمخ الراس مجموع

تشبه لحور ن صورته صورة انسان
تشبع بصر من حولها وتذبحه جوع


عابر السبيل

 

[عابر السبيل]

مشيت من عنده خيالن بلا روح
واحس عينه تلحق الزول مقفي

اسمع له انهوتن تخالط مع النوح
واحس بالحسرات تمشي ب صفي

امشي وكني بالبحر طافي اللوح
ترمي به الامواج في كل شفي

والا كما الريشه على كف لافوح
ولا طالت ارض ولا تمشي ب خفّي

وامسيت م الحسفات ياحلو مذبوح
امشي على غير القدا مستخفي

عابر السبيل

 

[عابر السبيل]

لك يالذي تجمع بياضن على السود
نجل ن تقرّب للمعنا مماته

واشرّها لامن تنقّض لك جعود
صاحبك لا شافه قطع لك صلاته

سود ن على سودن كما الظل مرجود
ولمعة جعوده زوّدت من حلاته

ابصرت في كفي ولا شفت به فود
مفتون بك يا وقت والوقت فاته

مسير زين وشين يرعى به الدود
وكم حالب ن ماذاق من حلب شاته

ياكم في دنياك طارد ومطرود
وياكم شمل ن دهرنا هو شتاته

عابر السبيل

 

[عابر السبيل]

يكتب بريش الطير والطير قد مات
ولا بقى م الطير ياكود ريشه

للطير كلماتن وللزين كلمات
وكلماتهم لي ياغلا الكون عيشه

ياحلو ياللي خذت م الليل نجمات
مديت يدك للنجم من دريشه

سلبت من كوني نجوم ومجرات
وما سر نجمات العنا كثر جيشه

بالله تفضل غن لي سحر الابيات
ودقدق عظامي وحط قلبي جريشه

بالمثل كني طير والطير قد مات
ولا بقى م الطير ياكود ريشه

عابر السبيل

 

[عابر السبيل]

قسمة حظوظ الناس شاقي ومرتاح
وين انت ياحظي من القسمتيني ؟؟؟

اذكر جمالن فات في ماضين راح
عليه انا مابين زينن وشيني

اشكيك يا رمشن مع الناس ذبّاح
ومافيه عدلن بين رمشك وبيني

فصّلت لي ثوبن من الحزن ووشاح
واشقيت ياحلو اللما نوم عيني

مع طلعة الاصباح ياحلو بوّاح
تبيعني الحسرات ثم تشتريني

عابر السبيل

 

[عابر السبيل]

يهيج بي التذكار مع نسمة الليل
واسرح مع الطاري على متن هاجوس

واعبر على الماضي ووقت التعاليل
وقتن يقطعني كما ماضي الموس

رعى الله رمش ن للنواعس مظاليل
تحيا بها نفس ن وتزهق بها انفوس

ياحظ كحلن خطها با املس الميل
وياحظ ميل ن باملس الكف ملموس


عابر السبيل

 

[عابر السبيل]

وحي المشاعر تكتبه روس الاقلام
بغا يطير الحرف وبالسطر مسجون

وصارت تواهج كنها خفق الاعلام
ليا هبت الغربي معاها يلوحون

إطلق عنان القاف بالحس حوام
تلقاه عين اللي مع القاف مفتون

واليا لفى ليلن تماوج به اظلام
يفرح به السامر مع اللي يغنون

ويمر عامن قد خلى قبله اعوام
البيت حي وصاحب البيت مدفون

عابر السبيل

 

[عابر السبيل]

هاله من اسراب الهواجس تجيني
مثل السحاب اليا غطى ساطع الشمس

هاجوس خيّم بين عينك وعيني
ثم انعمى شوفي ولا عاد به لمس

بعد انعدم م الحس بك حستيني
وشمي وسمعي والتذوق غدن خمس

ثم عشت في جو ن مع الهايميني
ياهي حياة ن كنها مظلم الرمس

صدك على اليسرى وحبك يميني
واربع جهاتي صرخها عندكم همس

ضجت لك الاشواق حاضر حنيني
وامال يومي في تواريخكم امس


عابر السبيل

 

[عابر السبيل]

وين انت ياللي تجمع النور لاسمك
خليت نجم الليل يسهر بلا نور

لا يا نحيل ن تطوي الكف جسمك
تشبه لغصنن اثقله حملة ازهور

احلى نسيمن ياخذ القلب نسمك
زغلل سراب البيد لك شاهدن زور

ياللي على بيتي من القاف وسمك
حالي فوافي البيت من حولك تدور

عابر السبيل

 

[عابر السبيل]

من شاف لي خل (ن) سحر زاهي الورد
كفّه ورود وصافي الخد بوكيه

يخلط بياض وحمرة الورد عسجد
يشبه لشمس ن وسط الاشفاق تبكيه

وشموخ عنقن بالهواء راح منمد
متعلي ن صدرن تزمه ملاكيه

ياكم طيرن فوق الاغصان غرّد
مرجح لها من حلو الالحان راكيه

روحي سبب فرقاه تسجن وتجلد
واحكي على ورده م الاحزان شاكيه

ياحيف عمرن راح باخذه مع الرد
والى قضى هالعمر ماحدن بباكيه

عابر السبيل

 

[عابر السبيل]

حطيت عيني للقلم محبر ادواه
اروي بها راس القلم واكتب البيت

اكتب همومي يالعيون المعنّاه
عساك تقرا باكي البيت يا شيت

احساس ينقط م الضلوع المحناه
شي ن يفتت خافق القلب تفتيت

لو هو قراه الطير يالغصن غناه
تسمع جميل الريش غرّد رغاريت

عابر السبيل

 

[عابر السبيل]

نويت انا اهدي لك من القاف بيتين
لو انته اغلى من جميع الهدايا

وش حيلتي بك غير حلو التفانين؟؟؟
بيوتن على كفّك تهامل بكايا

كانت بصدري من محاني الضلاعين
ياويش سوّت بي عشانك سوايا

عن حب غيرك يالغلا صابني عين
ولا شفت غيرك م الخلايق دوايا

هو انت تذكر صاحب البيت يا زين؟؟
إللي غدى جوفه بحبك شلايا

عابر السبيل

 

[عابر السبيل]

كم اتسلف من مواضيك صورة
والبسمة اللي تنسي الهم واحزان

كم احدثت في فاجع القلب ثوره
وياكم فيها من جميلات الالوان

جار الزمان واخلف الوقت طوره
وصارت سواليف الغلا في خبر كان

ياليت ياقلبي تسمع النصح شوره
ماكان كنا مضرب الحكي بازمان

الله ياللي يسحر القلب نوره
ورثت لي صورة تبسّم لجدران

عابر السبيل

 

[عابر السبيل]

لا والله اللي غابت الشمس يا منير
باقي شفقها واقفن دون ظلماه

بالخير يا ليل الهوى والتعابير
ليلن يموت الصبح من عقب محياه

غشى الشجر ياصاح صمت العصافير
وكل ن يغني يارفيقي ل ليلاه

على الورق ياحلو نكتب دنانير
طويل ليل وزايد الطول مسراه

تلمع نجومه مثل نور الفنانير
وعلى يمينه طلعة البدر تبراه

ديدن حياة ن تلحق السير بالسير
وياكم حرفن ينمحي قبل تقراه

سلام مني يحمله سابح الطير
م الشاعر اللي يمينه مثل يسراه

عابر السبيل

 

[عابر السبيل]

يلومني قلبي وانا بعد الومه
ينحي على اللوم واللوم ناصيه

من طاوعك ياقلب شقق هدومه
يعصى علي وبعد انا اليوم عاصيه

ما خبرة ان الحر يترك سلومه
حتى ولو وقته على الكود قاصيه

عابر السبيل

 

[عابر السبيل]

الصمت في بعضات الاحيان كلمات
افصح من الهذر الذي جاك بلسان

وافصح من اللي قلت م العين دمعات
وشوفة عيونن من وراء هتن هتان

واحلاهن اشراق المباسم ببسمات
تبسم ودمعه فوق الاوجان ودان

خليط حزن وفرح ونورن وعتمات
فيها الفرح ياكل بقايا من احزان

يجيك من حلوات الاحساس خمات
سحرن يشوق الروح عتم الاحيان

عابر السبيل

 

[عابر السبيل]

ماعاد لي في فعل الايام حيله
ظهر المجن اليوم ياحلو مقلوب

كم آتلمّس في الليالي وسيله
واصبح كما صفر ن مع الصفر مضروب

يسعد مساك الله عين الكحيلة
كنك فنارن في دجا الليل مشبوب

يامعطي الظلما بعض لون الجديلة
ورمش ن ظليلن من على الخد مسحوب

لوحة جمالن ما لقته الخميلة
ياكم لها في واهي القلب ملعوب

يبقى زمانن جاب رجله وخيله
وكاس الفراق اللي من الصد مشروب

عابر السبيل

 

[عابر السبيل]

باجاذبك ياليل سولاف واعلوم
وان قلت غني باترنم واغني

الكل منها يادجا الليل مهموم
وماحولي انسي ن ولاشفت جني

ياكم يموت بظلمة الحبس مظلوم
وكم هاجس بالراس عندي يعني

يشمل ظلامك واسع البحر وانجوم
ويشمل ظلامك شاقي ن ومتهنّي

عابر السبيل

 

[عابر السبيل]

مريت عند الباب والباب مصكوك
ونامت هبوب الريح باعتاب بابك

ياباب رد الصوت للي يمرّوك
ليته يرد الصوت حضرة جنابك

ياباب قلبي له ايام مفروك
ظميان واشرب م لوامع سرابك

كم ذا يلوف القلب في حين طروك
الكل يدري بي ولا احدن درى بك

العقل كنه به من المس مشروك
ليت الذي ودّاك ياحلو جابك

عابر السبيل